Անի համայնքի ղեկավարը չի ընդունում իրեն առաջադրված մեղադրանքները

Ոստիկանության կոռուպցիայի և տնտեսական գործունեության դեմ ուղղված հանցագործությունների հակազդման վարչության օպերատիվ և ծավալուն միջացառումների արդյունքում բացահայտվել է Անի խոշորացված համայնքի ղեկավարի թույլ տրված մի շարք ապօրինություններ: Նախապատրաստված նյութերով հարուցվել է քրեական գործ, տարվում է նախաքննություն: Այս մասին հաղորդագրութւոն է տարածել ոստիկանությունը.

«Ըստ Ոստիկանության տեղեկությունների՝ համայնքապետարանի հավաքարարների աշխատավարձի բանկային քարտերը պահվել են աշխատակազմի ղեկավարի մոտ, որն ամեն ամիս կանխիկացրել ու հավաքարարներին առձեռն վճարել է 35 հազար դրամ, իսկ գումարի մյուս մասը՝ 40 հազար դրամները, փոխանցել է համայնքի ղեկավարին։ 2018 թվականի ընթացքում բանկային քարտերը տրամադրել են հավաքարարներին՝ հայտնելով՝ իբր աշխատավարձը բարձրացել է։

Պարզվել է նաև, որ համայնքի ղեկավարն իր հարազատին հրամանագրել է փոխքաղաքապետի պաշտոնում։ Նա աշխատանքի չի ներկայացել, գտնվել է Ռուսաստանի Դաշնությունում, իսկ աշխատավարձը յուրացման կամ վատնման եղանակով հափշտակվել է։ Պարզվել է, որ համայնքի ղեկավարն ամբողջովին քանդել է Մարալիկ քաղաքում կառուցվող դպրոցն ու շինանյութը վաճառել մի գյումրեցու։ Նա համայնքի գերեզմանատունը ցանկապատելու պատրվակով համայնքապետարանի բյուջեից դուրս է գրել 3 միլիոն դրամ, սակայն ցանկապատը չի կառուցվել, իսկ փողը յուրացվել է։ Բացի այդ, համայնքի ղեկավարը ՌԴ մի քաղաքացու, որպես սոցիալապես անապահով ընտանիքի, հատկացրել է բնակարան։ Քաղաքացին տունը վաճառել է՝ փողը փոխանցել համայնքապետին։ Յուրացրել է նաև 2014-2017 թվականների ընթացքում համայնքի բյուջեից սոցիալապես անապահով ընտանիքներին որպես օգնություն դուրս գրված գումարները, իսկ 2012 թվականին ապամոնտաժել և վաճառել է համայնքի տարածքի 30 սմ տրամագծով, 280 մետր երկարությամբ ոռոգման երկաթյա խողովակներն ու գումարը յուրացրել։ Նախապատրաստված նյութերով հարուցվել է քրեական գործ։ Քննությունը շարունակվում է»,- ասված է հաղորդագրությունում:

Անի համայնքի ղեկավար Արտակ Գևորգյանն իրեն առաջադրված մեղադրանքը չի ընդունում: Այս մասին նա ասել է SHANTNEWS-ի հետ զրույցում.

«Ես դրանց բոլորին վերաբերում եմ անհիմն: Դրանց մեջ ոչ մի իրականության նշույլ գոյություն չունի: Ես աշխատել եմ, ունեմ ժողովրդի վստահության քվեն, վայելում եմ ժողովրդի վստահությունը: Գործողություններ են, որոնք կատարվում են: Դրանք ընդամենը իրավական տերմինալոգիա են, իրավական գործընթացներ են: Ես մեղադրանքները համարում են անհիմն»,- SHANTNEWS-ին ասել է Արտակ Գևորգյանը:

Հիշեցնենք, որ ավելի վաղ Անի համայնքի ղեկավար Արտակ Գևորգյանին մեղադրանք էր առաջադրվել քրեական օրենսգրքի 179-րդ հոդվածի 2-րդ մասի 1-ին և 3-րդ կետերով, 314-րդ հոդվածի 1-ին մասով: Արտակ Գևորգյանը մեղադրվում է պաշտոնական կեղծիք թույլ տալու մեջ:

Սեպտեմբերի 18-ին նախկին Մարալիկ, ներկայումս Անի խոշորացված համայնքի ղեկավարը գործով ներգրավվել էր որպես մեղադրյալ: Նրա նկատմամբ որպես խափանման միջոց էր ընտրվել ստորագրություն չհեռանալու մասին: