Հիմա կարող ենք արդար ընտրություններ կազմակերպել և ընդունել սահմանադրական փոփոխություններ կամ ամբողջական Սահմանադրություն. Մարուքյան

«Շանթ» ՀԸ «Հեռանկար» հաղորդաշարի տաղավարում հաղորդավար Արամ Աբրահամյանը հարցրել է ԱԺ «Լուսավոր Հայաստան» խմբակցության ղեկավար Էդմոն Մարուքյանին, թե արդյո՞ք կա ՍԴ-ում ճգնաժամ, թե՞ ոչ: Մարուքյանը նշել է, որ ՍԴ-ն աշխատում է, հետևաբար, չկա ճգնաժամ:

«Երեկ չէ առաջին օրը Ռոբերտ Քոչարյանի գործը վարույթ չեն ընդունել, և դրա տակ ստորագրել է Հրայր Թովմասյանը: Եթե ճգնաժամ լիներ, պետք է, որ նրանք չկարողանային աշխատել: Քանի որ կարողանում են աշխատել, հետևաբար ճգնաժամ չկա»:

Իսկ ի՞նչ կփոխեր Մարուքյանը Սահմանադրության մեջ, եթե կարողանար հարցին, Մարուքյանը նշել է.

«Նախ` կանցնեինք ամբողջական խորհրդարանական համակարգի, երբ խորհրդարանն ընտրում է վարչապետին, այնուհետև վարչապետը ներկայացնում է նախարարների թեկնածուներին: Խորհրդարանի պրոֆիլային հանձնաժողովները հաստատում են վարչապետի  ներկայացրած նախարարների թեկնածուներին կամ չեն հաստատում:  Կառավարությունը ներկայացնում է բյուջեի տարեկան հաշվետվությունը, որը եթե չի ընդունվում, հրաժարական է տալիս Կառավարությունը: Խորհրդարանն ընտրում է անկախ մարմինների ղեկավարների: Օրինակ` ԱԱԾ-ն կարող է լինել կոմիտե, որի ղեկավարը ընտրվի խորհրդարանի կողմից, որևէ մեկին չենթարկվի և իշխանությունների փոփոխություններից այդ մարմինը որևէ քաղաքական ազդեցության տակ չհայտնվի: Նույնը կարելի է ասել Ոստիկանության մասին, սակայն վերջինս կարող է լինել նախարարության տեսքով, և նախարարը հաստատվի խորհրդարանական ուժերի կողմից: Խորհրդարանական ընդդիմությանը կտայի  բազմաթիվ լծակներ, որ լիներ հակակշիռ»:

Մարուքյանը նշեց, որ այն, ինչը հիմա են տալիս ընդդիմությանը՝ որպես լծակ, հեքիաթ է, պատրանք, իսկ ռեալ իրավունքները այլ են:

«Օրինակ` ընդդիմությանը կարող են տալ այնպիսի մարմիններ, որոնք ունեն վերահսկողական գործառույթ: Ռեալ տեղեր՝ ուղղակի նշանակմամբ, ասենք Հաշվեքննիչ պալատում: Այդպիսի օրինակներ շատ կան, ամենալավ պառլամենտական համակարգը  Բրիտանական համակարգն է, որտեղ գոյություն ունի Թագուհու մեծամասնության ղեկավար և Թագուհու ընդդիմության ղեկավար: Այսինքն՝ 2 էլ իշխանություն  են: Պատկերացրեք էնտեղ ինչ կլինի, եթե մի ընդդիմադիր պատգամավոր նամակ գրի ու չպատասխանեն կամ խորհրդարան չգան բյուջետային լսումների ժամանակ, ասենք տեղակալին ուղարկեն կամ հարցուպատասխանից բացակայեն»:

Արամ Աբրահամյանի այն դիտարկմանը, որ Մեծ Բրիտանիայում ընտրության կարգն էլ է այլ՝ մեծամասնական, և ամեն մի պատգամավոր հաշվետու է ընտրողներին և ոչ թե իր կուսակցության ղեկավարին, Մարուքյանը արձագանքեց.

«Հիմա մենք խորհրդարանում սկսում են լսումներ ընտրական օրենսգրքի վերաբերյալ: Ռեյտինգային համակարգը պետք է վերացվի, և մենք առաջարկել ենք բաց ռեյտինգային համակարգ, որտեղ քաղաքացին հանրապետության ամբողջ տարածքից կարող է անուն-ազգանուններից ընտրել իր համար ցանկալի թեկնածուին և ռեյտինգավորել: Այսինքն` ցուցակը մենք ինչպես էլ կազմենք, քաղաքացին կկարողանա քվեարկությամբ վերադասավորել: Բայց իշխանությունը պնդում է, որ պետք է գնալ ամբողջական համամասնական ընտրակարգի, որը նշանակում է, որ մի լիդերի ռեյտինգով՝ նրա հետևից կարող են գալ մարդիկ , որոնք այլ պարագայում որևէ կերպ չէին կարող ընտվել»:

Մարուքյանը նշեց՝ որպես առաջին անգամ մեծամասնական ընտրական համակարգով ընտրված պատգամավոր, իր համար ավելի հոգեհարազատ է ամերիկյան, բրիտանական ընտրական համակարգը, որտեղ կան փոքր տարածքներ և այդ փոքր տարածքներում՝ 15.000, 20.000 ընտրող, թեկնածուն կարող է շրջել, ամեն մեկին հանդիպել, զրուցել և վերջում ընտրողները կորոշեն, ով կլինի իրենց պատգամավորը, իրենց ուղղակի ներկայացուցիչը խորհրդարանում: