Կոմիտաս և հայկական շարականներ են հնչել Հալլե քաղաքի երգչախմբի կատարմամբ․ մշակութային համագործակցության համերգ Գյումրիում

Հալլեն և Գյումրին քույր քաղաքներ են դարձել 2020 թվականին, իսկ «Ars musica»տղամարդկանց երգչախմբի համերգային ծրագիրը  երկու քաղաքների  միջև առաջին մշակութային համագործակցությունն էր։ 49 տարի առաջ է Գերմանիայի Զուլ քաղաքում հիմնադրվել «Ars musica» երգչախումբը, որի անդամները տարբեր մասնագիտությունների տեր մարդիկ են, որոնց  համախմբել է բնատուր տաղանդը, արվեստն ու  մշակույթը  ներկայացնելու  ցանկությունը։

«Մեր երգչախումբը պրոֆեսիոնալ չի համարվում, բայց  յուրաքանչյուր ստեղծագործություն կատարելուց առաջ, ամենայն բծախնդրությամբ ենք  մշակում մեր կատարումները։ Երգացանկում համաշխարհային   կոմպոզիտորների  ստեղծագործություններն են ընդգրկված, որոնք հանդիսատեսին ենք ներկայացնում բազմաձայն մշակումներով, ինչը բավականին բարդ է, հատկապես սիրողական երգչախմբի համար»,- ասում է «Ars musica» երգչախմբի նախագահ  Թողսթեն Վայսը։

«Այս համերգը հրաշալի օրինակ է, թե ինչպես պետք է զարգանան հայ-գերմանական մշակութային հարաբերությունները։ Այսպիսի միջոցառումները կարող են ամրապնդել նաև Գյումրի և Հալլե քույր քաղաքների միջև  հետագա բարեկամությունը։ Ես, որպես  Հայաստանում Գերմանիայի Դաշնային Հանրապետության դեսպան, պետք է նշեմ, որ  երկու երկրների  համար էլ բացի գիտական ու կրթական կապերից, կարևոր է  մշակութային երկխոսությունը, ինչը կարող է էլ ավելի ամրապնդել հարուստ մշակութային ժառանգություն ունեցող երկու ժողովուրդների հարաբերությունները»,-SHANTNEWS.am-ի հետ զրույցում նշել է ՀՀ-ում Գերմանիայի Դաշնային Հանրապետության դեսպան  Միխայել Բանցհաֆը։

Հալլեյի և Գյումրիի համագործակցության հուշագիրն ընդամենը մեկ տարվա պատմություն ունի, իսկ «Ars musica» արական  երգչախումբը շատ ավելի վաղ է Գյումրիի այցելել: 1988-ի երկրաշարժից հետո երգչախմբի անդամները բարեգործական նախաձեռնություններով են հանդես եկել: Եվս մեկ բարեգործական համերգ անցած տարի են Հալլեում կազմակերպել, որի հասույթը կրկին Գյումրիին էր ուղղված: Այդ հասույթով տավիղ  երաժշտական գործիք են գնել Կոնսերվատորիայի Գյումրիի մասնաճյուղի համար:

Համերգի ընթացքում Հալլեի երգչախմբի կատարմամբ հնչեցին նաև հայկական շարականներ և հոգևոր երգեր, որոնք հանդիսատեսին ներկայացվեցին նոր մշակումներով և բազմաձայն կատարումներով։

«Մեր երգացանկում ընդգրկված է հոգևոր երաժշտությունը և մեզ շատ հոգեհարազատ է այս ուղղությունը: Երեք տարի առաջ սկսեցինք հետաքրքրվել հայկական հոգևոր երաժշտությունով: Արտասանության հետ կապված դժվարություններ, իհարկե կային, բայց մենք հնարավորինս յուրացրեցինք աշխարհի ամենահին հոգևոր երգերից մեկը համարվող հայկական շարականները»,- նշել է երգչախմբի նախագահը։

Երգչախումբը համերգներ է ունենալու նաև Հանրապետության մյուս մարզերում և մայրաքաղաքում: Իսկ  հաջորդ տարի նախատեսված է գյումրեցի երաժիշտ կատարողների համերգը Հալլե քաղաքում։ Երգչախմբային համերգն ամփոփվեց հայ և գերմանացի երաժիշտների համատեղ կոմիտասյան կատարմամբ: