Գյումրիի դրամատիկական թատրոնը 156-րդ թատերաշրջանը սկսում է երեք նոր ներկայացումների առաջնախաղով

Հոկտեմբերի 1-ին Գյումրիի դրամատիկական թատրոնը կբացի 156-րդ թատերաշրջանը: Աճեմյանցիները երեք նոր բեմադրությունների պրեմիերաները  կներկայացնեն առաջիկա երեք  ամիսների առաջին օրերին։ Բեմադրություններից երկուսի նախապատրաստական ու բեմի ձևավորման աշխատանքներն ավարտված են, իսկ երրորդ թատերաշրջանի ամենամասշտաբային ներկայացման փորձերը շարունակվում են: Թատրոնը «Մաուգլի» է բեմադրում։

««Մաուգլի» ներկայացման մեջ  ընդգրկված են 70-ից ավելի դերասաններ, ոչ պակաս մեծ խումբ էլ աշխատում է կուլիսներում։ Երկու ռեժիսորով ենք աշխատում՝ ես և Ռաֆայել Ասատրյանը, ունենք նկարչական ձևավորում՝ Գարեգին Եվանգուլյանի, բուտաֆորական աշխատանքների համար հրավիրվեց մասնագետ Մոսկվայից։ Մոտավորապես 7 ամիս արդեն աշխատում ենք, դեկորների մեծ մասը պատրաստվում են Երևանում»,- SHANTNEWS.am-ի հետ զրույցում նշել է Գյումրիի դրամատիկական թատրոնի տնօրեն  Լյուդվիգ Հարությունյանը։

«Մաուգլին» Գյումրիի թատրոնի բեմում եղել էր մոտ 35 տարի առաջ՝ ժողովրդական արտիստ Խորեն Աբրահամյանի բեմադրությամբ։ Այդ տարիներին նա թատրոնի գեղարվեստական ղեկավարն էր։ 80-ականների «Մաուգլին» բովանդակային ենթաշերտերով և ասելիքով  խիստ տարբեր է այժմյան «Մաուգլիից»։

«Մենք չենք բեմադրում «Մաուգլի» մանկական ներկայացում, մենք շատ խոր ենթաշերտերով պիես ենք բեմադրում, որը շատ արդիական է, որն ասելիք ունի ու կարծում եմ՝ մեր դիրքորոշումը՝ որպես արվեստագետ, մարդ ու քաղաքացի, ինչ խնդիրներ մենք էսօր ունենք կարողացել ենք ներմուծել էս պիեսի մեջ»,- նշել է Լյուդվիգ Հարությունյանը։

Թատրոնի հանդերձարանում նկարիչ-մոդելավորողների ձեռքերով պատրաստած բեմական հագուստներն են 156-րդ թատերաշրջանի ներկայացումների համար։ Դերձակներն ուշադրություն են դարձնում   զգեստների հարմարավետությանը, իսկ դիզայներները՝ կերպարների բնականությանը։

«Մաուգլին» հանդիսատեսին կներկայացնեն դեկտեմբերի 1-ին։ 156-րդ թատերաշրջանում ևս երկու նոր ներկայացումների առաջնախաղ ունեն: Բացումն ազդարարում են Վիլյամ Սարոյանի «Փրկության կղզի» պիեսով՝  ՀՀ ժողովրդական արտիստ Նիկոլայ Ծատուրյանի բեմադրությամբ։

«Սա ներկայացում է մարդու  ընտրությունների և այդ ընտրությունների թողած հետևանքների մասին, թե ինչքանով ես դու պատրաստ կրելու այն բոլոր հետևանքները, որոնք բերում են քո ընտրությունները կյանքում։ Ներկայացման մեջ զբաղված են հինգ դերասաններ, ու այն հասարակության տարբեր շերտերի համար է»,- նշում է Գյումրիի դրամատիկական թատրոնի դերասան Արսեն Միքայելյանը։

Եվս մեկ պրեմիերա արդեն Մհեր Մկրտչյան  փոքր բեմում է լինելու նոյեմբերի 1-ին։ Դերասանները կխաղան վերանորոգված բեմում։ Հանդիսատեսին կներկայացվի երիտասարդ դրամատուրգ Բաբկեն Զաքարյանի «Քայլեր» պիեսը։ Սա երիտասարդ դրամատուրգի երրորդ գործն է թատրոնի համար։ Ռեժիսորն է Ասպրամ Բաղդասարյանը, այն  անդրադարձ է  սեռով պայմանավորված հղիության ընդհատումների խնդրին։

Նոր թատերաշրջանի երեք ներկայացումներում զբաղված են նաև 8-10 տարեկան երեխաներ, որոնք թատերական տարբեր խմբակներում են ընդգրկված և մարմնավորում են գլխավոր դերեր։ Դրամատիկական թատրոնը նոր բեմադրություններին զուգահեռ կներկայացնի վերջին տարիների խաղացանկում  եղած ամենավարկանշային բեմադրությունները։