Մայր աթոռը բանակցում է, և գիտեմ, որ արդեն պոտենցիալ բարերար կա. «Թռչունյան տան» տնօրեն

Գյումրիի «Թռչունյան տուն» խնամքի կենտրոնի բարերարը դադարեցրել է ֆինանսավորումը, և կենտրոնը լուծարման եզրին է: Վերջին մեկ ամսվա ընթացքում համացանցում ու լրատվամիջոցներում այս թեմայի մասին բազմաթիվ, երբեմն իրարամերժ տեղեկություններ հայտնվեցին: «Թռչունյան տունը» գործում է արդեն 16 տարի:

Այս ընթացքում այն պետության կողմից երբևէ չի հովանավորվել: Կենտրոնը ֆինանսավորվել է ամերիկահայ բարերարների հանգանակությունների շնորհիվ: Մայիս ամսին գլխավոր բարերար Հերման Հինտիրյանը տեղյակ է պահել, որ այլևս չի ֆինանսավորելու կառույցը, ինչի հետևանքով 6 ամիսների ընթացքում խնամքի կենտրոնը պարտքեր է կուտակել: Կենտրոնի պարտքի չափն արդեն հասել է 17 մլն դրամի:

Ինչո՞ւ է նման իրավիճակ ստեղծվել, ինչո՞ւ է բարերարը որոշել դադարեցնել ֆինանսավորումը. այս թեմայով SHANTNEWS.am-ը զրուցել է «Թռչունյան տան» տնօրեն Սոնյա Սիմոնյանի հետ:

«Հերման Հինտիրյանը համարվում էր մեր հոգաբարձուների խորհրդի ներկայացուցիչը ԱՄՆ-ում: Այնտեղ նա հիմնադրամ էր ստեղծել, ինքն էլ իր հերթին էր համալրում: Այդ ծանրության մեծ մասն ընկած էր իր ուսերին: Բարերարությունը այնպիսի բան է, որ այսօր կա, վաղը կարող է չլինել: Ես հստակ բան չեմ ասում, բայց ավելի դժվար է մեկ հսկայական կառույց պահել, քան թե ուրիշ բարեգործություն անել: Ես բազմիցս գրել եմ՝ ի՞նչն է պատճառը: Շեշտել եմ այդ բառը՝ ինչո՞ւ, ինչո՞ւ, ինչո՞ւ,- ասել է Սիմոնյանը:

Նամակում, որով տեղյակ էր պահել ֆինանսավորման դադարեցման մասին, բարերարը նշել է, որ դժվարացել է համագործակցել տնօրենի և աշխատակազմի հետ: Դա, ըստ տնօրենի, իր համար անհասկանալի է, քանի որ իրենք երբևէ իրենց աշխատանքի մասին ոչ մի քննարկում չեն ունեցել:

«Ես և մեր կոլեկտիվը կուզենայինք իմանալ, թե ո՞րն է հիմնական խնդիրը: Ինչի՞ց է, որ դժվարացել է մեր համագործակցելը: Հերման Հինտիրյանի հետ համագործակցել ենք 16 տարի, և մեր կառույցի գործունեության տեսակի նկատմամբ ոչ մի առարկություն չի եղել, չենք լսել, դրա համար մենք անակնկալի եկանք»,- ասել է Սիմոյանը:

Ֆինանսավորման դադարեցումը հաջորդել էր խնամքի կենտրոնում կատարված ուսումնասիրություններին: «Առավոտ» ՀԿ-ն խորքային ուսումնասիրություն է կատարել, որին մասնակցել է նաև բարերար Հերման Հինտիրյանը: Ըստ Սոնյա Սիմոնյանի՝ ուսումնասիրությունները չէին կարող ֆինանսավորման դադարեցման պատճառ դառնալ, քանի որ որևէ լուրջ խախտում արձանագրելու մասին իրեն ոչինչ հայտնի չէ: Իսկ «Առավոտ» ՀԿ նախագահ Մարգարիտա Շահվերդյանն ասել էր, որ ուսումնասիրությունների գաղտնիություն կա, բայց կան բաներ, որոնց մասին չի կարող չխոսել, և մասնավորապես նշել էր «Թռչունյան տան» մանկավարժական բացիթողի վիճակը:

Խնամքի կենտրոնի տնօրենը մանկավարժական կադրերի որակի մասին բուհ ընդունված շրջանավարտների թվով է խոսում: Ըստ նրա՝ անցյալ տարվա 12 շրջանավարտից 8-ը բուհ է ընդունվել: Սոնյա Սիմոնյանը բացառում է նաև խնամքի կենտրոնում բռնությունը երեխաների նկատմամբ:

«Կարող է երեխաները իրար հետ ունենան կոնֆլիկտներ, բայց բռնություն, որ երեխային պատժեն, ծեծեն, նման բան մեզ մոտ չի եղել: Երեխային սաստելը այլ բան է, ծեծելը՝ մեկ այլ:  Նման բան եղել է, բայց ծեծել չեմ տեսել»,- պատմել է տնօրենը:

«Թռչունյան տանը» 82 երեխա է ապրում, իսկ կենտրոնում գտնվող դպրոցում 110 աշակերտ կա: Թվային այս անհամապատասխանության պատճառն այն է, որ կենտրոնում գործող միջնակարգ դպրոց են հաճախում թաղամասի, ինչպես նաև Առափի գյուղի երեխաները: Դպրոցը նույնպես ֆինանսավորել են բարերարները: Հիմա Մայր աթոռն է բանակցություններ վարում՝ նոր բարերարներ գտնելու համար:

«Մայր Աթոռը բանակցում է, և ես գիտեմ, որ արդեն պոտենցիալ բարերարը կա: Ինչ-որ հիմնադրամ է, որի անունը ես չգիտեմ, չի էլ հրապարակվում: Տա Աստված, որ ստացվի, բոլորս կլսենք: Ամեն րոպե կարող է այդ հարցը լուծվել: Չգիտեմ՝ ինչու, մտածում եմ, որ դրական լուծում  կստանա: Երեխաներին չեն թողնի, կլինի ֆինանսավորում: Իսկ թե ինչպիսին կլինի հետագայում մեր գործունեությունը, դա այլ հարց է»,- նշել է Սիմոնյանը:

Մայր աթոռը նոր բարերարներ է փնտրում, հայտարարությամբ հանդես էր եկել նաև Աշխատանքի և սոցիալական հարցերի նախարարությունը՝ նշելով, որ պատրաստ է ստանձնել երեխաների խնամքը:

Քանի դեռ ֆինանսավորման հարցը լուծված չէ, «Թռչունյան տան» տնօրենը ասել է, որ կտրուկ որոշումներ չեն կայացնելու: Համենայն դեպս, ըստ, Սոնյա Սիմոնյանի, խնամքի կենտրոնը չի կարող անմասն մնալ նման հաստատությունների վերաբերյալ պետական մոտեցումից, և բեռնաթափման ու երեխաներին ընտանիք վերադարձնելու որոշումը վերաբերելու է նաև «Թռչունյան տանը»: