Ծերացած ու չոր ծառերը վտանգ են ներկայացնում Գյումրիի տնակներին

Գյումրիում տների ու տնակների համար վտանգ են ներկայացնում ծերացած ու չորացած ծառերը: Օրինակ` Ավտոկայանի բանավանի և նախկին բուսաբանական այգու տարածքի տնակային թաղամասերը: Բարդիները տարիներով չեն էտվել, չոր ճյուղերը չեն կտրվել: Ամեն անգամ քամիների հետևանքով դրանք ընկնում են ու վնասներ հասցնում հարակից տներին: Դեպքերը շատ են, որոնց արձագանքելու համար  քաղաքապետարանի միջոցներն ու ունեցած տեխնիկան սահմանափակ են:

Քաղաքապետարանի ու փրկարարական ծառայության աշխատակիցները համատեղ էտում են ավտոկայանի բանավանի տնակային թաղամասի ծերացած ծառերից մեկը: Նույն տնակի հարևանությամբ երկու բարդի է եղել: Մեկն անցած տարվա դեկտեմբերին է ուժեղ քամու հետևանքով կոտրվել ու ընկել տնակի վրա, որից վնասել էր տանիքն ու ավտոտնակը: Բնակիչն ահազանգել է քաղաքապետարան երկրորդ բարդին էտելու խնդրանքով:

Բարդին ոչ թե կտրում են, այլ խորը էտում: Առաջին անգամ կոմունալ ծառայության աշխատակիցները ծառ են էտում փրկարարների օգնությամբ: Ունեցած համայնքային տեխնիկայով հնարավոր չէ բարձր ծառերն էտել: Մարզի փրկարարական վարչությունն էլ անցած տարեվերջին է նոր ավտովերելակ ստացել արտակարգ իրավիճակների նախարարությունից: Դրա օգնությամբ էլ բարձրացել են մինչև բարդու կատարը:

«Բազմիցս ահազանգեր լինում  են՝ կապված փտած, կոտրված ծառերի հետ, արձագանքում ենք: Կոնկրետ Ավտոկայանի բանավանի այս հասցեում երկրորդ անգամ ենք աշխատանքներ իրականացնում: Առաջին անգամ 2 ծառերից մեկը կոտրվել էր, տանիքի վրայից ծառը իջեցրել ենք ներքև: Մեր նոր տեխնիկան 2019-ին ենք ստացել: Ճապոնական նոր տեխնիկա, բացվում է 26 մետր բարձրությամբ: Հնարավորության սահմաններում ցանկացած ահազանգի ներկայանում ենք, օգնում ենք բնակչությանը»,- SHANTNEWS-ին ասել է Գյումրու թիվ 48 ՀՓՋ հրամանատար Էդվարդ Սարոյանը:

Սա արդեն Չերքեզի ձորի տարածքն է, որտեղ բարդիները մոտ 30 մետր բարձրության են: Նախկին հանգստյան գոտու տարածքում տասնյակ ծեր ու չորացած ծառեր կան: Դրանք երբևէ չեն էտվել: Բազմաթիվ բանավոր ու գրավոր դիմումներից հետո քաղաքապետարանից պատասխան բնակիչները ստացել են 2018-ի ապրիլին, որտեղ հստակ նշված է, թե տարածքի ծառերը երբ են էտելու: Բայց գրավոր պատասխանը գործնականում չի կատարվել:

Հիմնանորոգված փողոցներին հարակից ծառերը էտել են գեղեցիկ տեսքն ապահովելու համար: Իսկ Չերքեզի ձորում, կոմունալ ծառայության աշխատակիցն էլ է նշում, ծառերը խիստ վտանգավոր են: Դրանցից մի քանիսն այնպիսի դիրքում են, որ տեխնիկա չի կարող մոտենալ: Բնակելի հատվածին ամենամոտը գտնվող ծառերն էտելու համար նորից փրկարարների օգնությունը կպահանջվի:

«200-ից ավելի դիմումներ կան քաղաքապետարանում: Այդ դիմումները մնացին այն պատճառով, որ Գյումրիում փողոցաշինություն իրականացվեց, մենք կարողացանք էտել  այդ փողոցների բոլոր ծառերը: 1․5 տարի է` մենակ այդտեղ ենք աշխատել: Հիմա էլ դիմումները կուտակվել են, ընթացք պետք է տանք: Իսկ էտի համար շատ քիչ ժամանակ է մնացել՝ ընդամենը մեկ ամիս »,- SHANTNEWS-ի հետ զրույցում ասել է Գյումրիի քաղաքապետարանի կոմունալ ծառայության աշխատակից Ազատ Խաչատրյանը:

Հստակ հաշվառում չունեն, թե քաղաքում փտած ու չորացած քանի ծառ կա: Ու խոսքը հիմնականում բարդիների մասին է: Տարիներ առաջ դրանք տնկել են փլվածքների, ձորակների, ավազուտների ամրացման և դաշտապաշտպան անտառաշերտեր ստեղծելու նպատակով։

Ծառերն ամբողջովին կտրել չեն կարող, որովհետև դրանց անմիջապես հարևանությամբ տներ են ու տնակներ: Խոստանում են էտել, եթե փրկարարները նորից համաձայնեն տեխնիկա տրամադրել: Մեկ բարդու խորը էտի արդյունքում բավական մեծ քանակության փայտանյութ է ստացվում, որը քաղաքապետարանը պահեստավորում է` տնակներում ապրողներին որպես վառելափայտ տրամադրելու համար: