Արտախորհրդարանական ուժերի տեսակետները ՍԴ շուրջ ստեղծված վիճակի վերաբերյալ

Ի՞նչ տեսակետներ ունեն արտախորհրդարանական քաղաքական ուժերը Սահմանադրական դատարանի շուրջ ստեղծված իրավիճակի ու առաջ քաշվող լուծումների վերաբերյալ: SHANTNEWS.am-ը զրուցել է նրանց հետ:

ՀՀ արդարադատության նախկին նախարար, ՀՀԿ անդամ Դավիթ Հարությունյանը SHANTNEWS.am-ի հետ զրույցում ասաց, որ կան բովանդակային խնդիրներ:

«Այս ձևով օրենքն ընդունելու պարագայում մենք փոփոխություն ենք կատարում մի նորմում, որն իրեն արդեն սպառել է»,- նշեց նա:

Նա նաև ավելացրեց՝ ՍԴ-ն քաղաքականացվում է տասնամյակների համար.

«Մի պահ պատկերացնենք, որ հանրաքվեով անցավ, անտեսվեց, որ Սահմանադրություն է խախտվել, 7 դատավորները գնացին տուն և 7 նոր դատավոր ընտրեց Ազգային ժողովը: Պարզ է, որ նրանք քաղաքականացված են, բայց նրանք ընտրվում են 12 տարի ժամկետով: 12 տարի հետո նրանց լիազորությունները կդադարեն, և այդ ժամանակ գործող ԱԺ մեծամասնությունը դարձյալ կնշանակի քաղաքականացված դատավորներ, և այդ ցիկլը կունենանք 12 տարվա պարբերականությամբ, այսինքն՝ այն, ինչ հիմա անում ենք, երկարաժամկետ վնասներ է հասցնելու մեզ»:

Դ. Հարությունյանն ընդգծեց նաև, որ ցանկացած ոլորտում միշտ խնդիրներ առկա են, որոնք պետք է լուծելով գնալ առաջ.

«Բայց սա ո´չ այն խնդիրն է, որ պետք է լուծել, ո´չ էլ լուծման ճանապարհն է լուծման ճանապարհ»:

ՀԱԿ փոխնախագահ Լևոն Զուրաբյանն էլ նկատեց, որ ՍԴ հարցը հեղափոխությունից բավական ժամանակ անց այդպես էլ չի լուծվել: Ասում է՝ դա սպառնալիք է դառնում ժողովրդավարության ու հեղափոխության ճակատագրի համար:

«Հիմա ընդունվել են կարևոր որոշումներ: Դրանց գնահատականը կապված է բավականին լուրջ մի քանի գործոնների վերլուծության հետ: Դրանք և՛ քաղաքական, և՛ իրավական խնդիրներ են: Մենք պետք է ամբողջը քննարկենք: Քննարկումներն այսօր սկսել ենք՝ վարչության նիստ ենք հրավիրել: Քննարկումների ավարտից հետո կհայտնենք մեր դիրքորոշումը»,- նշեց Զուրաբյանը:

Իսկ դիրքորոշումը հստակեցնելուց հետո ասաց, որ հնարավոր է՝ նաև քայլեր ձեռնարկեն:

«Այն փոփոխությունը, որով հանդես է գալիս քաղաքական մեծամասնությունը, վերաբերում է սահմանադրական գործող կազմի 9 անդամներից 7-ի լիազորությունների դադարեցմանը: Այս փոփոխությունը միանշանակ տրամաբանական չէ, որովհետև այն նորմը, որը փոփոխության է ենթարկվում, արդեն իրացված է: Բայց անգամ այդ պարագայում ենթակա էր ՍԴ կողմից Սահմանադրության համապատասխանության գնահատման»,- SHANTNEWS.am-ի հետ զրույցում ասաց ՀՅԴ ԳՄ անդամ Արծվիկ Մինասյանը:

Նրա խոսքերով՝ փորձ է արվում հանրաքվեն վերածել նորից «սևի ու սպիտակի»: Մինչդեռ, ասում է, դա պետք է գնա ատելության և համերաշխության, սահմանադրականության և իրավական կամայականության, ամբոխավարության և ժողովրդի գիտակցված գործողության միջև:

Մինասյանը համոզված է, որ եթե առկա տրամաբանությամբ շարժվեն առաջ, հասարակությունը «ոչ» է ասելու փոփոխությանը՝ իշխանությանը կարմիր քարտ ցույց տալով:

Այսպես, «Ժառանգություն» կուսակցության փոխնախագահ Նարինե Դիլբարյանն ասաց, որ «Ժառանգությունը» համաձայն է խորհրդարանական մեծամասնության և վարչապետի գնահատականի հետ: Նա ընդգծեց, որ դա եղել է նաև «Ժառանգության» գնահատականը: Բայց նաև նշեց, որ հանրաքվեի պարագայում ինքը որոշակի վտանգ է տեսնում:

«Քաղաքացիների մեծ մասն անգամ տեղյակ էլ չէ, թե Սահմանադրական դատարանն ինչ արդարադատություն է իրականացնում, ինչ գործառույթներ ունի և չի էլ ճանաչում Հրայր Թովմասյանին: Ուստի, հանրաքվեի դնելու համար բավական մեծ ջանքեր կպահանջվեն»,- նշեց նա՝ ավելացնելով, որ հանրաքվեն կարող է փոխարինվել վստահության քվեի հանրաքվեով: Դիլբարյանի խոսքերով՝ Հայաստանի  ապագայի տեսանկյունից դրական քայլ կլիներ, եթե Հրայր Թովմասյանն իր կազմով ինքնակամ հրաժարական տար:

Մանրամասները` տեսանյութում: