Գյումրիում թափառող շներին կստերջացնեն

Գյումրիում թափառող շները շատացել են: Կենդանասերների մոտավոր հաշվարկներով քաղաքում 2000 թափառող շուն կա: Կենդանիների նկատմամբ պատասխանատու վերաբերմունքի մասին օրենքի համաձայն՝ շների վնասազերծման նախկին տարբերակը՝ ֆիզիկական ոչնչացումն այլևս կիրառելի չէ: Համայնքապետարանները մրցութային կարգով պետք է պայմանագրեր կնքեն թափառող կենդանիների ստերջացման կենտրոնների հետ: Գյումրիի դեպքում այս գործընթացը ձգձգվում էր անցած տարվանից: Այս ընթացքում թափառող շները շատացել են: Ոհմակներով շրջող շներ և մարդկանց վնասելու դեպքեր տեղի են ունեցել հիմնականում ծայրամասային թաղամասերում:

Մեծ ու փոքր, միայնակ կամ խմբերով շրջող շների ամեն բակում ու փողոցում կարելի է հանդիպել: Թափառող շները հատկապես շատ են թաղամասերի այն հատվածներում, որոնք բաց տարածքներին են հարակից, որտեղ նաև աղբամաններ կան: Թափառող շները շատացել են ու արդեն շենքերի մուտքերն են գրավել:

Մանուշակ Հարությունյանն իր հարևաններից էականորեն այլ պատկերացումներ ունի թափառող շների ու կատուների վերաբերմունքի մասին: Նախկին սահմանապահ բուժքույրը դժգոհում է ոչ թե կենդանիների շատանալուց, այլ դրանց մեջ փնտրում է այնպիսիներին, որոնք իր օգնության կարիքն ունեն: Սևուկին, Բուբլիկին ու Կաշտանկային ամիսներ առաջ փրկել է սովից ու հիվանդություններից:

«Նախկին զինվորական եմ, ինքս բուժքույր եմ: Երևի թե իմ կյանքի ընթացքում մի 1000 կենդանի եմ փրկել: Շներին, կատուներին, բոլորին կերակրում եմ: Եթե չստերջացնենք, բնականաբար, կարող են շատանալ ու հոգս ներկայացնել, իսկ եթե ստերջացնենք, մի տեղ հավաքենք, բուժենք, հետո նույնիսկ կարելի է բաց թողնել: Շունը երբեք չի հարձակվի, եթե կուշտ է ու եթե նրան չեն խփում»,- SHANTNEWS-ի հետ զրույցում նշել է կենդանասեր Մանուշակ Հարությունյանը:

Մանուշակի տանը 10 կատու և երեք շուն է ապրում: Շան ու կատվի պատմությունը այստեղ այլ սցենարով է: Բոլորը նույն հարկի տակ համերաշխ են ապրում: Միասին ուտում են ու խաղում: Շներին ու կատուներին պարբերաբար վիտամիններ ու մակաբույծների դեմ դեղամիջոցներ է տալիս: Իր բնակարանը կենդանիների համար ժամանակավոր կացարան է: Շներին ու կատուներին հետո նվիրում է նրանց, որոնք համաձայնում են կենդանիների մասին հոգ տանել:

Գյումրիի քաղաքապետարանը կենդանասերների մոտավոր հաշվարկն է ներկայացնում, համաձայն որի՝ քաղաքի տարբեր թաղամասերում 2000 թափառող կենդանի կա: Շներին ստերջացնելու ու բուժելու համար քաղաքապետարանը 4 անգամ մրցույթ է հայտարարել: 3 անգամ մասնակիցներ մրցույթին չեն եղել: Վերջին մրցույթին մեկ անհատ ձեռներեց է հայտ ներկայացրել ու առանց մրցակցության հաղթող է ճանաչվել:

«Նախնական պայմանագիր ենք կնքել 350 թափառող կենդանիների ստերջացման համար, որից հետո նորից նոր պայմանագիր կկնքենք: Արու և էգ շների վիրահատության արժեքը տարբեր է: Ընդհանուր գումարը բյուջեից կազմել է 8 մլն 778 հազար դրամ: Կազմակերպությունն ունի օպերատոր, որը ժամը 9-19-ը ահազանգերն է գրանցում և համապատասխան քայլեր ձեռնարկում: Շաբաթը մեկ պետք է տեղեկատվություն ներկայացվի՝ պարտադիր նշելով, թե որ հասցեից են բռնել շներին»,- SHANTNEWS-ին ասել է Գյումրիի քաղաքապետի տեղակալ Հայկ Սուլթանյանը:

Հիմա արդեն թափառող շների մասին ահազանգերը բնակիչներն ու համատիրությունները պետք է ուղղեն ստերջացման կենտրոնին: Այն պարտավորվել է առայժմ 350 շուն Գյումրիի թաղամասերից բռնել, բուժել, ստերջացնել, համարակալել ու նորից բաց թողնել: Այս դեպքում ասում են, թե կենդանիները կլինեն անվնաս: Նաև նույն ընկերությունը հաշվառում է կատարելու, առաջիկա 3 ամսում կհստակեցնեն, թե Գյումրիում ինչքան թափառող շներ կան: