Գյումրիի «Թռչունյան տուն» խնամքի կենտրոնը լուծարվում է

Գյումրիի «Թռչունյան տուն» խնամքի կենտրոնը լուծարվում է, իսկ երեխաներին ընտանիք վերադարձնելու պարտավորությունը ստանձնում է աշխատանքի և սոցիալական հարցերի նախարարությունը: Այս մասին այսօր հայտարարել են նախարարության և Մայր Աթոռ Սուրբ Էջմիածնի ներկայացուցիչները, որոնք հանդիպել են խնամքի կենտրոնի աշխատակիցներին ու սաների ծնողներին:

Հիշեցնենք, որ 6 ամիս է՝ «Թռչունյան տան» ֆինանսավորումը դադարեցվել է, իսկ նոր բարերարների փնտրտուքը արդյունք չի տվել: Ֆինանսավորման բացակայությունը նաև գիշերօթիկների լուծարման կառավարության մոտեցումը հանգեցրել են «Թռչունյան տունը» լուծարելու վերջնական որոշման:

Վերջին 6 ամիսների ընթացքում «Թռչունյան տունը» տարբեր կառույցների ուշադրության կենտրոնում էր: Իսկ հուզող հարցը մեկն էր՝ ինչ պայմաններ են խնամքի կենտրոնում, և արդյո՞ք դրանք են եղել ֆինանսավորումը դադարեցնելու պատճառ:

Այս կապը հաստատող կամ հերքող տվյալներ չկան, բայց ՄԻՊ-ի հրապարակած զեկույցում «Թռչունյան տուն» մանկատանն արձանագրված մտահոգիչ խնդիրներն են տեղ գտել:

Ըստ զեկույցի՝ Պաշտպանի աշխատակազմի այցերի ընթացքում բացահայտվել են խնդիրներ, որոնք հանգեցնում են երեխաների իրավունքների կոպիտ խախտման։ Բայց այսօրվա քննարկումը, որը աշխատանքի ու սոցիալական հարցերի նախարարության և Մայր Աթոռի ներկայացուցիչներն էին կազմակերպել, այդ խնդիրների մասին չէր:

Խնամքի կենտրոնը, որպես այդպիսին, այլևս չի գործելու, իսկ երեխաներին ընտանիք վերադարձնելու գործը աշխատանքի ու սոցիալական հարցերի նախարարությունն է ստանձնել: «Թռչունյան տան» 81 սաները երկու տարբեր կարգավիճակ ունեն: Նրանց ընտանիք վերադարձի համար համապատասխանաբար երկու տարբերակ է նախարարությունն առաջարկում:

«Թռչունյան տանը խնամք ստացողների մեծ մասը սոցիալական պայմաններով չէ, որ հաստատությունում է: Մենք կարող ենք քննարկել այս երեխաների վերադարձը ընտանիք: Իսկ այն երեխաները, որոնք սոցիալական պայմաններից ելնելով՝ կամ լուրջ ռիսկային իրավիճակում է ընտանիքը, որը չի կարող երեխայի խնամքով այս պահին զբաղվել, մենք շատ արագ կարող ենք այդ երեխաների խնամքը տեղափոխել ու կազմակերպել Գյումրիի թիվ 2 խնամքի կենտրոնում, որը գործելու է մինչև հուլիսի 25-ը»,- ասել է ՀՀ աշխատանքի ու սոցիալական հարցերի նախարարության երեխաների հիմնահարցերի բաժնի պետ Անահիտ Քալանթարյանը:

Ընտանիքներին նախարարությունն առաջարկում է սոցիալական աջակցություն, ինչպես լուծարման ենթակա բոլոր մյուս գիշերօթիկ հաստատություններում: «Թռչունյան տան» սաներից 30-ը չի կարող ընտանիք վերադառնալ: Կա՛մ գնալու տեղ չունի, կա՛մ էլ ընտանիք վերադարձը ռիսկային է: Այդ սաներից մեկն էլ ներկայացրեց իր տարբերակը, թե ինչու է դադարեցվել «Թռչունյան տան» ֆինանսավորումը:

Ըստ նրա՝ խնդիրը «Թռչունյան տան» տնօրենն ու աշխատակազմն են: Նա առաջարկել է քննարկման մասնակիցներին փոխել տնօրինությանը:

«Այս ամենը չի փոխում իրականությունը, իսկ իրականությունն այն է, որ եթե անգամ կենտրոնի տնօրեն տիկին Սիմոնյանը և ամբողջ աշխատակազմը հրաժարական տան, նրանց փոխարեն գան հրեշտակներ, միևնույն է, ֆինանսավորում չկա:

«Թռչունյան տան» դեպքում, հավատացեք, ոչ այնքան պետական քաղաքականությունն էր պատճառը, որով գիշերօթիկները փակվում են, այլ ստեղծված իրավիճակը: Այսինքն՝ ոչ թե նախարարության, Մայր Աթոռի ցանկությունն է, որ փակվի, որպեսզի քաղաքականությանը համահունչ լինենք, այստեղ խնդիրը իսկապես անհնարինությունն է»,- ասել է Մայր Աթոռի սոցիալական ծառայության գրասենյակի տնօրեն Տեր Մարկոս քահանա Մանգասարյանը:

Մանկավարժների խնդիրն էլ իրենց չվճարված աշխատավարձերն են: Անցած տարվա հուլիսից «Թռչունյան տանը» աշխատավարձ չի վճարվել, սննդի պարտքեր են կուտակել: Ընդհանուր պարտքի չափը կազմում է 20 մլն դրամ:

«Բնականաբար, գործատուն պետք է վճարի աշխատողների չվճարված աշխատավարձերը: Մենք ունենք հիմնադրամ՝ «Հաշմանդամ որբերի տուն» բարեգործական հիմնադրամը, որը ստեղծել է «Թռչունյան տունը» և 100% բաժնետերը ինքն է: Բնականաբար, բոլոր հարցերը լուծվելու են հիմնադրամի մակարդակով»,- նշել է «Թռչունյան տուն» խնամքի կենտրոնի տնօրեն Սոնա Սիմոնյանը:

Լուծարման գործընթացը սկսվելու է այսօրվանից ու աստիճանական է լինելու: Ծնողները պետք է համապատասխան դիմումներ ներկայացնեն մարզպետարան, որով իրենց համաձայնությունը կտան երեխաներին թիվ 2 խնամքի կենտրոն կամ ընտանիք վերադարձնելու համար: Իսկ Մայր Աթոռը, որին պատկանում է խնամքի կենտրոնի շենքը, այն տնօրինելու տարբերակներ է քննարկելու: Չեն բացառում, որ գիշերօթիկ խնամքի կենտրոնի փոխարեն նույն տեղում ցերեկային կենտրոն բացվի: