Ղազախստանում հարգել են Հայոց ցեղասպանության սրբադասված նահատակների հիշատակը

Ապրիլի 24-ին Ղազախստանի մայրաքաղաք Նուր-Սուլթանում՝ ռուս ուղղափառ եկեղեցուն պատկանող Սուրբ Ուսպենսկի տաճարում տեղի ունեցավ բարեխոսական կարգ` ի հիշատակ Հայերի ցեղասպանության սրբադասված նահատակների: Այս մասին ասված է Ղազախստանում Հայաստանի դեսպանատան ֆեյսբուքյան էջում։

«Հաշվի առնելով նոր տիպի կորոնավիրուսով պայմանավորված իրավիճակը՝ ապահովվեց նաև արարողության հեռարձակումը ուղիղ եթերով:

Արարողությանը մասնակցում էին Ղազախստանում ՀՀ դեսպան Գագիկ Ղալաչյանը, դեսպանության անձնակազմը և հայ համայնքի ներկայացուցիչները:

Կարգն անցկացվեց Նուր-Սուլթանի եկեղեցական շրջանի ղեկավար, Ծայրագույն վարդապետ Սերգի Կարամիշևի կողմից:

Գագիկ Ղալաչյանը, իր ելույթում ներկայացնելով օրվա խորհուրդը, ընդգծեց, որ ցեղասպանության փաստն ընդունելը և դատապարտելն ունեն զսպող նշանակություն աշխարհում նմանօրինակ ոճրագործության կամ ցեղասպանության կրկնության կանխարգելման գործում, ինչին էլ ուղղված են ՄԱԿ շրջանակներում և ՄԱԿ-ի «Ցեղասպանության հանցագործությունը կանխելու և դրա համար պատժի մասին» 1948թ. կոնվենցիայի հիման վրա ՀՀ կողմից ներկայացվող բանաձևերը և ձեռնարկվող այլ քայլերը: ՀՀ դեսպանը շնորհակալություն հայտնեց Ս.Կարամիշևին ռուս ուղղափառ եկեղեցու տարածքում հարգանքի տուրք մատուցելու հնարավորությունն ավանդաբար ստեղծելու և եղբայրական եկեղեցու ցուցաբերած համերաշխության համար:

Այնուհետև ՀՀ դեսպանը ծաղկեպսակ դրեց տաճարի տարածքում գտնվող հայկական խաչքարին՝ հարգանքի տուրք մատուցելով Սուրբ նահատակների հիշատակին:

Ղազախստանի մյուս հայ համայնքների, այդ թվում՝ Ալմաթիի, Ակտոբեի, Ակտաուի, Ատըրաուի, Ուստ-Կամենոգորսկի ներկայացուցիչները ևս, հնարավորության դեպքում, հաշվի առնելով և պահպանելով երկրում հայտարարված կարանտինային ռեժիմի սահմանափակումները, հարգանքի տուրք մատուցեցին Հայերի ցեղասպանության սրբադասված նահատակների հիշատակին:

Ապրիլի 24-ի տվյալներով «HyeID» արդարության առցանց երթին միացել է Ղազախստանի և Ղրղզստանի տարածքում գտնվող 683 անձ»:

https://www.facebook.com/armembkz/posts/3067747819952544?__xts__[0]=68.ARCXI2QvFCZgY0hQoMjFUN1w5URxQBpRhoHeoawCgw1kYyE46dBYSLhFzRuXK4ymhsBGV91pd3T98iRgEkNr-OArX_RNRAiJpxuh6eZOkMnRvvQ6P6qI_Btp3MHptZPEDztO7ItfoniGhnYsqptRMA-sTtyZRprt833V7ufgVhefsZ8hlMm0P4hgMTW-Zz8Hw6d7I_YnU02v5IVnZBeLZD7JwUf4nVgYqFrSD6dA6MIsXXRO3u5C0Ct0xfySHv49HBO75Cv8UqA-CctIrdEsU8-baa-v82AtPUdlJPAiBofRU1W91Plm4FH64eeRGosMi651LXlBepxHCDyBAlN-GKvDm9aY&__tn__=-R