Ե՞րբ է լուծվելու Գյումրիի փողոցների հարցը, և ե՞րբ է հաշվառվելու՝ քանի՞ անօթևան կա Գյումրիում. SHANTNEWS.am-ի հարցը վարչապետին

ՀՀ վարչապետ Նիկոլ Փաշինյանի՝ լրագրողների հետ հերթական հանդիպման ժամանակ SHANTNEWS.am-ի թղթակիցը հետաքրքրվեց՝ երբ է լուծվելու Գյումրիի անբարեկարգ փողոցների հարցը, նաև՝ երբ է հաշվառվելու՝ քանի՞ անօթևան կա Գյումրիում, որոնց հանդեպ պետությունը պարտավորություն ունի:

«Գյումրիի փողոցների վիճակը շատ վատ էր, հիմա ավելի վատ է, փողոցներ են քանդվում, որ կառուցվեն, բայց չկա հստակ նախագիծ և ժամանակացույց: Նաև տնակների մասով՝ 4 ամսվա ընթացքում խումբ է ձևավորել, որ հաշվառում է անելու, կառավարությունը Գյումրիի մասով չունի պարտավորություն, անօթևան ընտանիքների խնդիրը, կարծես թե, լուծված է համարվում, բայց ունենք փաստ՝ 2-3 հազար անօթևան ընտանիք:

Ե՞րբ Գյումրիում կկառուցվեն այդ փողոցները, որոնք արդեն մի տարի է՝ սարսափելի վիճակում են, ե՞րբ կառավարությունը կասի, թե մենք հաշվառում ենք արել, դեռ իքս թվով անօթևան ունենք, որոնց հանդեպ պարտավորություն ունենք»,- հարց ուղղեց լրագրողը՝ միաժամանակ հետաքրքրվելով՝ չի՞ պատրաստվում արդյոք վարչապետը, ում անձի հետ կոնկրետ հույսեր են կապում գյումրեցիները, կիսել այդ պատասխանատվության չափաբաժինը:

«Հետաքրքիր իրավիճակ է, ինձ երբեմն մեղադրում են, որ պատասխանատվությունն իմ վրայից գցում եմ, երբեմն էլ, որ չափից մեծ պատասխանատվություն եմ վերցնում: Գյումրիի հետ կապված՝ մենք արդեն այդ թեմայով պայմանավորվել ենք: Պետությունը այսօր, մենք չգիտենք, թե քանի մարդու նկատմամբ ունի պարտավորություն. դա ամենադժվար վիճակն է: Երբ գնում ենք գյուղեր, ասում են՝ այս ճանապարհը լավ կլինի սարքել, երբ ունենք կոնկրետ նախագիծ-նախահաշիվ, այսինքն՝ գիտենք՝ ինչքան գումար է անհրաժեշտ այդ խնդիրը լուծելու համար:

Դա այլ իրավիճակ է, երբ ունենք հիպոթետիկ իրավիճակ, բայց չունենք արժեքը, թե քանի տուն է անհրաժեշտ կառուցել, որտեղ: Այդ խնդիրը դառնում է տեսական անլուծելի խնդիր, մեր հիմնական խնդիրն այսօր՝ ազնվության պայմաններում պարզել, թե պետությունն իրոք քանի՞ հոգու նկատմամբ ունի պարտավորություն: Ասում են՝ կան դեպքեր, երբ մարդը տուն է ստացել, հանգամանքների բերումով վաճառել է, հետ է գնացել տնակներ, պետք է հասկանանք՝ այս քաղաքացիների նկատմամբ պարտավորություն ունե՞նք, թե՞ ոչ»,- ասաց ՀՀ վարչապետը:

Նա նշեց, որ այս մասով տրված հանձնարարականի մեջ մինչև հունիս կամ հուլիս ամիսն է գրված: Փաշինյանն ընդգծեց՝ խնդիրների լուծման ամենամեծ պրոբլեմն այն է, որ չունեն գնահատական՝ ինչքան գումար է պետք, երբ կա գնահատականը, կարելի է գնալ դոնորների հետ խոսել, կազմակերպությունների հետ հանդիպել:

Նրա խոսքերով՝ անչափելի խնդիրներն անլուծելի են, ուստի ամեն խնդիր պետք է դարձնել չափելի, որ գնահատական ունենաս, հաջորդ քայլն անես:

«Ես փողոցների թեմայով զրույց եմ ունեցել Գյումրիի քաղաքապետի հետ, ծրագիրն իրականացնում է նա: Այն, ինչ ասացիք, ինձ համար զարմանալի է: Ես տարածքային կառավարման նախարարությանը կհանձնարարեմ, զրույց կունենամ Գյումրիի քաղաքապետի հետ՝ հասկանալու համար՝ ինչ է եղել, քանի որ փողը կա, նախագիծը կա, շինարարություն է գնում, թվում է՝ պետք է հաճելի լինի, բայց էլի այդտեղ էլ է պրոբլեմ»,- ասաց նա:

Վարչապետը խոստացավ՝ այս խնդրով կսկսի զբաղվել հենց այսօր: