Կառավարությունը կօգնի ՀՀ ԶՈՒ-ին սննդի մատուցման ծառայություն ապահովող կազմակերպություններին

ՀՀ կառավարությունն այսօր որոշում կայացրեց ՀՀ Զինված ուժերին սննդի մատուցման ծառայություն ապահովող կազմակերպություններին կանխավճար տրամադրելու մասին: ՀՀ պաշտպանության նախարար Դավիթ Տոնոյանը նշեց, որ առաջարկվող նախագծով նախատեսվում է հնարավորություն ընձեռել զինված ուժերի սննդի պատրաստման և մատուցման ծառայություն ապահովող կազմակերպությունների հետ գնման գործընթացն իրականացնել կանխավճար տրամադրելու միջոցով՝ կազմակերպության կողմից կանխավճարի ապահովման բանկային երաշխիք ներկայացնելու դեպքում:

Նախարարը հայտնեց, որ կանխավճարի մարումն իրականացվելու է ծառայությունների մատուցման հանձնման-ընդունման արձանագրությունների հիման վրա տրվելիք վճարումներից 10 տոկոսի չափով նվազեցնելու միջոցով: Տոնոյանն ասաց, որ նախագծի ընդունման նպատակներից մեկը կորոնավիրուսով պայմանավորված սահմանափակումների հետ կապված դծվարությունների հաղթահարումն է, իրենց կողմից էլ որոշ սննդամթերքների երկարաժամկետ պահուստների ստեղծման պայման է առաջ քաշվել:

ՀՀ վարչապետ Նիկոլ Փաշինյանն արձագանքեց.

«Ես կարծում եմ, որ վերջին ժամանակաշրջանի ամենակարևոր նորամուծություններից մեկը զինվորների սննդի ապահովման նոր համակարգն է, որը տեղավորվում է մեր այն քաղաքական պարտավորության մեջ, որ ասում ենք՝ զինվորի ծնողը զինվորին բանակ ուղարկելուց հետո պետք է հոգ չտանի որակյալ սնունդ ուղարկելու մասին: Այս ծրագիրը գնում է առաջ, և մեր այն զորամասերում, որտեղ համակարգը ներդրված է, սննդի որակի՝ էական անգամների փոփոխություն ունենք, բայց ես ուզում եմ ասել նաև հետևյալը, որ երբ առաջին անգամ սկզբնական շրջանում այս նախագծի ներդրման նպատակահարմարությունն էինք քննարկում, բոլորս գիտեինք, որ մտնում ենք մութ անտառ, որտեղ շատ պարամետրեր հայտնի չեն, կանխատեսելի չեն, զրոյից պետք  ստեղծենք գոյություն չունեցող համակարգ, և այդ ճանապարհին պետք է ունենանք նաև բազմաթիվ հարցեր»:

Վարչապետը հիշեցրեց՝ այդ ժամանակ էլ պայմանավորվել են, որ պետք է լինեն համբերատար, չխուսափեն հարցեր առաջադրելուց և դրանց պատասխանելուց: Նա տեղեկացրեց, որ վերջին մեկ ամսվա ընթացքում առնվազն չորս քննարկում են ունեցել, ընդ որում՝ դրանք եղել են ՊՆ-ի, ԶՈւ Գլխավոր շտաբի, կառավարության, վարչապետի աշխատակազմի, ՊՎԾ և ընկերությունների ներկայացուցիչների մասնակցությամբ, փորձել և փորձում են կետ-կետ առանձնացնել այն հարցերը, որ ծագում են և ունեն պատասխանի անհրաժեշտություն:

«Պրոբլեմներ ի հայտ են գալիս, բայց մենք պայմանավորվել ենք, որ համբերատար պետք է այդ բոլոր հարցերը լուծենք՝ չմոռանալով մեր գործողությունների հիմնական շահառուին. այս ամենի նպատակը մեկն է՝ զինվորին ապահովել հնարավորինս բարձրորակ սննդով, ու, քանի որ ընկերություններն այս ընթացքում արել են ներդրումներ, դրանք հիմնականում չեն փոխհատուցվել, մենք մինչ օրս ոչ մի կոպեկ փող չենք տվել, մյուս կողմից է՝ կան նաև հարցեր, նրբություններ, որ պետք է պարզաբանվեն: Մենք որոշեցինք, որ պետք է որոշակի կանխավճար տրվի արդեն իսկ սեփական միջոցների հաշվին կատարված ներդրումների որոշակի մասի համար, հընթացս նաև պետք է ճշգրտենք, թե արված ներդրումներից որ մասն է, որ պետությունը պետք է փոխհատուցի, որ մասն է, որ պետք է չփոխհատուցի»,- ասաց նա:

Փաշինյանը նշեց՝ միանշանակ է, որ այս ծրագիրը պետք է մինչև վերջ շարունակվի, ողջ ԶՈւ-ն պետք է անցնի այս համակարգին, սակայն այդ գերնպատակը պետք է չխանգարի հարցեր դնել, դրանց պատասխանել, թերություններ շտկել և այլն: