Արսենալ-Տոտենհեմ. անգլիական ֆուտբոլի մեծ հակամարտության պատմությունը

Հյուսիսլոնդոնյան դերբի՝ ահա այսպես է ֆուտբոլային աշխարհում հայտնի Լոնդոնի հյուսիսային մասի «Արսենալ» և «Տոտենհեմ Հոթսփուր» ակումբների միջև առկա հակամարտությունը: Այս դիմակայության ականատեսը կլինենք նաև վաղը: Բայց այս անգամ այս հանդիպումը մեզ համար առավել կարևոր ու սպասելի է: Սպասվում է, որ հենց մեկնարկային առաջին րոպեներից խաղադաշտ դուրս կգա նաև Հայաստանի ֆուտբոլի ազգային հավաքականի ավագ և «Արսենալի» կիսապաշտպան Հենրիխ Մխիթարյանը: Ուստի, սա, թերևս, ամենաճիշտ պահն է երկու ակումբների ֆուտբոլային հակամարտությանն անդրադառնալու համար:

Այսպիսով, այս ակումբների միջև առաջին հանդիպումը կայացել է 1887 թվականի նոյեմբերի 19-ին և կրել է ընկերական բնույթ: Հանդիպումը չի շարունակվել մթության պատճառով: Այն դադարեցրել են, երբ  հանդիպմանը մնալիս է եղել 15 րոպե: Այդ պահի դրությամբ «Տոտենհեմ Հոթսփուրը» հաղթելիս է եղել 2:1 հաշվով:

Ոչ ընկերական առաջին խաղը թիմերի միջև Առաջին դիվիզիոնում է կայացել՝ 1909 թվականի դեկտեմբերի 4-ին: «Արսենալը» հաղթել է 1:0 հաշվով:

Իրական հակամարտությունը այդ երկու թիմերի միջև սկսվել է 1913 թվականից: Այն բանից հետո, երբ «Արսենալը» տեղափոխվում է նոր մարզադաշտ, որը «Ուայթ Հարթ Լեյնից» գտնվում էր 4 մղոն հեռավորության վրա: Լոնդոնյան ակումբները դառնում են մոտ հարևաններ, և, այդկերպ, սկսվում է իսկական հակամարտությունը:

Ըստ որոշ աղբյուրների՝ երկու ակումբների միջև լարվածությունը սրվել է 1919 թվականին, երբ Առաջին համաշխարհային պատերազմից հետո Առաջին դիվիզիոնը ընդլայնվել է երկու թիմով:

Այս պահի դրությամբ երկու ակումբների միջև 262 հանդիպում է տեղի ունեցել: 106-ն ավարտվել է «Արսենալի» հաղթանակով: «Զինագործները» պարտվել են 93 անգամ, 63 անգամ էլ գրանցվել է ոչ-ոքի: Այս ամենից ակնհայտ է դառնում, որ «Արսենալը» ավելի շատ գոլեր է գրանցել՝ 414-ը՝ ընդունելով 381 գնդակ: 

Հուսանք, որ 263-րդ հանդիպումը մեզ համար կնշանավորվի Հենրիխ Մխիթարյանի խփած գոլերով ու գոլային փոխանցումները և այդ կերպ Միկին, ինչպես սիրում են անվանել նրան եվրոպացի երկրպագուները, ավելի կմեծացնի «Արսենալի» առավելությունը: 

Ինչպես ավելի վաղ հայտնել էինք՝ «ՇԱՆԹ» հեռուստաընկերությունը ձեռք է բերել ՈՒԵՖԱ-ի «Եվրոպա» լիգայի հանդիպումների հայաստանյան հեռարձակման բացառիկ իրավունքը։ «Արսենալը» 1/16-րդ եզրափակչում մրցելու է շվեդական «Էստերսունդ» ակումբի հետ։ Առաջին խաղը տեղի կունենա շվեդական թիմի հարկի տակ փետրվարի 15-ին՝ Երևանի ժամանակով 22.00-ին։  Պատասխան խաղը մեկ շաբաթ անց է՝ փետրվարի 23-ին, Երևանի ժամանակով 00.05-ին «Զինագործների» տնային մարզադաշտում։