Թրամփի իմփիչմենթը, փոխված ցուցմունքներն ու կոնգրեսականների արձագանքը

Թրամփի իմփիչմենթի գործում առանցքային վկա, Եվրամիությունում ԱՄՆ դեսպան Գորդոն Սոնդլենդը հանկարծակի փոխել է ցուցմունքը և հայտարարել, որ Վաշինգտոնը Ուկրաինային խոստացել է վերսկսել 391 մլն դոլար արժողությամբ ռազմական օգնությունը, եթե Ուկրաինայի ղեկավարությունը համաձայնի ԱՄՆ նախկին փոխնախագահ Ջո Բայդենի և նրա որդու գործունեության հարցով հետաքննություն սկսել:

ԵՄ-ում ԱՄՆ դեսպան Գորդոն Սոնդլենդը առաջին անգամ կոնգրեսում ցուցմունք տվել էր հոկտեմբերի 3-ին: Այն ժամանակ նա հերքել էր բոլոր այն մեղադրանքները, թե Սպիտակ տունը Վլադիմիր Զելենսկուն, այսպես ասած, ծառայությունը ծառայության դիմաց գործարք է առաջարկել: Նա այն մարդն է, ով համարվում է գլխավոր խաղացողը Սպիտակ տան ու Ուկրաինայի գաղտնի բանակցություններում: Եվ նա հոկտեմբերի 3-ին մի քանի ժամ ցուցմունք էր տվել Կոնգրեսում՝ պատասխանելով բազմաթիվ հարցերի: Նա միանշանակ պնդել էր, որ Սպիտակ տունը ոչ մի անգամ Ուկրաինային ռազմական օգնություն տրամադրելու հարցը չի կապել ԱՄՆ փոխնախագահ Ջո Բայդենի և նրա որդու գործի քննության հետ:

Բայց ամեն ինչ փոխվեց, երբ նախորդ շաբաթվա վերջին դեմոկրատները հայտարարեցին, որ պատրաստ են հրապարակել նախկին ու ներկա չինովնիկների լսումների վերծանումները, այդ թվում՝ ԵՄ-ում ԱՄՆ դեսպանի խոսքը: Երկուշաբթի ցերեկը դեսպան Գորդոն Սոնդլենդը հանկարծ հայտարարեց, որ ցանկանում է փոփոխել իր տված ցուցմունքները և Կոնգրես ուղարկեց իր նախորդ ելույթի բազմաթիվ ուղղումներ: Վերլուծաբանների կարծիքով՝ դրա պատճառը մյուս վկաների ցուցմունքներն են, որոնցում նրանք հետևողականորեն հերքել էին Սոնդլենդի ցուցմունքները: Այդ հակասությունները այնքան ակնհայտ էին, որ Կոնգրեսում դեմոկրատները հայտարարեցին, որ հնարավոր է պաշտոնապես մեղադրեն դիվանագետին սուտ ցուցմունք տալու համար: Դիվանագետը դրանից հետո որոշեց որոշակի ուղղումներ անել, բայց, ինչպես ասում են, հիշողության շատ կտրուկ թարմացում տեղին ունեցավ:

Այդ առիթով՝ Կոնգրեսի հետախուզության հարցով կոմիտեի ղեկավար Ադամ Շիֆը իր թվիթերյան էջում գրել է.

«Սոնդլենդի և Վոլքերի ցուցմունքները ցույց են տալիս, թե ինչպես են իր անձնական քաղաքական նպատակների համար Ուկրաինային ծառայեցնելուն ուղղված Թրամփի ջանքերը զարգանում, ինչը Սոնդլենդը շարունակական նենգություն է անվանել»:

Սոնդլենդն իր ցուցմունքի նոր տարբերակում նա նշել է, թե ծառայությունը ծառայության դիմաց սկզբունքը ընդհանրապես առանցքային է եղել ուկրաինական իշխանությունների հետ բանակցություններում: Նրա խոսքերով՝ անձամբ ինքն է հայտնել Կիևի բարձրաստիճան չինովնիկին, որ Վաշինգտոնը, ամենայն հավանականությամբ, չի վերսկսի ռազմական օգնության տրամադրումը այնքան ժամանակ, քանի դեռ Կիևը չի համաձայնի հայտարարել ԱՄՆ նախագահի քաղաքական հակառակորդների նկատմամբ հետաքննության վերսկսման մասին: Նա այդ մասին ասել է Ուկրաինայի նախագահի խորհրդական Անդրեյ Երմակին.

«Ես այժմ հիշում եմ, որ խոսել եմ անձամբ պարոն Երմակի հետ և ասել, որ ամենայն հավանականությամբ՝ ԱՄՆ-ն չի վերսկսի օգնության տրամադրումը, քանի դեռ Ուկրաինան հանդես չի եկել հակակոռուպցիոն հայտարարությամբ, որը մենք քննարկել ենք շաբաթների ընթացքում»:

Սոնդլենդի փաստաթղթի համաձայն՝ ռազմական օգնության կասեցման մասին իր մտահոգությունը Ուկրաինայի նախագահ Վլադիմիր Զելենսկին հայտնել է ԱՄՆ փոխնախագահ Մայք Փենսին այս տարվա սեպտեմբերին Վարշավայում: Սոնդլանդի և Ուոքերի հարցաքննությունը ցույց է տալիս, որ Թրամփը օգտագործել է Սպիտակ տան հանդիպումն ու ռազմական օգնությունը՝ ճնշում գործադրելու Ուկրաինայի վրա հրապարակայնորեն հայտարարելու քաղաքական հետաքննությունների մասին:

«Ճնշման գործադրումը մեր ազգային անվտանգության հաշվին է: Դա ժամանակի ընթացքում ավելի նենգ է դարձել»:

Վոլքերը, որի մասին հիշատակում է Ադամ Շիֆը, Ուկրաինայում ԱՄՆ նախկին ներկայացուցիչն է: Սոնդլենդի առաջին ցուցմունքն էր, որ Թրամփի պաշտպանական թիմի համար կարևոր դեր էր խաղում: Թե՛ Սպիտակ տանը, թե՛ Կոնգրեսում հանրապետականների շրջանում հենց նրա խոսքի վրա էին կառուցում հիմնական պաշտպանությունը, ուստի, ցուցմունքի փոփոխությունից հետո վերլուծաբանները Վաշինգտոնում համարել են ամենաուժեղ հարվածը Թրամփի պաշտպանությանը: Սպիտակ տունն արձագանքել է, բայց շեշտելով նրա խոսքի մեկ այլ հատվածը, թե Սոնդլենդլը նշել է, որ չգիտի, թե այդ օգնության տրամադրումը ինչու է դադարեցվել, երևի պատճառ եղել է, բայց չի կարող որևէ կոնկրետ աղբյուրի նշել: Սրան հղում անելով՝ Սպիտակ տունը նշել է, թե փաստորեն ծառայություն ծառայության դիմաց սկզբունքի մասին խոսք լինել չի կարող: