Վճարման կտրոններից մինչև սեփականության վկայական. Ամբերդի տարածքում շինարարություն իրականացնողը ասուլիս է հրավիրել

Այսօր ասուլիս է հրավիրել «Պատմամշակութային արգելոց-թանգարանների և պատմական միջավայրի պահպանության ծառայության» ՊՈԱԿ-ի Արագածոտնի մարզային նախկին պետ, «Ամբերդ ամրոց» պատմամշակութային արգելոցի տարածքում շինարարություն իրականացնող ընկերության համասեփականատեր Մանուկ Մանուկյանը:

Բանախոսն ասել է, որ սպասում է հնագետների ուսումնասիրություններին ու պատասխանին, որպեսզի վերսկսեն աշխատանքները տարածքում:

«2010 թվականին Օրգովի համայնքապետից ստացել ենք գրավոր թույլտվություն, որպեսզի տարածքում զբաղվենք առևտրային գործունեությամբ: 2013 թվականին կնքել ենք վարձակալության պայմանագիր՝ 10 տարով: Այնուհետև տարածքը բարեկարգելու և ներկայանալի դարձնելու նպատակով տղաս դիմել է Օրգովի համայնքապետարանին, որպեսզի կառուցապատման հնարավորություն տրվի: Դիմումը քննարկվել է Օրգովի համայնքապետարանում՝ ավագանու նիստում, ստացել դրական եզրակացություն, քանի որ նպատակը զբոսաշրջության զարգացումը և աշխատատեղերի ստեղծումն է եղել:

Այնուհետ Օրգովի համայնքապետն ավագանու որոշումը ներկայացրել է մարզպետարանում գործող միջգերատեսչական հանձնաժողովին, հանձնաժողովը նորից դրական եզրակացություն է տվել, ուղարկվել է կառավարություն՝ շահագրգիռ գերատեսչություններում քննարկման: Բնականաբար, անցել է բոլոր նախարարություններով` և´ մշակույթի նախարարություն, և´ Քաղաքաշինության կոմիտե … Բոլոր նախարարություններն անցնելով՝ փաթեթը հետ է գալիս Օրգովի համայնք: Համայնքն ու նաև մարզպետարանը, ընդունելով, որ մենք բարեխիղճ օգտագործողներ ենք եղել տարածքի, մեզ հնարավորություն են տվել առաջնահերթության իրավունքով ձեռք բերել այդ տարածքը»,- ասել է Մանուկ Մանուկյանը՝ հավելելով, որ առաջնահերթության իրավունքի իրացման պարագայում կադաստրային արժեքը բարձրացել է եռակի` 1240 դրամի փոխարեն սահմանվել է մոտ 4000 դրամ՝ 1 քմ-ի համար:

Մանուկ Մանուկյանը ցույց է տվել այն կտրոնները, որոնցով կատարվել են վճարումները: Նախ` վճարվել է 7 մլն 800 հազար դրամ, ապա` 96 հազար դրամ: Տարածքը ձեռք բերելու համար մոտ 8 մլն դրամ են վճարել՝ Կադաստրի պետական կոմիտեից սեփականության վկայական ստանալով:

«Այդ տարածքը եղել է գյուղատնտեսական նշանակության պետական սեփականության արոտավայր: Գործառնական նպատակային նշանակությունը փոխվել է, դարձել հասարակական կառուցապատման նշանակության, մեզ հնարավորություն է տրվել բարեկարգել տարածքը: Համայնքապետարանից վերցնելով ճարտարապետաշինարարական առաջադրանք՝ մենք փնտրել ենք, գտել համապատասխան լիցենզիայով նախագծող կազմակերպություն, որի մոտ պատվիրել են նախագիծը: Մինչև նախագծի պատվիրումը մոտ 3 անգամ քննարկվել են նախագծի էսքիզները: Ավելին ասեմ, մեզ նույնիսկ թույլ չեն տվել, որ նախագիծը, էսքիզներն անենք: Քանի որ կառույցը հարակից էր ամրոցին, մի քանի անգամ շահագրգիռ քննարկումներ է անցել Քաղաքաշինության կոմիտեում: Երեք էսքիզից է վերջնական տարբերակը ընտրվել, որի վրա նախագիծ է մշակվել»,- հավելել է բանախոսը:

SHANTNEWS.am-ը հետաքրքրվել է, թե ինչ գործունեության մասին է խոսք.

«Մեկհարկանի կառույց է, ընդ որում, կանաչ տանիքով, որ համահունչ լինի ընդհանուր համայնապատկերին: Կառույցը մեջ ներառում է սանհանգույց, հուշանվերների վաճառքի կետ, թոնրատուն և դահլիճ զբոսաշրջիկների համար, որ հյուրերը գալուց նորմալ պայմաններում կարողանան նստել, օգտվել: Արագածի լանջերին ենք` 2200 մետր բարձրության վրա, որտեղ պայմանները շատ արագ փոփոխվում են՝ քամի, անձրև, կարկուտ, կայծակ, ձյուն և այլն: Խնդիրը եղել է բարեկարգ, նորմալ վիճակով ընդունել զբոսաշրջիկներին Ամբերդ: 25 տարվա մեր փորձից ելնելով՝ վստահեցնում եմ, որ այսպիսի կետի առկայությունն Ամբերդում ուղղակի անհրաժեշտություն է: Մենք այդ տարածքում, կարծես թե լինենք շտապօգնության կարգավիճակում»,- ավելացրել է Մանուկյանը:

Որոշ ժամանակ առաջ SHANTNEWS.am-ին մշակույթի նախարարության Պատմության և մշակույթի հուշարձանների պահպանության գործակալության պետ Արմեն Աբրոյանն ասել էր, որ տարածքում շինարարական աշխատանքները չեն վերսկսվի այնքան ժամանակ, քանի դեռ հնագետները ուսումնասիրություններ չեն կատարել և եզրակացություն չեն տվել: