Շիրակի մարզում հանրաքվեի տեղամասային կենտրոնները ձևավորվել են

Ապրիլի 5-ին կայանալիք Սահմանադրական փոփոխությունների հանրաքվեին Շիրակի մարզը, ինչպես նախորդ համապետական ընտրություններին, ընդգրկված է թիվ 11 ընտրատարածքում, որն ընդգրկում է 4 տարածքային ընտրական հանձնաժողովներ՝ թիվ 30, 31, 32 և 33:

Կենտրոնական ընտրական հանձնաժողովը սահմանել է հանրաքվեի անցկացման ժամանակացույցը, համաձայն որի՝ տարածքային հանձնաժողովներն արդեն ձևավորել են տեղամասային կենտրոնները: Գյումրին կունենա 82 տեղամասային կենտրոն: Իսկ տեղամասային հանձնաժողովների ձևավորումը տեղի է ունենալու «Այո»-ի և «Ոչ»-ի շտաբների ձևավորումից հետո:

Տարածքային ընտրական հանձնաժողովներում առայժմ պասիվություն է: Հանձնաժողովականներն են բացատրում, որ հանրաքվեի անցկացման կարգն է այդպիսին՝ տարածքային ընտրական հանձնաժողովների լիազորությունները մեծ չեն, կազմակերպչական աշխատանքներ են կատարելու, այն բանից հետո, երբ Կենտրոնական ընտրական հանձնաժողովում կձևավորվեն «Այո»-ի ու «Ոչ»-ի շտաբները: Համաձայն հանրաքվեի անցկացման ժամանակացույցի՝ առայժմ տեղամասային կենտրոններն են ձևավորել:

«Վերջին ընտրությունների համեմատ փոփոխությունների անհրաժեշտություն չի եղել: Գյումրիի համայնքապետի կողմից նաև ընտրատարածքայինների կողմից հաստատվել են տեղամասային կենտրոնները: Ըստ այդմ՝ թիվ 31 ՏԸՀ-ի սահմաններում թվով 58 տեղամասային կենտրոններ են»,- SHANTNEWS-ին ասել է թիվ 31 ՏԸՀ նախագահի տեղակալ Հովհաննես Պետրոսյանը:

Գյումրիի տեղամասերը 82-ն են: Այս թիվը վերջին խորհրդարանական ընտրություններից հետո չի փոխվել: 82 տեղամասերից 58-ը թիվ 31, իսկ 24-ը ՝ թիվ 32 տարածքային ընտրական հանձնաժողովի կազմում են: Տեղամասային կենտրոնները ձևավորելու հարցում հանձնաժողովները, ըստ էության, ոչինչ չեն արել: Դրանց համարակալումներն ու տեղակայման վայրերը նույնն են վերջին համապետական ընտրություններից հետո:

63 տեղամասային կենտրոն էլ թիվ 30 տարածքային ընտրական հանձնաժողովն է ձևավորել: Աշոցք, Ամասիա, Ախուրյան և Մարմաշեն խոշորացված համայնքներն է ընդգրկում: Անի խոշորացված համայնքն ու ամբողջ Արթիկի տարածաշրջանն էլ ընդգրկված է թիվ 33 տարածքային հանձնաժողովի կազմում: Տեղամասերի թիվն ու դիրքն անփոփոխ է, փոխվում է տեղամասային հանձնաժողովների ձևավորման կարգը:

«Առաջնորդվում ենք Հանրաքվեի մասին օրենքով, համաձայն որի՝ հանրաքվեի դեպքում տեղամասային հանձնաժողովի երկուական անդամ ներկայացնում են «Այո»-ի և «Ոչ»-շտաբները, երեք անդամ ներկայացնում են ՏԸՀ-ները: Օրենքը հստակ ասում է, որ հանրաքվեն կայացած է համարվում, եթե մասնակիցների թիվն առնվազն 1 մլն 300 մարդ է կազմում»,- SHANTNEWS-ի հետ զրույցում ասել է թիվ 30 ՏԸՀ-ի անդամ Մեսրոպ Ղալաչյանը:

Իսկ տեղամասային հանձնաժողովների անդամ կարող են դառնալ նրանք, որոնք համապատասխան վկայականներ ունեն: 2016-ին տրված վկայականների վավերականության ժամկետը Կենտրոնական ընտրական հանձնաժողովը երկարացրել է մինչև 2020-ի մայիս: Նորեկների համար էլ ստուգարք է անցկացվել:

«Երկու օր առաջ էլ ոչ թե դասընթաց, այլ ստուգարք  է անցկացվել: Մասնակցել են բոլոր այն անձինք, որոնք ցանկություն ունեն վկայականներ ստանալ և մասնակցել ընտրական գործընթացների: Նրանք թեստեր են լրացրել, որի արդյունքում էլ կստանան վկայագրեր»,- SHANTNEWS-ին ասել է թիվ 32 ՏԸՀ նախագահի տեղակալ Ներսես Մարգարյանը:

Շիրակի մարզի տարածքային ընտրական հանձնաժողովները գրեթե նույն կազմերով գործել են նաև 2015-ի Սահմանադրական հանրաքվեի անցկացման ժամանակ: Մասնակցության հստակ թվեր չհիշեցին, բայց փաստեցին, որ Սահմանադրական փոփոխությունների հանրաքվեներին մասնակցությունն ավելի քիչ է եղել, քան համապետական ու նույնիսկ տեղական ինքնակառավարման մարմինների ընտրությունների ժամանակ:

Հանրաքվեն կայացած կհամարվի, եթե մասնակիցների թիվը կազմի նվազագույնը 1 մլն 300 հազար, իսկ ելքը որոշված կլինի, եթե «Այո»-ի և «Ոչ»-ի  օգտին քվեարկի 650 հազար մարդ: Մասնակցության ցուցանիշը, մեծ հաշվով, նաև քարոզարշավից է կախված: Այն, ըստ հանրաքվեի անցկացման ժամանակացույցի, ընթանում է արդեն երկրորդ օրը: