Աթեիստն առաջին քրիստոնյա երկրում. աշխարհահռչակ Դարեն Արոնոֆսկին Երևանում է

Արվեստը և Դարեն Արոնոֆսկին

Արվեստի գործ ստեղծելու համար պետք է համախմբես անհավանական արտիստների, քանի որ պետք է լինի լայն համագործակցություն ու փոխընբռնում, իսկ ռեժիսորն այս դեպքում կարծես նվագախմբի դիրիժոր լինի ու նա կարիք ունի և՛լարային, և՛ փողային գործիքների: Բոլորը պետք է մի թիմի պես աշխատեն: Հրաշալի է, երբ ունենում ես այնպիսի «բենդ», որը կարողանում է համահունչ նվագել:

Ստեղծագործական գործընթացը կարծես ամուսնություն լինի: Այն ոչ միշտ է կատարյալ ու ներդաշնակ: Շատ դժվարությունների միջով ես անցնում, մինչև ստեղծում ես ինչ-որ կատարյալ բան:

Ես փնտրում եմ մարդկանց, որոնք ոչ միայն արհեստավարժ են իրենց գործում, այլև արտիստներ են, ովքեր պատրաստ են իրենց արվեստը հասցնել ավելի բարձր մակարդակի:

Դիցաբանությունը՝ ըստ Արոնոֆսկու

Ինձ շատ են հետաքրքրում Աստվածաշնչից վերցված պատմությունները և ինքս՝ որպես պատմություն պատմող, փորձում եմ հույզեր և զգացմունքներ արթնացնել: Փորձում եմ ինչ-որ կերպ բոլորիս միավորել ոչ թե մի մարդկային տեսակի մեջ, այլ որպես մեկ ամբողջական մոլորակ: Սա է կինոյի ուժը: Կապ չունի՝ դա հայկական ֆիլմ է, իրանական թե ամերիկյան: Կարևորը ֆիլմում մարդկային հույզն է, որը թարգմանվում է աշխարհի բոլոր լեզուներով: Բոլորս էլ կարող ենք դիտել ֆիլմը և զգալ այն:

Գիտեք, թե ինչու է Ռասել Քրոուն հիասքանչ դերասան, որովհետև նա կարող է պարզապես շարժել իր աչքի կոպը, և աշխարհում ցանկացած մարդ պարզ կհասկանա՝ ինչ է նա զգում:

(Այսքանը բացատրելուց հետո Դարեն Արոնոֆսկին կեսկատակ-կեսլուրջ նշեց՝ հիմա փորձեմ ձեզ բացատրել, թե որքանով է այս ամենը կապված Աստվածաշնչի հետ-հեղ.)

Այս համատեքսում կարելի է  ասել, որ աստվածաշնչյան հին պատմությունները մոլորակի բոլոր մարդկանց են պատկանում: Ինձ չի հետաքրքրում, թե մարդն ինչ կրոնի է դավանում. այդ պատմություններով նրանք աշխարհի մշակույթի մի մասն են:

Աթեիստն` առաջին քրիստոնյա երկրում

Ես շատ ուրախ եմ, որ ձեր հյուրն եմ, և ինձ համար սա մեծ պատիվ է: Կարծում եմ, որ դուք հանդուրժողական պետք է գտնվեք այն բոլոր ֆիլմարտադրողների և պրոդյուսերների հանդեպ, որոնք գալիս են Հայաստան:

Գիտակցության հոսքի և աբստրակտ պատկերացումների նյութականացումը էկրանին

Այո՛, սա այն ամենն է, ինչ ես կարողանում եմ անել: Այդ ամենին կարելի է հասնել քայլ առ քայլ, քանի որ այն շատ մասերից է բաղկացած: Այդ ամենն էկրանին հասցնելուց առաջ արվում են մի շարք աշխատանքներ, և ամեն դետալ իր նշանակությունն ունի, և յուրաքանչյուր ոք այդ գործընթացում իր ներդրումն ունի:

Գաղափարները ծագում և զարգանում են անգիտակցական մակարդակում, և այդ երևույթը բազմաթիվ մարդիկ անվանում են Աստված կամ հոգի, էներգիա, բայց արվեստի զարմանալին ու հրաշալին այն է, որ դու կարող ես ֆիզիկապես գտնվել ինչ-որ մի տեղ, բայց քեզ զգաս բոլորովին այլ վայրում։

Սահմանափակումների մասին

Միշտ էլ սահմանափակումներ լինում են: Դրանք հիմնականում փողն են, ժամանակը և ստեղծարարությունը: Բոլորը միասին կարծես մի եռանկյունի են կազմում: Եթե դու ցանկանում ես ինչ-որ հետաքրքիր բան ստեղծել, դրա համար քեզ շատ գումար է պետք և ժամանակ: Այս ամենն իրար հետ շատ սերտ փոխկապակցված են:

Իսկ ինչ վերաբերում է՝ արդյո՞ք իմ ստեղծածի մեջ ինձ սահմանափակում են, թե ոչ, ես ձեզ պարզապես կասեմ՝ տեսե՞լ եք իմ վերջին`  «Մայրը» ֆիլմը:

Մենք այնտեղ երեխա ենք կերել, ինչի մասին է խոսքը ….