Գյումրիի ինֆեկցիոն հիվանդանոցը նախկին գործառույթներին վերադառնալուց հետո աշխատում է թերբեռնված

Գյումրիի ինֆեկցիոն հիվանդանոցը սեպտեմբերի 1-ից վերադարձել է իր նախկին գործառույթներին: Առողջապահության նախարարի հրամանով՝ COVID դրական թեստավորում ունեցող հիվանդները հոսպիտալացվել են մայրաքաղաքի բուժհաստատություններում:

Գյումրիի ինֆեկցիոն հիվանդանոցն այժմ իրականացնում է տրիաժ ծառայություն: Այսինքնъ կորոնավիրուսին բնորոշ ախտանշաններով հիվանդներին ընդունում և նմուշառում են: Դրական պատասխանի դեպքում ուղարկում են մայրաքաղաք, իսկ եթե վիրուս չի հայտնաբերվում, հոսպիտալացվում է ինֆեկցիոն հիվանդանոցում: Այժմ Գյումրիի ինֆեկցիոնն աշխատում է թերբեռնված, և ընդունում են սեզոնային շնչառական վարակներով ու աղիքային ինֆեկցիաներով հիվանդներին:

Գյումրիի ինֆեկցիոն հիվանդանոցում արդեն մուտքն ազատ է: Միջանցքներում գծանշումները պահպանվում են, թթվածնային սարքերն արդեն պարապուրդում են, իսկ բուժաշխատողները հատուկ արտահագուստով չեն, բաժանմունքներում էլ շատ քիչ հիվանդներ կան: Հիվանդանոցը վերադարձել է իր նախկին գործառույթներին: Հիմա հոսպիտալացված հիվանդներն ընդամենը 13-ն են:Նրանցից 7-ը թոքաբորբով է հոսպիտալացվել: Ախտորոշումը COVID-19 չէ, բայց թոքերի հետազոտությունը որոշ դեպքերում ցույց է տալիս, որ թոքաբորբը կորոնավիրուսի հետևանքով է: Այսինքն` տնային պայմաններում բուժվել են, վիրուսի ազդեցությունը թուլացել է, բայց թոքերն է ախտահարել:

«Վիրուսը ի վերջո դուրս է գալիս օրգանիզմից, բայց ոչ ճիշտ, կիսատ-պռատ բուժման հետևանքով դեռևս լավացած չի լինում պացինետը: Դրա համար կարիք է առաջանում ստացիոնար բուժման: Մեր մոտ նմուշառվում են և բացասական պատասխանով շարունակում են բուժումը: Այդ հիվանդներն արդեն վարակակիր չեն»,- SHANTNEWS-ին ասել է Գյումրիի ինֆեկցիոն հիվանդանոցի վարակաբան Հեղինե Հունանյանը:

Մանկական բաժանմունքը ևս թերբեռնված է: Սովորաբար այս ամիսներին աղիքային ինֆեկցիաներն էին շատ լինում: Հիմա աղիքային գանգատներով հիվանդներ քիչ են դիմում: Այստեղ էլ օգնել է կորոնավիրուսով պայմանավորված հիգիենայի կանոնների պահպանման պահանջը:

Բժիշկների մտահոգությունն է, որ հանկարծ կորովիրուսն ու այլ շնչառական վարակները չմեկտեղվեն: Ախտանշանները նույնն են և սուր շնչառական վիրուսների ակտիվացման ժամանակ կանխատեսում են ,որ հիվանդանոցներ դիմելիությունը և թեստավորումները շատ կլինեն:

Համավարակը Գյումրիի ինֆեկցիոնին նաև օգնել է: Մարտից մինչև օգոստոս ամիսներին, երբ Գյումրիի ինֆեկցիոնը մարզում կորոնավիրուսով հիվանդներին ընդունող միակ բուժհաստատությունն էր, մասնակի վերանորոգվել է, համալրվել է լաբորատոր և ախտորոշիչ սարքերով: Դրանցից ամենաթանկարժեքը, ոչ միայն գնի, այլև արդյունավետության առումով իմունաֆերմենտային անալիզատորն է, որով որոշվում են հակամարմինները: Տնային պայմաններում բուժվածներն հիվանդության հաղթահարումը հենց այս սարքով են որոշել:

Վերադարձը նախկին գործառույթներին Գյումրիի ինֆեկցիոնում նաև կադրային փոփոխությունների է հանգեցրել: Կորոնավիրուսի դեմ պայքարելու համար բժիշկներ ու միջին բուժանձնակազմ էին ընդունել, նրանց բոլորի հետ պայմանագրերը խզվել են:

«Ունեցել ենք և՛ միջին բուժանձնակազմ, և՛ բժիշկ կամավորներ ենք ունեցել, որոնց հետ խզվել են պայմանագրերը: Սակայն, ըստ նախարարի հրամանի ՝ 3 օրվա ընթացքում, կարիք լինելու դեպքում, պետք է վերապրոֆիլավորվենք: Նրանք էլ տեղյակ են, որ  անհրաժեշտության դեպքում նորից միանալու են մեզ: 10-15 բուժաշխատողներ ազատվել են աշխատանքից: Հիմա աշխատում ենք մեր հիմնական աշխատակազմով»,- SHANTNEWS-ին ասել է Գյումրիի ինֆեկցիոն հիվանդանոցի տնօրեն Աստղիկ Բեյբությանը:

Գյումրիի ինֆեկցիոնում պահեստավորել են ախտահանիչ նյութեր, դեղորայք և արտահագուստ: Սա այն դեպքի համար է, եթե վիրուսը նորից ակտիվանա: Ըստ առողջապահության նախարարի հրամանի՝ անհրաժեշտության դեպքում Գյումրիի ինֆեկցիոնը պետք է պատրաստ լինի 3 օրում նորից վերապրոֆիլավորվելու և COVID-19 բուժելու համար: