Մարուքյանն Աշոտյանին առաջարկում է դիմել Սաքունցին

Խորհրդարանական հայտարարությունների ժամին ԱԺ ՀՀԿ խմբակցության անդամ Արմեն Աշոտյանը հայտարարել էր, որ քաղաքական հետապնդումներ են սկսվել Հանրապետական թիմի ներկայացուցիչների հանդեպ: Անդրադառնալով Աշոտյանի այդ հայտարարությանը՝ ԱԺ «Ելք» խմբակցության անդամ Էդմոն Մարուքյանն այսօր խորհրդարանական ճեպազրույցների ժամանակ ընդգծել է.

«Ես չեմ տեսնում որևէ քաղաքական հետապնդվող անձ այս պահին, խոսքը գնում է նոր իշխանությունների կողմից, ոչ թե բանտերում եղած … Աշոտյանը, օրինակ, կարող է վերջին հաշվով դիմել ՄԻՊ-ին, կարող է դիմել Հելսինկյան քաղաքացիական ասամբլեայի Վանաձորի գրասենյակ, անձամբ Արթուր Սաքունցին, կարող է դիմել Ավետիք Իշխանյանին կամ կարող է դիմել «Իրավունքի Եվրոպա» միությանը: Ես ինքս պատրաստ եմ նրան աջակցել: Բնականաբար, քաղաքական հայտարարություններ են արվում ու դա ներկայացնում են որպես քաղաքական հետապնդում կամ կարծիքի ճնշում»:

Մարուքյանի պնդմամբ՝ չկա նման բան ու չի էլ կարող լինել, ինչ վերաբերում է այն խոսակցություններին, որ ԿԳ նախարարը հորդորում է մանկավարժներին դուրս գալ Հանրապետական կուսակցությունից, Մարուքյանի պնդմամբ՝ իրականությանը չի համապատասխանում:

«Մենք ունենք քաղաքացիներ, որոնք ասում են, որ մեզ բերել են, պարտադրաբար տվել են ՀՀԿ-ի վկայական: Հիմա եթե նման իրավիճակ է եղել, նախարարը կարող է ասել, որ ովքեր պարտադրված են ստացել դա, կարող եք հետ հանձնել, այլևս այդ ժամանակներն անցել են: Մենք չենք պարտադրելու դառնալ մեր կուսակցության անդամ, ով էլ պարտադրել է, ազատ եք, կարող եք հետ հանձնել: Հիմա պարզ է, չէ՞, որ եթե ինչ-որ ուսուցիչ չհանձնի ու շարունակի հետևել ՀՀԿ-ի գաղափարախոսությանը, ո՞վ կարող է նրան ասել՝ կուսակցությունից դիմում գրիր, դուրս արի: Ես բացառում եմ նման բան: Եթե մի նախարար կլինի, որ նման բան անի, ինքս կդատապարտեմ: Բազմաթիվ մարդիկ գնացել, հանձնել են, թող գտնեն մեկին, որը կասի, որ ինձ ստիպել են ՀՀԿ-ից դուրս գալ: Թող գտնեն մեկին»,- նշել է պատգամավորը:

Մարուքյանը չի կիսում նաև ՀՀԿ խմբակցության անդամ Միհրան Պողոսյանի որակումները, որն իր օգնականի ձերբակալությունը որակեց որպես «քաղաքական հետապնդում և վենդետա»:

«Ես չգիտեմ՝ ինչի հետ է կապված պարոն Պողոսյանի բողոքը, բնականաբար, պարոն Պողոսյանը իրավաբան է, շատ լավ գիտի ՀՀ օրենսդրությունը, և եթե նման բան լինի, սահմանված ընթացակարգերով կարող են ընթացք տալ: Ավելին ասեմ, այսօրվա գործող գլխավոր դատախազը ՀՀԿ-ի կողմից ներկայացված է, Քննչական կոմիտեի ղեկավարը՝ Աղվան Հովսեփյանը, երկար տարիներ ՀՀԿ-ի օրոք եղել է գլխավոր դատախազ, հիմա Քննչական կոմիտեի ղեկավար է, ՀՔԾ ղեկավարը՝ նույնը:

Հետևաբար, այնպես չէ, որ եթե ինչ-որ խնդիր լինի, այս մարմինները չեն գործի և իրավական գնահատականներ չեն տա: Չեն կարող ասել՝ դուք եկաք, բոլոր իրավապահ համակարգերի ներկայացուցիչները փոխվեցին, մենք հետապնդվում ենք: Ոստիկանությունից եղել է պահանջ, որ խաղաղ ցուցարարների նկատմամբ եղած բռնությունների դեպքերով ուսումնասիրություն է իրականացվել, տեսանյութերը կան, մեծ մասը դուք եք տեսանկարահանել, ուսումնասիրում են, եթե ինչ-որ մեկին նույնականացնում են, որ մարդ է ծեծել, ավտո է ջարդել, այդ մարդկանց նկատմամբ, բնականաբար, քրեական հետապնդում է սկսվել:

Հետո պարզվում է, որ այդ մարդը չգիտեմ ում ախպերն ա, եսիմ ում օգնականը: Բնականաբար, դա անձնավորված չէ: Անկախ նրանից, թե ովքեր ինչի համար են հետապնդվում՝ կլինեն ապաքաղաքական մարդիկ, գործող, թե նախորդ իշխանությունից, բոլորը օրենքի առաջ հավասար են: Իրավական գնահատական կտրվի, պատասխանը կլինի անխուսափելի»,- եզրափակեց իր խոսքը Էդմոն Մարուքյանը: