Ֆլեշի Բարսեղի գործով դատաքննությունը շարունակվել է

Երևանի ընդհանուր իրավասության դատարանի Ավանի և Նոր Նորք նստավայրում` Դավիթ Հարությունյանի նախագահությամբ, այսօր շարունակվել է «Ֆլեշ» ՍՊԸ նախագահ Բարսեղ Բեգլարյանի և «Ֆլեշ» ՍՊԸ բազայի պետ Հրայր Հովսեփյանի գործով դատական նիստը։ Հարցաքննվել է վկան` «Արարատբանկի» վարչության նախկին նախագահ Աշոտ Օսիպյանը։

Նա դատարանին հայտնել է, որ Արման Մկրտումյանին վարկը տրամադրվել է օրենքին համապատասխան․

«Ոչ մի խնդիր չենք ունեցել, Արման Մկրտումյանը եղել է «Ֆլեշ Մոթորս»-ի փոխտնօրեն, «Ֆլեշ Մոթորս»-ը եղել է «Արարատբանկի» կորպորատիվ հաճախորդ։ Արման Մկրտումյանին ճանաչում են էնտեղից, որ որպես կոֆլիկտային հաճախորդ, դիմել է հաշտարարին»։

Վկան ասել է, որ 2006-ից մինչև 2019 թվականը Բարսեղ Բեգլարյանի հետ եղել է աշխատանքային հարաբերությունների մեջ: Արման Մկրտումյանը վարկ ստնալու համար դիմել է Բարսեղ  Բեգլարյանին:

«Բարսեղ Բեգլարյանին ասել եմ` քո փոխտնօրենը դիմել է, ինքը պրոբլեմատիկ անձնավորություն է, ասել է` մի´ անձնավորիր, դիմել է, սահմանված կարգով տրամադրի»,- պատմել է վկան:

Հրայր Հովսեփյանին մեղադրանք է առաջադրվել այն բանի համար, որ նա 2016թ. մարտ-ապրիլ ամիսների ընթացքում, Արման Մայիսի Մկրտումյանի նկատմամբ բռնություն գործադրելով, ինչպես նաև կյանքի և առողջության համար վտանգավոր բռնություն գործադրելու սպառնալիքներով կատարել է ինքնիրավչություն` վերջինիս օրինական շահերին պատճառելով էական վնաս:

Բարսեղ Բեգլարյանին մեղադրանք է առաջադրվել այն բանի համար, որ նա 2016թ. մարտ-ապրիլ ամիսների ընթացքում Արման Մայիսի Մկրտումյանի նկատմամբ բռնություն գործադրելով, ինչպես նաև կյանքի և առողջության համար վտանգավոր բռնություն գործադրելու սպառնալիքներով կատարել է ինքնիրավչություն` վերջինիս օրինական շահերին պատճառելով էական վնաս:

Նրան մեղադրանք է առաջադրվել ՀՀ ՔՕ-ի 322-րդ հոդվածի 2-րդ մասի հատկանիշներով՝ ինքնիրավչություն:

Հիշեցնենք՝ Բարսեղ Բեգլարյանի ամբողջ գույքի վրա կալանք է դրված: Հրայր Հովսեփյանի նկատմամբ որպես խափանման միջոց է ընտրվել ստորագրություն՝ չհեռանալու մասին, իսկ Բարսեղ Բեգլարյանի նկատմամբ ընտրված խափանման միջոցը վերացվել է։

Փաստական տվյալների համաձայն՝ Բ. Բեգլարյանին պատկանող «Ֆլեշ Մոթորս» ՍՊ ընկերությունից 2015թ. ընթացքում իրականացվել է առանձնապես խոշոր չափերի գույքի հափշտակություն, որի համար ընկերության սեփականատերն ու հարազատները մեղադրել են «Ֆլեշ Մոթորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։