Զինապարտների որոշակի խմբի տարկետում տալու կարգն ու պայմանները կփոխվեն

Կառավարությունն այսօր փոփոխություններ կատարեց Գիտության և կրթության բնագավառներում նշանակալի նվաճումներ ունեցող քաղաքացիներին պարտադիր զինվորական ծառայության զորակոչից տարկետում տալու կարգը և պայմանները սահմանելու որոշման մեջ։

Ըստ այդմ՝

հստակեցվել են քաղաքացիների կողմից դիմումներ ներկայացնելու ժամկետները:

ՄՈԳ-ի շեմը սահմանվել է ՄՈԳ-ի առավելագույն արժեքի առնվազն 80 տոկոսը:

Հանձնաժողովի հետ անցկացվող հարցազրույցի (E 5) փուլը հանվել է, քանի որ հստակ, չափելի չափանիշներ սահմանված չէին այդ փուլի համար, որոնք հնարավորություն կտային օբյեկտիվ գնահատելու հարցազրույցի արդյունքները:

Պահանջվող փաստաթղթերի ցանկից հանվել է դիմում ներկայացրած քաղաքացու մոտիվացիոն նամակի, գիտական և գիտատեխնիկական գործունեության տվյալ բնագավառի երկու ներկայացուցիչների երաշխավորագրերի պահանջը։

Տարկետման իրավունք տալու սահմանային արժեքները՝ նշանակալի նվաճումների հաշվարկման 100 բալային առավելագույն միավորների սահմանաչափը՝ 80 միավոր՝ նկատի ունենալով, որ հարցազրույցի փուլը հանվել է և նախատեսված չափորոշչի համար սահմանված 20 բալային միավորը պակասել է:

Հստակեցվել են միջին որակավորման գնահատականը և ներդրվել է դրա հաշվարկման բանաձև, ինչի արդյունքում տարկետման իրավունքի հավակնություն ձեռք բերելու շեմը մագիստրոսի կրթական ծրագրի դեպքում` 60 միավորի փոխարեն սահմանվել է 49, իսկ ասպիրանտական կրթական ծրագրի դեպքում՝ 65-ի փոխարեն 51 բալային միավոր:

Համապատասխան փոփոխություններ են կատարվել նաև նշանակալի նվաճումների ցուցանիշների հաշվարկման մեթոդաբանության մեջ:

Նախատեսվել է միջին որակավորման գնահատականի հաշվարկման հստակ բանաձև:

ՀՀ վարչապետ Նիկոլ Փաշինյանը նշեց՝ սրանով սուբյեկտիվիզմի գործոնը կա´մ վերանում է, կա´մ նվազագույնի է հասցվում:

ՀՀ կրթության, գիտության, մշակույթի և սպորտի նախարար Արայիկ Հարությունյանը նշեց, որ այստեղ հանձնաժողովն առավելագույնս օբյեկտիվ է եղել, բայց քանի որ հանձնաժողով է, եթե ոչ սուբյեկտիվություն, առնվազն սուբյեկտիվության մեղադրանք կարող է լինել:

Վարչապետն արձագանքեց.

«Մյուս կողմից էլ՝ հարցազրույցի արդյունքում միավորներ կարելի է ստանալ, որով հաղթահարել մյուս շեմերը կամ որոշակի բալանս խախտել: Կարծում եմ՝ ճիշտ որոշում է, հանձնաժողովի կամ նախարարության գործը տեխնիկական է դառնում, ամեն մարդ ինքն է հետագա անելիքի մասին որոշում կայացնում: Սա կարևոր առաջընթաց է և կարևոր փոփոխություն»:

Հարությունյանը տեղեկացրեց, որ 2020-ին ևս մեկ քննարկում կունենան, որոշակի ադապտացիոն փուլ է արդեն, որոշակի պարամետրեր պետք է փոփոխության ենթարկվեն մյուս զորակոչից առաջ: Վարչապետը նկատեց՝ կարևոր է, որ այդ փոփոխությունները լուսաբանվեն, որպեսզի տպավորություն չստեղծվի, թե դրանք վերջին պահին են արվում:

ՀՀ պաշտպանության նախարար Դավիթ Տոնոյանը խնդրեց ուշադրություն դարձնել՝ կառավարության որոշմամբ սահմանում են, որ տարկետում է տրվում անձին մինչև 18 տարեկանը լրանալը, ինչն օրենքի հետ որոշակի հակասություն ունի: Այստեղ, ըստ Տոնոյանի, խնդիրը ոչ միայն անձնագրերի հետ է կապված՝ արտերկիր մեկնելու, խոսքն ավելի շատ բուժփորձաքննության մասին է. զինապարտները բուժփորձաքննություն են անցնում 18-ում, այսինքն՝ 18-ը լրանալուց հետո պետք է վերադառնան, փորձաքննությունն անցնեն, տարկետում ստանան, նորից մեկնեն: