Մարալիկի չինական թաղամասում կորոնավիրուսի ստուգման համար արգելում են բժիշկների մուտքը

Բժշկական հսկողություն է սահմանված Շիրակի մարզի այն բնակիչների նկատմամբ, որոնք վերադարձել են այնպիսի երկրներից, որտեղ հայտնաբերվել է կորոնավիրուս: Այս մասին SHANTNEWS-ի հետ զրույցում նշել է Շիրակի մարզպետարանի առողջապահության վարչության պետի ժամանակավոր պաշտոնակատար Սուսաննա Հովհաննիսյանը:

Ըստ նրա` Գյումրիում Հայաստանի 8 քաղաքացիների նկատմամբ, որոնք վերադարձել են ռիսկային երկրներից, պոլիկլինիկաներում հսկողություն է իրականացվում: Հսկողությունը տևելու է 14-15 օր, այնքան, որքան կորոնավիրուսի գաղտնի շրջանն է: 7 քաղաքացիների ինքնազգացողությունը լավ է, ջերմություն չեն ունեցել, իսկ մեկի մոտ հայտնաբերվել են տուբերկուլյոզի և ՄԻԱՎ-ի ախտանշաններ:

Մարզպետարանի առողջապահության վարչությունը ահազանգ է ստացել նաև առողջապահության և աշխատանքի տեսչական մարմնի կողմից այն մասին, որ Գյումրիում են գտնվում Չինաստանի 4 քաղաքացիներ: Պարզվել է, որ նրանք մեկ օրով ինջևանել են Գյումրիի հյուրատներից մեկում և հեռացել:

Ըստ Սուսաննա Հովհաննիսյանի՝ իրենց հայտնի չէ՝ Չինաստանի տվյալ քաղաքացիները անցե՞լ են բուժզննություն, թե ոչ:

«Ունեցել ենք Չինաստանի 4 քաղաքացի, որոնք մուտք են գործել Գյումրի առաց հասցեի: Հայտնաբերել ենք , որ նրանք մնացել են հյուրատներից մեկում, մնացել են ընդամենը մեկ օր և հեռացել Գյումրիից: Այս պահին Գյումրիում չեն, հուսով ենք, որ Գյումրիում չեն: Այդ հյուրանոցից հեռացել են, հետաքրքրվել ենք մյուս բոլոր հյուրանոցներում, նման անուն-ազգանուններով մարդիկ չկան: Հիմա Գյումրիում ունենք ՀՀ 8 քաղաքացի, որոնք բժշկական կազմակերպությունների կողմից գտնվում են հսկողության տակ: Նրանց առողջական վիճակը գնահատվում է նորմալ: Գանգատներ չունեն: Ունենք մեկ քաղաքացի, որը քրոնիկական հիվանդ է, հազ և խորխարտադրություն ունի: Նրա վիճակը պայմանավորված է քրոնիկական հիվանդությամբ»  ,- SHANTNEWS-ին ասել է Շիրակի մարզպետարանի առողջապահության վարչության պետի ժամանակավոր պաշտոնակատար Սուսաննա Հովհաննիսյանը:

Առավել ռիսկային են համարվում Մարալիկի չինական թաղամասի բնակիչները: Նրանք «Հյուսիս-հարավ» մայրուղու շինարարությամբ զբաղվող «Սինոհիդրո» ընկերության աշխատակիցներն են: Տվյալ տարածքում ստուգումներ կատարելու հնարավորություն բուժաշխատողները չունեն, քանի որ ընկերության ներկայացուցիչները թույլ չեն տալիս մուտք գործել իրենց տարածք:

«Արդեն 3 օր է` չարչարվում ենք այդ տարածքի համար: Իջեցրել ենք գրություն Մարալիկի հիվանդանոցին, որ այնտեղ բժշկական հսկողություն իրականացվի: Բուժանձնակազմը եղել է տարածքում, տեղյակ ենք պահել նաև տեսչական մարմնին, որ իրենք թույլ չեն տալիս իրենց տարածք մուտք գործել: Մենք քայլեր ենք ձեռնարկում, որ մտնենք տարածք: Այնտեղ այս պահի դրությամբ կա Չինաստանի 17 քաղաքացի: Նրանք չեն բացակայել այս ընթացքում, տեղում են եղել: Այսինքն՝ հուսով ենք, որ չեն կարող վարակակիր լինել: Տարածք մտնել, իրենց խոսքերով, պետք է դեսպանատունը թույլ տա: Նաև տեղեկություններ ունենք, որ քանի դեռ Չինաստանի Ժողովրդական Հանրապետությունում պահպանվում է այս վիճակը, այնտեղից ոչ մեկին թույլ չեն տալու, որ գան այստեղ աշխատելու»,- ասել է Սուսաննա Հովհաննիսյանը: