Շիրակի մարզի ջրամբարները ձմեռացման են գնացել ջրի շատ քիչ պաշարով

Շիրակի մարզում անցնող գյուղատնտեսական տարին անհաջող էր: Նախ` մի քանի անգամ ցանքերը տուժեցին կարկտահարությունից, որին հաջորդեց երաշտը: Ամբողջ ամռան ընթացքում տեղումները քիչ էին, իսկ աշնանն ընդհանրապես չեղան: Դրա հետևանքով մարզի ջրամբարներում կուտակված ջուրը շատ արագ սպառվեց: Մասնավորապես, Արթիկի տարածաշրջանում ոռոգման սեզոնը ժամանակից շուտ է փակվել, որովհետև Վարդաքարի ջրամբարում ամռանը մնացել էր մեռյալ ծավալի ջուր: Աշնան ընթացքում էլ ջրօգտագործող ընկերությունը ջուր չի կարողացել կուտակել, և հիմա Շիրակի մարզի ջրամբարները գնացել են ձմեռացման ջրի շատ քիչ պաշարներով:

Ջրի նվազագույն կամ մեռյալ ծավալ… Սա այն քանակությունն է, որն անհրաժեշտ է ջրամբարներում կենսաբազմազանությունը պահպանելու համար: Այս տարի այդ նվազագույն ծավալին Շիրակի մարզի 2՝ Վարդաքարի ու Սառնաղբյուրի ջրամբարները շուտ են հասել, ինչի պատճառով էլ ոռոգման սեզոնը ժամանակից շուտ են ավարտել:

Արթիկի տարածաշրջանի գյուղերում կարտոֆիլը ու աշնանացանը չեն հասցրել ջրել: Ցածրադիր գյուղերին ամբողջ ամռան ընթացքում ընդամենը երկու անգամ է ոռոգման ջուր հասել: Վարդաքարի ջրամբարի տարողությունը 7 մլն խորանարդ մետր է: Այժմ այստեղ ընդամենը 430 հազար խորանարդ մետր ջուր կա: Սա մեռյալ ծավալից շատ քիչ՝ ընդամենը 130 հազարով է ավելի:

Նույն վիճակը նաև Սառնաղբյուրի ջրամբարում է: 6 մլն խորանարդ մետր տարողություն ունեցող ջրամբարը ձմեռացման է գնացել 390 հազար խորանարդ մետրով: Նախորդ տարիներին այս ջրամբարներում սեզոնի ավարտին ավելի շատ ջուր էր մնում:

«Ջրի խիստ պակաս ունենք Վարդաքարի և Սառնաղբյուրի ջրամբարներում: Ոռոգումն էլ է կիսատ ընթացել, չեն լցվել ջրամբարները նորմայի սահմաններում: Պատճառը տեղումներն են: Աշունն ավարտվում է, բայց անձրևներ չենք ունեցել: Աշնանացանը շատ գյուղերում փչացավ: Խոնավություն չեղավ: Այս տարվա տեղումները միայն կարկտի տեսքով էին: Միայն լավ կարկուտ եկավ, որը գյուղատնտեսությանը միայն վնաս էր »,- SHANTNEWS.am-ի հետ զրույցում ասել է «Շիրակ ՋՕ» ընկերության ջրօգտագործման բաժնի պետ Արթուր Սիմոնյանը:

Աշնանացանի վիճակի մասին գյուղապետերը տեղյակ են պահել էկոնոմիկայի նախարարությանը: Այս տվյալները կարևոր են հաջորդ տարի գարնանը հացահատիկի սպասվող բերքը հաշվարկելու համար: Դիմումում նաև պատճառներն են ներկայացրել, որ ոռոգման ջուր սեզոնին իրենց չի հասել: Համեմատաբար շատ ջուր կուտակվել է Կառնուտի ջրամբարում:

Մասնագետը բացատրում է՝ ի տարբերություն Վարդաքարի և Սառնաղբյուրի ջրամբարների, Կառնուտը սեզոնին դոտացիոն մուտքեր ունի Արփիի ջրամբարից, ինչն էլ ապահովել է, որ Կառնուտի ջրամբարը ձմեռացման գնա 6 մլն 500 հազար խորանարդ մետր ջրով:

Արփիի, Մանթաշի ու Ախուրյանի ջրամբարները «Շիրակ» ջրօգտագործող ընկերության սպասարկման տակ չեն ու լցվածության մասին հստակ տվյալներ չունեն, բայց նշում են, թե ջուրը քիչ է բոլոր ջրամբարներում: Հիմա հույսը ձմռան տեղումներն են: Համենայն դեպս, նշում են, թե նախորդ տարիներին եղել են դեպքեր, երբ ջրամբարները ձմեռացման գնացել են շատ քիչ ջրի պաշարով, իսկ հետո գարնան ձնհալը ապահովել է անհրաժեշտ քանակը: