Հաղթանակի 75-ամյակին նվիրված միջոցառումներ՝ Գյումրիում

Միայն արարողակարգային միջոցառումներ, իսկ վետերաններին՝ հեռավար շնորհավորանքներ ու պարգևատրումներ ․․.

Այսպես է նշվել Հայրենական մեծ պատերազմում տարած հաղթանակի 75-ամյակը Գյումրիում։ Քաղաքային ու մարզային իշխանությունների ներկայացուցիչները, Գյումրիում Ռուսաստանի Դաշնության հյուպատոսը և ռուսական 102-րդ ռազմաբազայի հրամանատարական անձնակազմը հարգանքի տուրք են մատուցել «Մայր Հայաստան» հուշահամալիրում։

Անհայտ զինվորի հուշակոթողին՝ անմար կրակի մոտ, ծաղկեպսակներ են դրել, ծաղիկներ խոնարհել։ Դեռ անցած տարի նախատեսված էր Գյումրիում հաղթանակի 75-ամյակի առիթով մեծ զորահանդես անցկացնել։

Արտակարգ դրության ռեժիմը պլանները փոխել է։

«Պլանները փոխվել են, բայց դրանից չի փոխվում մեր վերաբերմունքը։ Մարդաշատության առումով, սահմանափակումների առումով խնդիրներ ունենք։ Կարևորում ենք մեր բնակիչների առողջությունը, բայց վստահ եմ, որ չկա հայ ընտանիք, չկա որևէ հայ միջավայր, որտեղ այսօր տոնական տրամադրություն չէ։ Մեր պատմության շատ կարևոր էջն է, այդ էջը վերաիմաստավորման, վերաներկայացման կարիք ունեցող էջերից է»,- SHANTNEWS.am-ի հետ զրույցում ասել է Շիրակի մարզպետ Տիգրան Պետրոսյանը։

Վետերաններին հեռավար կարգով են շնորհավորել ու պարգևատրել Գյումրիում Ռուսաստանի Դաշնության հյուպատոսարանը։

«Ուրախ ենք այս տոնը ձեզ հետ նշելու համար։ Ես շնորհավորում եմ ՀՀ բոլոր քաղաքացիներին, վետերաններին։ Մենք մինչ այս Լոռու մարզի վետերաններին ենք շնորհավորել։ Նրանց պարգևատրել ենք հաղթանակի 75-ամյակի հուշամեդալներով։ Ցավոք, հնարավորություն չունեցանք հյուպատոսարանում մեծարելու բոլոր վետերաններին, ինչպես անում ենք ավանդաբար, բայց մեր շնորհավորանքները հարազատների միջոցով փոխանցել ենք բոլորին։ Բոլոր վետերանները մեզ համար հարազատ ու թանկ մարդիկ են»- ասել է Գյումրիում ՌԴ հյուպատոս Ալեքսանդր Կոպնինը։

Երկրորդ աշխարհամարտին մասնակցել է 600 հազար հայ։ 103 հայ արժանացել է հերոսի կոչման, 27-ը դարձել է «Փառքի շքանշանի» լրիվ ասպետ, իսկ մեդալներով ու շքանշաններով պարգևատրվել է շուրջ 80.000 հայ։

Նրանք պատերազմի ընթացքում ստանձնել են բարձր պաշտոններ՝ 1-ը՝ ռազմաճակատի, 3-ը՝ բանակի, 5-ը՝ կորպուսի, 22-ը՝ դիվիզիայի, 25-ը՝ բրիգադի, 100-ը՝ զորագնդի հրամանատարներ։

«Հայրենական մեծ պատերազմի մասնակից էր Շիրակի թեմի քահանան, որը պատերազմից հետո շարունակել է քահանայությունը։ Նա սառնաղբյուրցի Տեր Գևորգն էր, որոշ ժամանակ եղել է միակ քահանան։ Այս օրը մեզ համար հաղորդակցման հնարավորություն է։ Սա ոչ թե հիշողություն է, այլ հաղորդակցում»,- SHANTNEWS.am-ի հետ զրույցում նշել է Տեր Փավստոս քահանա Սարգսյանը։

Արարողակարգային միջոցառումներն անցել են առանց վետերանների ներկայության։ Ավելի ուշ Գյումրիի «Մայր Հայաստան» հուշահամալիր բարձրացել է գյումրեցի վետերաններից ամենաերիտասարդը՝ 92 տարեկան Ազատ Պարսամյանը։ Նա պատմել է թիկունքում իրենց աշխատանքի մասին, իսկ ռազմաճակատում զոհվածների լուսանկարներից կազմված «Անմահ գունդը» Գյումրիում այսօր ներկայացրել է ընդամենը 1 ընտանիք։