Կօգնի՞ արդյոք այսօրվա խաղը Մխիթարյանին

Այսօր՝ Երևանի ժամանակով ուղիղ կեսգիշերին «Օլդ Թրաֆորդ» մարզադաշտում կմեկնարկի Անգլիայի պրեմիեր լիգայի 23-րդ մրցափուլի «Մանչեստեր Յունայթեդ» – «Սթոք Սիթի» հանդիպումը:   «Մանչեստեր Յունայթեդի»  հայտացուցակում  է նաև Հենրիխ Մխիթարյանը: Հայաստանի հավաքականի ավագի համար այս խաղը կարող է լինել շատ կարևոր, եթե իհարկե նա դուրս գա խաղադաշտ:   Դրա հավանականությունը մեծ է՝ հաշվի առնելով, որ նախորդ խաղում մանչեստերյան թիմի գլխավոր մարզիչը գոհ էր մնացել Մխիթարյանից,  թեև փոխարինել էր նրան առաջին խաղակեսից հետո:  Մխիթարյանի այս կամ այն ակումբ տեղափոխվելու մասին  հրապարակումները  ռեկորդային են դարձել, թե թվի, թե բազմազանության իմաստով:  

                  Ամեն ինչ կախված է Մոուրինյոյի՞ց

Միջազգային մարզական մամուլում Հենրիխ Մխիթարյանի  հնարավոր տրանսֆերի թեման մնում է ամենաքննարկվողներից մեկը: Մխիթարյանի մասին գրում են անընդհատ, շատ ավելի, քան այն ժամանակ, երբ նա փայլում էր խաղադաշտում: Ինտրիգը նրա անվան շուրջ հիմա ավելին է, քան երբևէ: Ինչքան շատ է, սակայն, անդրադարձը Մխիթարյանին, այնքան քիչ է հստակությունը  նրա տրանսֆերի հարցում: Հակառակը, այն տպավորությունն է, որ ամեն մի հրապարակումից հետո իրավիճակը Մխիթարյանի շուրջ  ավելի է խճճվում և այդ գործում  ամենակարևոր դերակատարը «Մանչեստեր Յունայթեդ»-ի գլխավոր մարզիչ Ժոզե Մոուրինյոն է: Մխիթարյանին տևական ժամանակ քննադատելուց և բազմաթիվ ածականներով բնորոշելուց հետո, Մոուրինյոն   կարծես կրկին սկսեց վստահել նրան: Ավելին, վերջին խաղից հետո նույնիսկ ներողություն խնդրեց նրան փոխարինելու համար, ասելով որ Մխիթարյանը դինամիկա էր հաղորդում «Դերբիի» հետ խաղում: Եվ ահա պորտուգալացի մարզիչը հերթական անգամ անդրադառնում է Մխիթարյանի այլ ակումբ տեղափոխվել-չտեղափոխվելու հարցին, բայց շատ ավելի դրական տոնայնությամբ, քան վերջին մի քանի ամիսներին էր:   

 «Յուրաքանչյուր խաղացող իր արժեքն ունի:  Կույր է նա, ով այլ կերպ է կարծում: Երբ տրանսֆերային շուկան բաց է, Հենրիխն էլ բաց է ցանկացած ակումբի համար, որը հետաքրքրվում է նրանով:  Ամեն ինչ կախված է մեզանից:  Մենք ենք, ի վերջո, որոշում կայացնելու՝ վաճառե՞նք նրան, թե ոչ:  Եվ եթե պետք է վաճառենք, ապա միայն ճիշտ գնով:  Մխիթարյանը խաղացել է Անգլիայի գավաթի խաղարկության վերջին հանդիպմանը և հավանաբար կխաղա նաև հաջորդ խաղում՝ «Սթոք Սիթիի» դեմ: Նա առայժմ մեր խաղացողն է և շատ լավ խաղացող է»,- ասել է Մոուրինյոն՝ պատասխանելով Մխիթարյանի տրանսֆերի մասին հարցին: 

Ուշադրություն դարձրեք Մոուրինյոյի հատկապես վերջին խոսքերին: «Մխիթարյանը, ոչ թե լավ, այլ շատ լավ խաղացող է:»  Նման կարծիքը   կոնֆլիկտային պորտուգալացուց,  բազմաթիվ քննադատություններից   հետո անսպասելի էր:    Մյուս կողմից սակայն հայտնի է, որ Մոուրինյոն հենց այնպես ոչինչ չի ասում և նրա ցանկացած խոսքից հետո նոր թափով, երբեմն էլ    նոր ուղղությամբ   են իրադարձությունները զարգանում: 

                        Ովքե՞ր են Մխիթարյանի երկրպագուները

Մխիթարյանի երկրպագուները կիսվել են երկու բանակի:  Առաջինում իսկական երկրպագուներն են, որոնց համար մեկ կամ մի քանի չստացված խաղերը կարծիք փոխելու,առավել ևս Մխիթարյանին վարկաբեկելու առիթ չեն տալիս: Մյուս բանակում ավելի շատ մանչեստերյան ակումբի երկրպագուներն են, ովքեր ոչ միայն Մխիթարյանին, այլև  ցանկացած ֆուտբոլիստի    կարող են հողին հավասարեցնել ընդամենը մեկ սայթաքումից հետո:  Առաջին բանակը, որ Մոուրինյոյին «սև ամպ է» անվանել, ենթադրաբար շատ ավելի մեծ է: Նույնքան մեծ է շատերի ցանկությունը, որ Մխիթարյանը վերջապես հեռանա «Մանչեստեր Յունայթեդից» և սկսի շնչել և անել այն, ինչ իրականում կարող է: Երկրպագուների մի զգալի հատված պարզապես համոզված է, որ ցանկացած այլ ակումբում Մխիթարյանը փայլելու է: Այդպիսի համոզմունք ունեն նաև հայտնի ֆուտբոլային շատ փորձագետներ: 

 «Կարծում եմ,  որ Սանչեսի վաճառքը «Մանչեստեր Յունայթեդին» և Մխիթարյանի ձեռք բերումը հրաշալի գործարք կլինի «Արսենալի» համար:  Մխիթարյանը  «Մանչեստեր   Յունայթեդում»  կորցրել է ինքնավստահությունը: Եթե «Արսենալում» նա խաղա այնպես ինչպես խաղացել է Դորտմունդի «Բորուսիայում», ապա կկարողանանք ասել, որ «Արսենալը» ձեռք է բերել  Պրեմիեր լիգայի լավագույն խաղացողներից մեկին»,- ասել է լոնդոնյան «Արսենալի» նախկին կիսապաշտպան Փոլ Մերսոնը, ով, ի դեպ,   առաջին անգամ չէ, որ դրական է արտահայտվում Մխիթարյանի մասին և քննադատում Մոուրինյոյին:   

                                          Մխիթարյանը Սանչեսի դիմա՞ց, թե՞ …

Ի՞նչ է սպավում Մխիթարյանին դեռ հայտնի չէ: Վերջերս ավելի շատ խոսվում է Ալեքսիս Սանչեսին Մխիթարյանի հետ փոխանակելու մասին: Չիլիացու պայմանագրի ժամկետը մոտենում է ավարտին, դրան զուգահեռ նվազում է արժեքը տրանսֆերային շուկայում: Ըստ որոշ հրապարակումների, Մոուրինյոն կտա Մխիթարյանին Սանչեսի դիմաց, եթե «Արսենալը» հավելավճար կատարի: Ստացվում է՝ այսօրվա դրությամբ Մխիթարյանը թանկ է Սանչեսից: «Արսենալի» մարզչի՝ Արսեն Վենգերի խոսքերով Սանչեսի հարցը կլուծվի առաջիկա 48 ժամվա ընթացքում, սակայն դա չի նշանակում, որ Մխիթարյանի հարցն էլ կլուծվի նույնքան արագ և դա կախված կլինի Սանչեսի վաճառքից, առավել ևս այսօր տարածված այն տեղեկությունից հետո, որ Արսենալը պատրաստվում է 60 միլիոն եվրոյով գնել Օբամեյանգին:   

Այս դեպքում Մխիթարյանի հարցը վերածվում է ավելի մեծ թնջուկի: Համենայնդեպս, եթե Մխիթարյանի վաճառքի հարցը մեկ-երկու ամիս առաջ կասկած չէր հարուցում, ապա հիմա չի բացառվում, որ Մխիթարյանը որքան էլ նրան շատ սիրող երկրպագուները չուզենան, մնա «Մանչեստեր Յունայթեդում»: Հիմա նույնիսկ այս հարցն է դարձել խաղադրույքի թեմա: Որոշ բուքմեյքերական  ընկերություններ նաև գործակից են սահմանել: Ըստ այդմ, հավանականությունը, որ Մխիթարյանը չի գնա մանչեստերյան ակումբից   ձմեռային տրանսֆերի շրջանում, հիմա ավելացել է և կազմում է 30 տոկոս: