Ադրբեջանի բանակը խոշոր հարձակողական զորավարժություն է պատրաստվում անցկացնել

10 հազար զինծառայողի ներգրավմամբ Ադրբեջանի բանակը հարձակողական սցենարով խոշոր զորավարժություն է սկսելու մարտի 11-ին՝ երկուշաբթի։ Դրա ընթացքում մտադիր է իրականացնել խոշոր զորաշարժեր, կիրառել նոր զինտեխնիկա, արձակել հրթիռներ և այլն։ Զորավարժությանը ներգրավված է հետևյալ քանակի զինտեխնիկա․

• 500 միավոր տանկեր, զրահատեխնիկա, հատուկ և տրանսպորտային մեքենաներ,
• 300 միավոր հրետանային ու հրթիռային տեխնիկա, որոնց թվում՝ նաև ականանետներ,
• 20 միավոր բանակային ու ճակատային ավիացիա, այդ թվում՝ ուղղաթիռներ։

Այս զորավարժությունն աչքի է ընկնում ներգրավվող բանակային անձնակազմի ավելի «համեստ» թվով։ Մինչ այս ավելի մեծ թվեր են հայտարարվել, որոնց հավաստիությունը կասկածելի է։ Իսկ այս մեկը ավելի հավաստի է թվում իր հավանականությամբ։ Մինչ այս հայտարարվել են այսպիսի թվեր․

Այս զորավարժությունները ադրբեջանական կողմը հաճախ օգտագործում է նաև քարոզչություն իրականացնելու կամ բանակցային գործընթացի վրա ճնշում բանեցնելու համար։ Այսպես, մարտի 11-ին մեկնարկելիք զորավարժությունն ունի հետևյալ սցենարային կետերը․

• հարձակողական գործողության նախապատրաստում,
• հակառակորդին մի քանի ուղղությամբ հարվածներ,
• պաշտպանության ճեղքում և զորախմբերի ջախջախում,
• պաշտպանության խորքում տեղակայված ռազմական ու ռազմավարական օբյեկտների ուղղությամբ հրթիռային հարվածներ։

Այս ամենը, թեև չի հայտարարվում, բայց նախատեսվում է իրականացնել Արցախի պաշտպանությունը ճեղքելու համար։ Իսկ նախորդ նմանատիպ խոշոր զորավարժության ժամանակ՝ 2018 թվականի սեպտեմբերին, բացահայտ հայտարարվեց, որ զորավարժության սցենարը Արցախի բանակի պաշտպանության ճեղքումն է։

Այս զորավարժությունները, ի դեպ, անցկացվում են նաև միջազգային պարտավորությունների խախտումներով, քանի որ նմանատիպ մասշտաբի զորավարժություն անցկացնելիս ադրբեջանական կողմը պարտավոր է Վիեննայի փաստաթղթին միացած երկրներին, այդ թվում և Հայաստանին նախապես տեղեկացնել այդ մասին՝ լարումից խուսափելու համար։

Բայց այս պարագայում Բաքվի նպատակներից մեկը հենց լարում ստեղծել է, քանի որ ադրբեջանական կողմը խոստանում է առաջիկա զորավարժության ընթացքում կիրառել նոր գնված սպառազինություն ու իրականացնել հրթիռային արձակումներ։ Ակնարկը, ենթադրաբար, վերաբերում է իսրայելական «Լորա» և բելառուսական «Պոլոնեզ» հեռահար հրթիռային համալիրներին, որոնք նոր են գնվել ու արդեն ցուցադրվել են նախորդ խոշոր զորավարժությունների ժամանակ։