Ինչպե՞ս են հսկվում ինքնամեկուսացման մեջ գտնվողները

Կորոնավիրուսի տարածումը կանխելու նպատակով իրականացվում են մի շարք միջոցառումներ: Այդ միջոցառումների մասին է այսօր խոսել  պարետ Տիգրան Ավինյանի խորհրդական Բագրատ Բադալյանը: Նա ներկայացրել է վարակվածների և նրանց հետ շփում ունեցած անձանց շրջանակը պարզելու մեխանիզմները:

«Հիվանդի հետ շփումներ ունեցած անձանց շրջանակը պարզելու նպատակով օգտագործվում են բջջային օպերատորների կողմից տրամադրված տվյալները: Մեր կողմից հարցում է իրականացվում և տրամադրվում են միայն հիվանդի հետ շփում ունեցող անձանց վերաբերյալ տվյալները: Դրանք մշակվում են «Էկենգ» կազմակերպության սերվերում և հասանելի են միայն այդ համակարգով աշխատողներին: Այդ կարճ ցուցակով պարզվում է շփման շրջանակը և իրականացվում է լրացուցիչ հարցազրույց: Այն անձիք, որոնք ունեցել են շփում վարակված անձանց հետ ,ևս ինքնամեկուսացվում են»,- ասաց Բադալյանը:

Ինքնամեկուսացված անձանց հետ ևս կապը պահվում է: Պարբերաբար տեղեկություն է հավաքագրվում հիվանդի առողջական վիճակի մասին, սննդի վերաբերյալ տվյալներ են հավաքագրվում, և անհրաժեշտության դեպքում սնունդ է մատակարարվում: Բացի դրանից՝ հաղորդագրություն է ուղարկվում ինքնամեկուսացածներին:

Հաղորդագրության մեջ եղած հղումով անցնում են, պատասխանում առողջական վիճակի մասին հարցերին, լուսանկարվում են՝ պարզելու համար, թե արդյոք հենց մեկուսացվա՞ծ անձն է հարցերին պատասխանել, թե՞ ոչ: Այդ ընթացքում հավաքագրվում է տեղեկություն՝ հավաստիանալու համար, որ նրանք չեն լքել մեկուսացման վայրը: Այդ կարճ հաղորդագրությունները օրվա մեջ մի քանի անգամ են ուղարկվում` պատահական ժամերի, այդպիսով վերահսկվում է ինքնամեկուսացած անձանց գտնվելու վայրը, և եթե անձը լքում է  մեկուսացման վայրը, ավտոմատ համակարգը այդ հաղորդագրությունը ուղարկում է ոստիկանություն: Ոստիկանության կողմից ճշտելուց հետո անձը ենթարկվում է վարչական տույժի, իսկ կրկնվելու դեքում քաղաքացին տեղափոխվում է մեկուսացման վայր:

«Կարճ հաղորդագրության միջոցով տվյալները հավաքագրելուց հետո այն քաղաքացիների տվյալներ, ում մոտ ախտորոշվում է կասկած, փոխանցվում են պարետատան մեկ այլ ստորաբաժանման, աշխատակիցները զանգում են և «կարմիր գոտում» հայտնված մարդկանց հետ հարցազրույցի միջոցով պարզվում է՝ կա՞ արդյոք ռեալ կասկած, և եթե առկա են լինում ախտանիշներ, ապա այդ տվյալները փոխանցվում է առողջապահության նախարարությանը՝ թեստավորում իրականացնելու համար: Հավաքագրվում է նաև հավելվածի միջոցով դրական արդյունք ստացած անձանց տվյալները, որոնց հետ նույնպես պարետատան աշխատակիցները հեռախոսազրույց են ունենում` պարզելու համար վարակվածության հավանականությունը»,- նշեց Բադալյանը:

Հավելվածը, որը ստեղծվել է հայ ծրագրավորողների կողմից և կոչվում է «Covid 2019 Armenia», արդեն 44000 բեռնում ունի, որի շրջանակում 240 000 անգամ թեստ է արվել: Թեստավորման սահմանափակում չկա: Արդյունքում՝ 1500 մարդ հայտնվել է «կարմիր գոտում», հարցազրույցի միջոցով առանձնացվել է 31-ը, նրանցից 8-ի մոտ բացասական է եղել, 4-ի մոտ՝ դրական, մնացածի պատասխաններին դեռ սպասում են: