Շիրակի մարզի Ջրաձոր գյուղի տեղահանման հարցը դարձյալ օրակարգում է

Հաջորդ տարվա բյուջեից 3 մլրդ դրամ է նախատեսվում Շիրակի, Լոռու և Արագածոտնի մարզերի գյուղական բնակավայրերի շահառու ճանաչված անօթևան ընտանիքների բնակարանային խնդրի լուծման համար։

Ընտանիքներից 148-ը Շիրակի մարզի 9 գյուղերից են։ Առաջին անգամ հաշվի է առնվելու շահառուի ընտրությունը, հարցում է կատարվել՝ բնակարանների գնման վկայագի՞ր, թե՞ բնակարան կառուցելու համար ֆինանսական աջակցություն են ուզում: Նշենք, որ անօթևանների ամենամեծ թիվը Շիրակի մարզում Ջրաձոր գյուղն ունի:

Ինչպես հայտնի է, Կապսի ջրամբարի կառուցման համար գյուղը տեղափոխվելու է այլ տարածք, նոր տներ են կառուցվելու: Առայժմ հստակեցված չէ, թե երկրաշարժի հետևանքով անօթևան ճանաչված ընտանիքների բնակարանային խնդիրն ինչպե՞ս է լուծվելու՝ ամբողջ գյուղի վերաբնակեցման ծրագրի համատեքստո՞ւմ, թե՞ առանձին ծրագրով:

Գյումրիից մոտ 20 կմ հեռավորության վրա, Ջրաձոր գյուղ չհասած, այս տարածքն է առանձնացվել նոր Ջրաձոր կառուցելու համար: Գյուղի վարչական ղեկավար Գևորգ Հովակյանն ապագա գյուղի նոր տարածքն է ցույց տալիս, 15 տնտեսության պատկանող վարելահողերի վրա նոր տներ ու այլ ենթակառուցվածքներ են լինելու: Համայնքապետարանն այդ նպատակով 40 հա տարածք է հատկացրել:

Կապսի ջրամբարի կառուցման ծրագիրն ավելի քան 60 տարի է՝ հետաձգվում է, գյուղի տեղափոխման հարցը՝ նույնպես: Նոր գյուղի կառուցման համար մի քանի անգամ տարածքներ են հատկացվել, շինություններ կառուցվել, բայց ամեն ինչ կիսատ է մնացել, գյուղն էլ դեռ իր տեղում է:

Այն, ինչ կառուցվել է Ջրաձորում 100 տարի առաջ, այդպես էլ մնացել է, բնակարանները սեփականաշնորհված չեն, վերակառուցումներ տներում արգելել են: Ջրաձորում անվնաս ու բնակության համար անվտանգ տուն գյուղում չես գտնի: Տներ կան, որ տասնյակ տարիներ առաստաղները հենակների վրա են պահվում, ճաքերն անընդհատ ավելանում են, ու գյուղացիներն անկարող են որևէ միջոց ձեռնարկել:

Գյուղի բնակիչների մի մասն այս տարիների ընթացքում լքել է վթարային տները, ոմանք էլ տնակներում են ապրում: Հիմա Ջրաձորում 31 ընտանիք բնակարանի շահառու է երկրաշարժի հետևանքով ու փոխհատուցման է սպասում: Բայց ջրամբարի կառուցումը դարձյալ օրակարգում հայտնվելը, հավանաբար, փոխելու է ընտանիքների բնակապահովման ծրագրի ընթացքը:

Շիրակի մարզպետարանի քաղաքաշինության վարչության պետ Ալբերտ Մարգարյանի խոսքերով՝ առաջարկ են ներկայացրել կառավարություն, որպեսզի անօթևանի կարգավիճակ ունեցող 31 ընտանիքների հարցն էլ քննարկվի ջրամբարի կառուցման համատեքստում, այսինքն՝ գյուղաբնակ 74 ընտանիքներից 43-ի համար, այսպես թե այնպես, պետությունն է տները կառուցելու, պատասխանատուները կողմ են, որ շահառու 31 ընտանիքների համար էլ պետությունը տներ կառուցի և ոչ թե նրանց շինարարության գումար տան, կամ բնակարանների գնման վկայագրեր:

Բայց ամեն դեպքում, մարզի մյուս գյուղական համայնքների նման, Ջրաձորի բնակիչների շրջանում ևս հարցում է արվել՝ բնակարանների գնման վկայագիր են ուզում, թե տուն կառուցելու համար գումար: 27 ընտանիք շինարարություն է նախընտրել:

Բայց շինարարությանը համաձայն են, եթե պետությունը կառուցի իրենց տները: Վկայագիր, թե նոր տան կառուցում… երկու տարբերակներից ջրաձորցիները թեև իրենց ընտրությունն արել են, բայց հստակեցված չի մնում հետևյալ հարցը՝ տները բնակիչներն են կառուցելու հատկացված գումարով, թե պետությունը: Սա հաջորդ տարի պարզ կդառնա, երբ սկսվի Կապսի ջրամբարի շինարարությունը, որը նախատեսվում է 6-7 տարում ավարտել, այսինքն՝ այս ժամկետներից է կախված նաև նոր բնակավայրի կառուցումը:

Մարզի մյուս գյուղերի 148 շահառուներից 90-ն էլ նախընտրել է վկայագիր, մյուսները՝ տուն կառուցելու համար ֆինանսական աջակցություն: Շահառու գյուղերում վաճառքի բնակարաններ չկան, բայց և ծրագիրը չի արգելում այլ բնակավայրերում տուն գնել:

Ալբերտ Մարգարյանի խոսքերով՝ հանրապետության մյուս բնակավայրերում վաճառքի բնակարաններ կան, թե ոչ, նման ուսումնասիրություն թեև չի արվել, բայց վկայագրի ծրագիրն ապացուցել է, որ դրանք իրացվում են, նշանակում է՝ շուկայում վաճառվող բնակարաններ կան: Ինչպես նախորդ տարիներին, այս անգամ էլ, եթե ընտանիքը սահմանված ժամկետում չիրացնի վկայագիրը, այսինքն՝ բնակարան չգնի, վկայագիրը կմարվի, ընտանիքն էլ շահառու այլևս չի համարվի: