Գյումրու չբնակեցված տնակները կապամոնտաժվեն. կառավարությունը որոշում է պատրաստում

Գյումրիի չբնակեցված տնակները կապամոնտաժվեն: Այս մասին կառավարության որոշման նախագիծ է պատրաստվում: Դատարկ տնակների թիվը Գյումրիում 586-ն է, որոնց բնակիչները հանրապետությունում չեն 10 տարուց ավելի:

Մինչ այս, չբնակեցված ժամանակավոր կացարանների ապամոնտաժման իրավունք քաղաքապետարանը չի ունեցել: Տնակների հաշվառման աշխատանքային խմբին առաջարկը ներկայացրել է «Շիրակ կենտրոնը» : Այն հավանության է արժանացել, և գործադիրը տնակների ապամոնտաժման իրավական հիմքերն ամրագրելու է հատուկ որոշմամբ: Այս ընթացքում Գյումրու տնակների թիվը մոտ 20-ով պակասել է բարեգործական ծրագրերով հատկացված բնակարանների հաշվին:

3 բանվորով, առանց տեխնիկայի օգնության, ձեռքի ուժով քանդեցին 31 տարվա տնակի պատը: Բնակիչները օրեր առաջ են նոր տուն տեղափոխվել: Բնակարանը բարերարներից նվեր է եղել ընտանիքին: Պարտադիր պահանջը՝ տնակի ապամոնտաժումն է: Տանտերերի հեռանալուց հետո տարածքը հանձնվել է բանվորներին: Քանդելուց էլ տեսակավորում են 31 տարվա  տնակի տախտակներն ու թիթեղյա կոնստրուկցիաները:

«Շիրակ կենտրոն» հասարակական կազմակերպությունն այս գործընթացում միջնորդի դեր է կատարում: Սա այս տարվա ընթացքում Գյումրիում 16-րդ տնակն է, որ ապամոնտաժում են: Սա «Շիրակ կենտրոն»-ի նոր ծրագիրն է, որով Գյումրին չբնակեցված տնակներից է ազատում: Դատարկ տնակները ձեռք է բերում, ապամոնտաժում ու վերածում վառելափայտի: Վահան Թումասյանը տնակների հաշվառման ստեղծված աշխատանքային խմբի անդամ է նաև: Նույն առաջարկը հանձնաժողովականներին է ներկայացրել ՝ Գյումրիում դատարկ տնակները ապամոնտաժել հնարավոր է, եթե օրենսդրական կարգավորումներ կառավարությունն ընդունի:

«Ես ինֆորմացիա ունեմ, որ արդեն ավարտվում է: Ամբողջ իրավական փաթեթները կառավարությունը պատրաստել է: Հիմա մնում է՝ կառավարությունը համապատասխան որոշումը կայացնի, հանձնարարական արվի համայնքի ղեկավարին, և սկսեն դատարկ տնակներից քաղաքը մաքրել: Տասնյակ տնակներ վարձով են տրված, կամ տերերը բնակարան ստացել ու տնակը չեն քանդել»,- SHANTNEWS-ին ասել է «Շիրակ կենտրոն» ՀԿ-ի նախագահ Վահան Թումասյանը:

Տնակների ապամոնտաժման քաղաքապետարանի հանձնաժողովը վերջին մեկ ամսում ընդամենը 4 տնակ է ապամոնտաժել: Բոլորը Մուշ 2 /2 թաղամասի բնակիչներն են: Բնակարանները հիմա են որոշել սեփականաշնորհել, իսկ դրա համար ժամանակավոր կացարանի ապամոնտաժումը պարտադիր է: Այլ օրենսդրական կարգավորում, որը բնակարան ստացած բնակչին կպարտադրի հրաժարվել տնակից, առայժմ չկա:

«Վերջին մեկ ամսում 3-4 տնակ ենք ապամոնտաժել: 2010-ին Մուշ 2/2 թաղամասում շահագործված 1056 բնակարաններից 101-ը սեփականաշնորհված չէ, 30-ը տնակի ապամոնտաժման խնդիր ունի: Եվս 116 տնակ ապամոնտաժված չէ՝ 2012-ին հանձնված 1756 բնակարաններից: Կարմիր խաչի, «Լինսի» հիմնադրամի և Հանթսմանի հիմնադրամի միջոցներով 2000-2004 թվականներին կառուցված շենքներից տուն ստացածներից 33-ը տնակները չեն ապամոնտաժել: 20 տարի առաջ են բնակարաններ ստացել, բայց տնակները դեռ կան»,- SHANTNEWS-ի հետ զրույցում նշել է Գյումրու քաղաքապետարանի անշարժ գույքի կառավարման բաժնի գլխավոր մասնագետ Մկրտիչ Դավթյանը:

Վերջին հաշվառումից հետո Գյումրիում 2818-ից ավելի տնակ կա: Ընտանիքներից ոչ մեկի նկատմամբ բնակարանային պարտավորություն պետությունը չունի, ըստ էության չունի, քանի որ տնակում ապրող 2818 ընտանիքները անօթևանի կարգավիճակ չունեն: Այսինքն՝ Գյումրին տնակներից ազատելու տարբերակները մի քանիսը պետք է լինեն՝ կախված տնակներում ապրող ընտանիքների կարգավիճակներից ու բնակարանային պատմություններից: