Շիրակի մարզի ընդհանուր իրավասության դատարանի ծանրաբեռնվածությունը խախտում է քննության ողջամիտ ժամկետները. փաստաբաններ

Շիրակի մարզի ընդհանուր իրավասության առաջին ատյանի դատարանը ծանրաբեռնված է, քաղաքացիական ու քրեական գործերի քննությունը տարիներ է տևում, վճիռները կողմերն ուշացումով են ստանում: Այս մասին այսօր հրավիրված մամուլի ասուլիսում խոսել են գյումրեցի փաստաբանները:

Ձգձգումների հետևանքով եղել են հայցվորներ, որոնք հրաժարվել են գործի հետագա քննությունից կամ շարունակելն այլև անիմաստ է դարձել: Ըստ փաստաբանների` ձգձգումները հեղինակազրկում են ողջ արդարադատության համակարգը և նվազեցնում փաստաբանների հանդեպ վստահությունը: Փաստաբանները նշել են խնդիրներն ու առաջարկել լուծումները:

Գյումրեցի փաստաբանները հաճախ դատական նիստերի դահլիճում հակառակ կողմերի շահերն են ներկայացնում: Իսկ այսօր մամուլի ասուլիսի սրահում նրանց ասելիքն ու դժգոհությունը ընդհանուր էր: Վստահորդների գործերն ընդունում են, հայցը կազմում, ուղարկում դատարան, որտեղ ամիսներով, երբեմն էլ տարիներով գործին ընթացք չի տրվում: Ըստ փաստաբանների` դատարանները խախտում են գործերի քննության ողջամտության ժամկետները, իսկ վստահորդներն իրենց հայցի քննության պահանջով ոչ թե դատարաններին, այլ փաստաբաններին են դիմում: Դատարանը փաստաբանների հարցմանը մեկ պատասխան է ներկայացնում` ծանրաբեռնվածությունը մեծ է: Հատկապես քաղաքացիական գործերը շատացել են, ժամանակը դատավորներին չի բավականացնում:

«Յուրաքանչյուր դատավորի մոտ 2500-ից 3000 գործ կա: Բնականաբար, նշված պայմանները ինչ-որ տեղ օբյեկտիվ պատճառներ են, որպեսզի ձգձգվեն քաղաքացիական գործերի ընթացակարգերը, բայց ինչ-որ լուծում պետք է գտնել: Գուցե բարձրաձայնենք, որ դատավորների թիվն ավելացնեն, որպեսզի կիսվի այդ բեռը: Մենք էլ ենք հասկանում, որ ինչ-որ տեղ օբյեկտիվ է այդ պատճառաբանությունը, որ չեն կարողանում տեղավորվել ժամանակի մեջ»,- ասել է փաստաբան Աննա Դավթյանը:

Ըստ փաստաբանների` դատարաններում գործերի ձգձգումների պատճառը միայն ծանրաբեռնվածությունը չէ, այլ նաև դատավորների սուբյեկտիվ վերաբերմունքը:

«Ամուսնալուծության կամ ալիմենտ նշանակելու գործերը 5 րոպեանոց նիստեր են, բայց դատավորներն ասում են` ժամանակ չունեմ: 6 ամիս հետո նոր նիստ են նշանակում: Բայց եթե գնանք, նայենք, մեր դատարանում օրական 1 կամ 2 դահլիճ է զբաղված: Այնպես չէ, որ ծանրաբեռնված են աշխատում, չեն հասցնում: Ունենք լավ դատավորներ, որոնք արագ, արդյունավետ են աշխատում: Նույն գործը քննում են 3 ամսում, մինչդեռ մյուս դատավորները նույն  գործը 2 տարում են քննում: Նույնը քրեական գործերի մասով է: Ես ունեմ գործ, որը շարունակվում է 2009 թվականից: Էլի օբյեկտիվ պատճառներ կան՝ դատավորներն են փոխվում, վկաները չեն ներկայանում: Այս ամենը կարելի է լուծել օրենսդրական կարգավորումներով»,- ասել է փաստաբան Հայկ Հարությունյանը:

Օրենսդրական կարգավորումների ցանկում փաստաբանները նշում են շատ հարցերի լուծման արտադատարանական համակարգի նկատմամբ վերահսկողությունը: Եթե տարածքային ու ՏԻՄ մարմինների, նոտարների, քաղաքացիական կացության ակտերի գրանցման կենտրոնների նկատմամբ վերահսկողությունը խիստ լինի, ըստ փաստաբանների, շատ գործեր դատարան չեն հասնի ու դատարանների ծանրաբեռնվածությունը կթեթևանա:

Հիմա Շիրակի մարզի ընդհանուր իրավասության դատարանում 11 դատավոր է աշխատում, որից 7-ը` քաղաքացիական գործերով, 4-ը՝ քրեական:

Դատավորների թվի ավելացման մասին օրենսդրական նախաձեռնություն կա, որը քննարկումներ պետք է անցնի: Այս ընթացքում փաստաբաններն իրենց դիմողներին միայն զգուշացնում են, որ անկախ գործի հրատապությունից ու ծավալից, քննությունը ամենաքիչը 1 տարի կտևի: