Գյումրիի հիվանդանոցներում սուր շնչառական վիրուսներով ու թոքաբորբերով հիվանդների թիվն ավելացել է

Սուր շնչառական  վիրուսների ակտիվ շրջանում ախտահարվելու ակտիվ գոտում են հայտնվել  խոցելի խմբերը, այդ թվում՝ թույլ իմունիտետ ունեցող անձինք։ Եղանակային անոմալ բնույթի տատանումները ևս մեծացնում են գրիպով, բրոնխիտով կամ թոքաբորբերով հիվանդանալու տեմպերը։ «Գյումրի» բժշկական կենտրոնի և Մոր և մանկան  ավստրիական  հիվանդանոցի  բաժանմունքներում ազատ մահճակալներ գրեթե չկան։

«Գյումրի» բժշկական կենտրոնի Covid բաժանմունքը դեկտեմբերի 20-ից փակվել է, կորոնավիրուսից բուժվող հիվանդներ չունեն։ Նմուշառումների թիվն էլ է նվազել, թեստավորում են միայն հոսպիտալացման ենթակա անձանց։

«Եթե նախկինում մենք մինչև 24-28 նմուշառում էինք անում, այժմ նմուշառումների քանակը կազմում է 3-4, երբեմն՝ 5-7։ Եզակի դեպքերում գալիս են դրական հիվանդներ, որոնք տեղափոխվում են մասնագիտացված հիվանդանոցներում բուժման, բնականաբար, քաղաք Երևանում»,- Shantnews.am-ի հետ զրույցում նշել է «Գյումրի» ԲԿ-ի թերապևտիկ բաժանմունքի վարիչ Լիլիթ Սարգսյանը։

Բժշկական կենտրոնում բարձր ռիսկային  գոտին շարունակում է մնալ տրիաժ բաժանմունքը, կասկածելի ախտանշաններով հիվանդները, մինչ թեստի պատասխանի հայտնի դառնալը, մեկուսացվում են։ Վերջին մեկ ամսվա ընթացքում ավելացել է բացասական թեստավորմամբ թոքաբորբով հիվանդների թիվը, դրանք կազմում են  թերապևտիկ բաժանմունքում բուժվող հիվանդների 50%-ը։

«Առավոտյան հիվանդների քանակը բաժանմունքում եղել է 40, մոտ երեսուն տոկոսը նյարդաբանական պրոֆիլով հիվանդներն են,մնացածը՝ թերապևտիկ հիվանդներն են և թոքաբորբերը։ Բոլոր տարիքային խմբերում  են հանդիպում  թոքաբորբերը, տարեցների մոտ ավելի հաճախ են արձանագրվում՝ հաշվի առնելով նրանց մոտ առկա ուղեկցող հիվանդությունները՝ թոքաբորբերի ընթացքը ավելի ծանր է ընթանում»,- նշում է Լիլիթ Սարգսյանը։

Մոր և մանկան ավստրիական հիվանդանոցի մանկական բաժանմունքում բուժում ստացողների մեծ մասը մինչև երկու տարեկան երեխաներն են։ Մանկաբույժները  բացատրում են, որ դա կախված է փոքրիկների իմունային համակարգի անկայունությամբ, ինչն էլ  գրիպներով ու սուր շնչառական վիրուսներով հիվանդանալու հիմնական պատճառ է  դառնում։

«Մեր բաժանմունքում ունենք 30 մահճակալ, այս պահին զբաղված են 28-ը, այսինքն՝ մոտ 98 տոկոս ծանրաբեռնվածությամբ ենք աշխատում։ Այս շրջանում ակտիվացել են նաև ալերգիաներով հիվանդները, որոնք հիմնականում սննդային բնույթ ունեն»,- ասում է  Գյումրիի Մոր և մանկան ավստրիական հիվանդանոցի մանկական բաժանմունքի վարիչ Սուսաննա Տոնոյանը։

Մանկական հիվանդանոց նվազել  է 14-18 տարեկանների դիմելիությունը, այս տարիքային խմբերը  բուժսպասարկում ստանում են հիմնականում պոլիկլինիկաներում։ Բաժանմունքում թոքաբորբով բուժվող երեխաներ չկան, վերջին մեկ ամսվա ընթացքում ծանր թոքաբորբերի ախտորոշման դեպքերը նվազել են։

«Այս տարի համեմատաբար քիչ են թոքաբորբերով հիվանդները։ Նախորդ տարվա հետ համեմատած՝ միշտ ունեցել ենք ամսական կտրվածքով  մոտ 7-8 թոքաբորբով  երեխա, իսկ այս տարի բավականին քիչ են, ունեցել ենք մեկ ամսվա ընթացքում 1-2 ախտորոշված դեպք»,- նշել է մանկական բաժանմունքի վարիչ Սուսաննա Տոնոյանը։

Մոր և մանկան ավստրիական հիվանդանոցում հունվար-փետրվար ամիսներին Covid ախտորոշմամբ երեխաներ չեն  ունեցել։ Մեկուսարանում կասկածելի ախտանշաններով մեկ երեխա կար, սպասում էին թեստի պատասխանին, որից հետո կորոշվի, թե որտեղ է կազմակերպվելու հինգ տարեկան երեխայի հետագա բուժումը:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։