Կառավարությունը դեմ է, որ ոստիկանությունը նույնպես գաղտնալսելու իրավասություն ունենա․ նախագիծը գործադիրի օրակարգում է

Ազգային ժողովի պատգամավորներից Արմեն Խաչատրյանը (նախկինում՝ ՃՈ պետի տեղակալ) օրենսդրական նախագիծ է ներկայացրել, որով առաջարկում է ԱԱԾ-ից բացի, մարդկանց գաղտնալսելու հնարավորություն տալ նաև ոստիկանությանը։

Նրա ներկայացրած նախագծի հիմնավորումների մեջ մասնավորապես ասվում է, որ գաղտնալսում (նախագծում շրջանառվող տերմինով՝ հեռախոսային խոսակցությունների վերահսկում, ՀԽՎ) ներկայում կարող է իրականացնել միայն ԱԱԾ կազմում գործող մարմինը, և երբ ոստիկանությանը անհրաժեշտ է լինում գաղտնալսել որևէ խոսակցություն, նրանք ստիպված են լինում դիմել ԱԱԾ միջնորդությանը։

«… Քրեական օրենսգրքի շուրջ 80 տոկոսը կազմող հանցագործությունների բացահայտման նպատակով ոստիկանությանը վերապահված է օպերատիվ-հետախուզական միջոցառումներ իրականացնելու իրավունք, որոնց անհետաձգելիությունից (հարմարադեպությունից) ու օպերատիվությունից շատ հաճախ կախված է հանցագործության բացահայտման հնարավորությունը»,- ասվում է հիմնավորման մեջ։

Նախագծի համաձայն՝ եթե ոստիկանությանը նույնպես տրվի այդպիսի հնարավորություն, ապա «կխնայվի ԱԱԾ-ին միջնորդությամբ դիմելու և տեխնիկական աջակցություն ստա­նալու ու կազմակերպչական հարցերի լուծման համար ծախսվող ժամանակը»:

Նախագիծը ներկայացվել է կառավարության հավանությանը, սակայն չի արժանացել դրան։ Գործադիրի վաղվա նիստի օրակարգի փաստաթղթերից պարզ է դառնում, որ կառավարությունը դեմ է հանդես գալու այս փոփոխությանը՝ մի քանի հիմնավորումով։ Մասնավորապես նշվում է, որ գաղտնալսումները միայն մեկ մարմնի վստահելը «ուղղված է ՀԽՎ իրականացնելիս հնարավոր չարաշահումներից, բացահայտումներից խուսափելուն` հաշվի առնելով, որ միջոցառման իրականացմամբ սահ­մա­նա­փակվում է անձի սահմանադրական կարևորագույն իրավունքներից մեկը՝ հաղորդակցության ազատության և գաղտնիության իրավունքը»։

Մերժման հիմնավորումներից ևս մեկը վերաբերում է ֆինանսական ծախսերին։ Կառավարության եզրակացության համաձայն՝ ԱԱԾ-ն գաղտնալսումներն իրականացնում է հեռահաղորդակցության օպերատորի հաշվին գնված ու նրա մոտ տեղադրված սարքավորումների միջոցով, իսկ ոստիկանությանը նման հնարավորություն տալը կնշանակի նույնպիսի սարքավորումների երկրորդ համալիրի գնումը, ինչը «կհանգեցնի պետական բյուջեի ծախսերի ավելացման, որի չափը հնարավոր չէ կանխատեսել՝ համապատասխան տեղեկատվության բացակայությամբ պայմանավորված»։

Մի քանի այլ հիմնավորումների ներկայացումից հետո կառավարության եզրակացության մեջ առաջարկվում է գործող օրենքի դրույթները թողնել անփոփոխ, այսինքն՝ ոստիկանությանը մարդկանց գաղտնալսելու առանձին հնարավորություն թույլ չտալ։ Սա էլ նշանակում է, որ կառավարության դիրքորոշման համաձայն՝ ոստիկանությունը շարունակելու է մարդկանց գաղտնալսելու պահանջ ունենալիս դիմել ԱԱԾ-ին ու նրանից ստանալ գաղտնալսման արդյունքները։

Կառավարության այս որոշումն ուղարկվելու է ԱԺ, որտեղ օրենքի նախագծի հետ քննարկվելու է նախ խորհրդարանի հանձնաժողովներում, ապա՝ լիագումար նիստում։