«Վրացական երազանքը» ստորագրում է ԵՄ միջնորդի առաջարկած փաստաթուղթը

«Վրացական երազանքը» հրապարակայնորեն ստորագրում է Եվրոպայի խորհրդի նախագահ Շառլ Միշելի հովանու ներքո ստեղծված փաստաթուղթը: Խոսքը Վրաստանի քաղաքական կուսակցությունների ներկայացուցիչների համար Շառլ Միշելի հատուկ ներկայացուցիչ Քրիստիան Դանիելսոնի առաջարկած փաստաթղթի մասին է, հայտնում է 1tve.ge-ն։ Այդ մասին հատուկ ճեպազրույցում հայտարարել է Վրաստանի խորհրդարանի նախագահ Արչիլ Թալակվաձեն:

«Ինչպես գիտեք, այսօր մեր երկիրը կանգնած է լուրջ մարտահրավերների առաջ է: Վրաստանը պայքարում է համաճարակի և դրա պատճառած տնտեսական և սոցիալական խնդիրների դեմ: Տարածաշրջանը գտնվում է բարդ աշխարհաքաղաքական իրավիճակում: Նման ժամանակներում մենք կարծում ենք, որ ամբողջ երկիրը պետք է համախմբվի ընդհանուր մարտահրավերների շուրջ, և քաղաքական գործիչները պետք է իրենց ժամանակը ծախսեն ոչ թե իրենց նեղ կուսակցական շահերի համար պայքարելու, այլ համատեղ ջանքերով երկրի և հասարակության առջև ծառացած խնդիրները լուծելու վրա:

Ցավոք, այսօր Վրաստանում այլ իրողություն է ստեղծված: Ակնհայտ է, որ առանձին կուսակցությունների և քաղաքական գործիչների համար իրենց կուսակցական շահերը կարևոր են պետության և ժողովրդի շահերից:․․․Այսօր «Վրացական երազանքը» հրապարակավ ստորագրում է Եվրամիության և Եվրոպայի խորհրդի նախագահ Շառլ Միշելի հովանու ներքո ստեղծված փաստաթուղթը, որը ներկայացնում է նախագահի հատուկ ներկայացուցիչ Քրիստիան Դանիելսոնը:

Երկխոսության վերջին հանդիպմանը մենք պատրաստակամություն հայտնեցինք ստորագրել փաստաթուղթը, որի մասին բազմաթիվ ընդդիմադիրներ նշում էին իրենց մեկնաբանություններում, սակայն մենք դեռ չենք ստորագրել, քանի որ ակնկալում էինք քայլեր՝ հանդիպելու ընդդիմության հետ: Պետք է ընդգծել, որ ԵՄ-ն այս փաստաթղթում չի ներառել արտահերթ ընտրությունների հարցը, ինչը խորհրդարանական ընտրությունների և խորհրդարանի օրինականության եւս մեկ հստակ հաստատում է: Վերահաստատվեց, որ ընդդիմության կողմից ընտրակեղծիքների վերաբերյալ արված մեղադրանքները չի կիսում միջազգային հանրությունը:

ԵՄ հովանավորությամբ փաստաթղթի ստորագրումը վրաց հասարակության և միջազգային գործընկերների նկատմամբ մեր բարձր պատասխանատվության դրսևորում է: Հիմա հերթը ընդդիմությանն է: Նրանք ևս մեկ հնարավորություն ունեն ապացուցելու, որ պետության շահերը վեր են դասում իրենց կուսակցական շահերից»,-ասել է Արչիլ Թալակվաձեն:

Քրիստիան Դանիելսոնը Վրաստանի քաղաքական կուսակցությունների ներկայացուցիչներին փաստաթուղթը առաջարկել էր մարտի 31-ին: