Շիրակի մարզի 4 գյուղերի 15 անօթևան ընտանիք բնակարանային փոխհատուցում կստանա

Կառավարությունն այս տարվա բնակապահովման ծրագրով Շիրակի մարզում բնակարանի գնման վկայագիր կտրամադրի 4 գյուղերի 15 անօթևան ընտանիքների, որոնք բնակարանի շահառու են ճանաչվել 2012 և 2013 թվականներին:

Գործադիրն ընտրել է այն գյուղերը, որտեղ անօթևան ընտանիքների թիվը չի գերազանցում 10-ը: Հատկացված 75 մլն դրամով 4 գյուղերում` Ախուրյանում, Գետքում, Հացիկում և Քեթիում, այլևս երկրաշարժից անօթևաններ չեն մնա: Բայց չի նշանակում, թե գյուղերում անօթևանության խնդիրը կվերանա: Ընդհանուր Շիրակի մարզի գյուղերում 163 անօթևան ընտանիք է հաշվառված, որոնց բնակարանային հարցի լուծումը նախատեսված է 2020 թվականին:

Երկրաշարժին Շիրակի մարզի շատ գյուղերում բնակֆոնդը դարձավ վթարային: Ընտանիքներ էլ եղան, որ արմատներով գյուղերից էին, Գյումրիում տուն կորցնելուց հետո տնակներ տեղադրեցին գյուղերում: Այսպես գյուղական բնակավայրերում ձևավորվեցին անօթևանի կարգավիճակ ունեցողները: Օրինակը Խաչատրյանների ընտանիքն է: Վթարային տան կողքին տնակ են տեղադրել, որտեղ ապրում են արդեն 30 տարի: Տնակն էլ է արդեն փլուզվել:

Խաչատրյանները և Հացիկում ևս 5 ընտանիք փոխհատուցում են ստանալու: 2012-2013 թվականներին է գյուղերում անօթևանների հաշվառում կատարվել: Այդ ժամանակ Հացիկում 30 ընտանիք էր կարիքավոր ճանաչվել, բայց քաղաքաշինության նախարարությունը շահառու է համարել ընդամենը 6-ին:

«30 ընտանիք ունի բնակարանի կարիք, շահառու է ճանաչվել 6-ը: Ես ընտանիքների մեջ էական տարբերություններ չեմ տեսնում: Արդար կլիներ` բոլոր 30-ն էլ օգտվեին նույն ծրագրից: Այլապես գյուղում սոցիալական արդարությունը կասկածի տակ կդրվի»,- SHANTNEWS.am-ին ասել է Հացիկ գյուղի վարչական ղեկավար Հրաչյա Նահապետյանը:

Իսկ բնակարանի գնման վկայագրի հաշվարկը կորցրած բնակմակերեսով ու կադաստրային արժեքով է: 1,2,3 և 4 սենյականոցների վկայագրերի արժեքները հաստատված են ու հաշվարկված առաջին եռամսյակի կադաստրային արժեքներով: Գումարը, ինչպես միշտ, կառավարության հաշվարկներով բավարար է, իսկ գյուղացիները վստահ չեն, որ կբավականացնի:

«1 սենյակի համար հատկացվող վկայագրի արժեքը կազմում է 3 մլն 548 250 դրամ, 2 սենյակինը՝ 4 մլն 336 750 դրամ, 3 սենյակինը՝ 5 մլն 125 250 դրամ և 4 սենյակինը՝ 5 մլն 913 750 դրամ: Բայց դժգոհությունները շատ են: Ասում են` չենք կարող տուն ձեռք բերել: Փաստորեն, ըստ մեր շահառուների, գյուղերում ավելի թանկ են բնակարանները, քան Գյումրիում»,- SHANTNEWS.am-ի հետ զրույցում ասել է Շիրակի մարզպետարանի բնակարանային և ենթակառուցվածքների գործունեության բաժնի պետ Տիգրան Հարությունյանը:

Բնակարանի գնման վկայագրերը նպատակային օգտագործելու համար Շիրակի մարզի 4 գյուղերի 15 անօթևան ընտանիքները ժամանակ ունեն մինչև դեկտեմբերի 20-ը: Վկայագրերի տրամադրման ու մարման կարգն անփոփոխ է՝ եթե չկարողացան բնակարան գնել, վկայագիրը մարվում է, իսկ անօթևան ընտանիքը նորից մնալու է հերթացուցակում ու սպասելու այլ ծրագրերի: