Ինձ ամեն անգամ զարմացնում է, որ հարցը գալիս, հասնում է կառավարության նիստ, պարզվում է՝ ինչ-որ օղակ չի քննարկել. Փաշինյան

Կառավարությունն այսօրվա նիստում հաստատեց հակակոռուպցիոն ռազմավարությունը և դրա իրականացման 2019-2022 թվականների միջոցառումների ծրագիրը։

Կոռուպցիայի դեմ պայքարի ոլորտում ՀՀ Կառավարության հռչակած հայեցակարգային կանխադրույթների ու սկզբունքների հետևողական կենսագործման նպատակով Հակակոռուպցիոն ռազմավարությունն ուղղված է լինելու պայքարն առավել նպատակային իրականացնելու համար անհրաժեշտ ինստիտուցիոնալ հենքերի ստեղծմանը և զարգացմանը, հանրային ծառայողի օրինավոր և բարեխիղճ կերպարի ձևավորմանը, ոլորտային օրենսդրական դաշտի կարգավորումներում երկակի մոտեցումներ կիրառելու հնարավորությունների հնարավորինս նվազեցման, թափանցիկության և մասնակցայնության գործիքների շարունակական ներդրմանը, կոռուպցիոն գործերի բացահայտման արդյունավետության բարձրացմանը, ապօրինի ծագում ունեցող գույքի բռնագանձմանն առնչվող գործուն կառուցակարգերի ներդրմանը:

Միաժամանակ, Ռազմավարությամբ հատուկ անդրադարձ է հակակոռուպցիոն կրթությանը և իրազեկման միջոցով կոռուպցիայի նկատմամբ ժխտողական վերաբերմունքի սերմանմանը:

Ռազմավարությամբ հատուկ կարևորվում է կոռուպցիայի դեմ պայքարում բոլոր շահագրգիռ կողմերի ջանքերի մեկտեղումը և միասնական հետևողական քայլերի ձեռնարկումը:

ՀՀ վարչապետ Նիկոլ Փաշինյանը նշեց՝ այս հարցում քննարկումներ են ունեցել, նպատակն էր վերջնականացնել մտահոգությունները և մտավախությունները: Վարչապետը շեշտեց՝ աշխարհում իդեալական լուծումներ չկան, ինքը գոնե իր համար բոլոր հարցերի պատասխանը ստացավ: Նա նշեց՝ կարծիք կար, որ արդյունավետ է, երբ քննչական մարմինն ու օպերատիվ բլոկը նույն մարմնի ներսում են, կային նաև տրամագծորեն այլ կարծիքներ:

«ես հասկանում եմ, որ ցանկացած փոփոխություն մեզ մոտ վախեր է առաջացնում, բայց եկեք առանց վախերի առաջ գնանք»,- ասաց նա:

ՀՀ ԿԱ ՊԵԿ նախագահ Դավիթ Անանյանը, դիմելով վարչապետին, նշեց՝ ՊԵԿ-ը հնարավորություն չի ունեցել ավելի համապարփակ տեսակետ ներկայացնելու, առաջարկեց հնարավորություն տալ ավելի խորը վերլուծություն ներկայացնելու, որ հարկային հսկողության շրջանակներում քննչական վարչություն չունենալու հանգամանքը որևէ ձևով չվտանգվի:

ՊԵԿ նախագահի խոսքին վարչապետն արձագանքեց.

«Ինձ ամեն անգամ զարմացնում է, որ հարցը գալիս է, հասնում կառավարության նիստ, պարզվում է՝ ինչ-որ օղակ չի քննարկել: Իմ մասնակցությամբ առնվազն երեք-չորս քննարկում է եղել այս թեմայով: Ի վերջո, այս փաստաթուղթը շրջանառվել է, չէ՞, գաղտնի չի պահվել: Ամեն անգամ գալ, կառավարության նիստում ասել՝ վայ, չենք քննարկել, ճիշտ մոտեցում չէ: Այս տրամաբանությամբ մենք անընդհատ տեղում կդոփենք, կասենք՝ վայ, չենք քննարկել, եկեք՝ մի ամիս հետո նոր լուծում տանք, այդ ընթացքում կպարզվի՝ բովանդակությանը էլի մի օղակ չի ծանոթացել, էլի մի ամիս կպահանջվի»:

Վարչապետը շեշտեց՝ սա քաղաքական հարց է, և քաղաքական որոշումը կայացված է: Նա նշեց՝ երբ հաջորդ պահին պարզվի, որ ինչ-որ փաստարկ կա, որն իրենք հաշվի չեն առել, և այն փոխում է իրենց պատկերացումն իրավիճակի մասին, հաշվի կառնեն:

«Ես խնդրում եմ անընդհատ նույն կետից մեկ քայլ առաջ, երկու քայլ հետ ճանապարհով չգնանք»,- ասաց Փաշինյանը՝ նշելով, որ ամեն ինչ ունի իր ժամկետը, չի կարելի հարցերի լուծման ժամկետն անընդհատ ձգտել:

Կառավարության ղեկավարը նկատեց՝ իրականում սա քննարկման ավարտ չէ, այլ մեկնարկ: