Առողջապահական համակարգի պատասխանատուները ներկայացրել են Շիրակի մարզում իրականացվող կանխարգելիչ միջոցառումները

Կանխարգելիչ ի՞նչ միջոցառումներ են իրականացվում Շիրակի մարզում: Այս մասին SHANTNEWS.am-ին ներկայացրել են մարզի առողջապահական համակարգի ներկայացուցիչները: Արտակարգ դրություն հայտարարելուց հետո ստեղծվել է մարզային օպերատիվ կառավարման շտաբ, որը համակարգում է պատասխանատու կառույցների աշխատանքը և արագ արձագանքը: Մարզի բուժհաստատություններում ինտենսիվ միջոցառումներ են տարվում նաև ներհիվանդանոցային վարակներից խուսափելու համար, խստիվ արգելված են տեսակցությունները: Համայնքային ու մասնավոր կառույցներին պարբերաբար ախտահանումներ կատարելու հրահանգ է տրված:

Պարբերական ախտահանումներ փողոցներում, կանգառներում, շենքերի մուտքերում և, իհարկե, բուժհաստատություններում: Սրանք կանխարգելիչ պարտադիր միջոցառումներ են, որոնք իրականացվում են Շիրակի մարզում: Առանձին պետական ու մասնավոր կառույցները կանխարգելիչ իրենց միջոցներն էլ են կիրառում:

«Գյումրի» բժշկական կենտրոնում հիվանդատեսների մուտքն արգելել են, ստացիոնար բուժում ստացողներին էլ, որոնց վիճակը բավարար է, դուրս են գրում՝ այսպես ասած «մահճակալային ծանրաբեռնվածությունը» նվազեցվում է։

«Սա արվում է ոչ թե նրա համար, որ մենք կորոնավիրուսի դեպքեր ունենք, այլ նրա համար, որ հնարավորինս ներհիվանդանոցային  վարակը կանխենք, որ դրսից եկած մարդը չվարակի մեր քրոնիկ հիվանդներին և բուժանձնակազմին: Մեր սրտաբանական և թերապևտիկ բաժանմունքներում հիմնականում քրոնիկ հիվանդությունների սրացումներով հիվանդներ են»,- ասել է «Գյումրի» ԲԿ փոխտնօրեն Արմեն Խաչատրյանը:

Պլանային վիրահատություններն ու հետազոտությունները նույն պատճառներով հետաձգում են։ Իսկ որպեսզի հիվանդանոցներում դիմելիությունը մեծ չլինի, անգամ հանգստյան օրերին հերթապահություն է սահմանված պոլիկլինիկաներում: Նույն պոլիկլինիկաների և Հիվանդությունների վերահսկման ու կանխարգելման ազգային կենտրոնի մասնագետները վերահսկում են տանը ինքնամեկուսացածներին: Այն երկրները, որտեղ կորոնավիրուսի տարածումը մեծ է, նոր անվանում են ստացել՝ «անբարենպաստ երկրներ»: Այդ երկրներից ժամանածների համար մեկուսացումը պարտադիր է: Թեև մասնագետներն են նշում՝ մեկուսացման կանոններին չենթարկվողներ կան:

«Անապահով երկրներից ժամանած և տնային հսկողության տակ գտնվող անձինք ունենք: Նրանց բացատրված է, թե ինչպես պետք է ինքնամեկուսանալ և ինչ միջոցառումներ պետք է իրականացնել: Չի բացառվում՝ կան այնպիսիք, որոնք ինքնամեկուսացման կանոններին չեն ենթարկվում: Մարզային օպերատիվ շտաբում ունենք ուժային կառույցների պատասխանատուներ: Նրանց միջոցով փորձում ենք հնարավորինս նվազեցնել չենթարկվողների տեղաշարժը»,- ասել է Շիրակի մարզպետարանի առողջապահության բաժնի պետ Լեյլի Ասլանյանը:

Եվրոպական երկրների հետ առնչություն ունեցող բելառուս վարորդներ են օրեր առաջ Շիրակի մարզի սահմանը հատել Բավրայի անցակետից: Նրանց նկատմամբ հսկողություն է սահմանվել, նմուշառում են կատարել, անցել են թեստը, որի պատասխանները բացասական են եղել: Ընդհանրապես, նմուշառում կատարում են միայն Հիվանդությունների վերահսկման ու կանխարգելման կենտրոնի մասնագետները: Իսկ Շիրակի մարզում նմուշառումը, ըստ պատասխանատուների, կատարվում է բացառապես Գյումրիի ինֆեկցիոն հիվանդանոցում:

Նմուշառում կատարելու և մեկուսացվածներին հսկողության տակ պահելու բոլոր պայմանները Գյումրիում ստեղծված են: Տարածք է առանձնացվել ինֆեկցիոն հիվանդանոցի նախկին հակատուբերկուլյոզային բաժանմունքում: 200 նոր արտահագուստ են ստացել, որը հատկացվել է պոլիկլինիկաներին, շտապօգնության կայանին ու ինֆեկցիոն հիվանդանոցին: Բուժաշխատողները պատրաստ են, բայց, ըստ համաճարակաբանի, հիվանդացության թվերը հանրապետությունում մեծ չեն:

«Հայաստանում անհանգստացնող թվեր չունենք: Որպես համաճարակաբան՝ ասում եմ, որ տեմպերը և օրական արձանագրված դեպքերը նույնիսկ, ըստ իս, անհանգստացնող չեն: Ես նկատի ունեմ, որ վերահսկելի են և կառավարվում են»,- ասել է ՀՎԿԱԿ «Շիրակ» մասնաճյուղի բժիշկ-համաճարակաբան Արմինե Անդրյանը:

Մեկուսացում, անձնական հիգիենայի կանոններին հետևել. ըստ բուժաշխատողների՝ սրանք են այն պայմանները, որ նպաստում են՝ վարակը չտարածվի, իսկ Շիրակի մարզում արտակարգ դրության դրական ազդեցությունը, որը առողջապահական համակարգի ներկայացուցիչները նկատել ու նշում են, այն է՝ մարդկանց վարքագծում փոփոխություն է տեղի ունեցել՝ դարձել են ավելի զգոն, ուշադիր ու պատասխանատու: