Մենք անսխալական չենք, բայց կաշկանդված չենք սխալներն ուղղելու ճանապարհին. վարչապետ

ՀՀ վարչապետ Նիկոլ Փաշինյանը հուլիսի 20-ին լրագրողների հետ հանդիպմանն անդրադարձավ հարցին՝ ՍԱՊԾ պետի նշանակումն արդյոք չի՞ հակասում հեղափոխության գաղափարախոսությանը: Լրագրողները հիշեցրին՝ ՍԱՊԾ պետ Գեորգի Ավետիսյանը նախորդ իշխանության օրոք ամեն կերպ ծաղրում էր հեղափոխությունը: Վարչապետին նաև հարց ուղղվեց՝ ինչպիսի՞ն է նրա վերաբերմունքը այն կադրերի նկատմամբ, որոնք մինչ նշանակումը քրեական հեղինակությունների հետ կապ ունեին:

Գեորգի Ավետիսյանի նշանակմանն անդրադառնալով՝ Փաշինյանը նշեց, որ դա վառ, անհերքելի, ուղղակի ապացույցն է, որ Հայաստանում իրոք տեղի է ունեցել սիրո և համերաշխության հեղափոխություն:

«Եթե նայենք՝ ով, երբ, ինչի համար է ծաղրել, այդ ցանկը կարելի է անվերջ շարունակել, բայց կոչ եմ անում դրա վրա ժամանակ չծախսել, Հայաստանում տեղի է ունեցել ոչ թե սոցիալիստական, կապիտալիստական, բուրժուադեմորատական, այլ սիրո և համերաշխության հեղափոխություն: Ինչ վերաբերում է քրեական հեղինակությունների հետ կապ ունենալուն, ես չգիտեմ՝ ո՞ւմ նկատի ունեք, որովհետև կարող է՝ մեկն ինչ-որ մեկի, ասենք, հորեղբոր որդին է կամ աներձագը, մենք սա կապ համարո՞ւմ ենք, թե՞ չէ: Ես չեմ բացառում, այսինքն՝ այդպես էլ կլինի, մենք չենք կարող լինել անսխալական, եկեք այս բանն արձանագրենք, բայց ես բացառում եմ, որ լինի իրավիճակ, որ մենք կաշկանդված լինենք մեր սխալն ուղղելու ճանապարհին»,- ասաց նա:

Փաշինյանը նշեց՝ էական է այն, թե իրենք այդ մարդուց գումար են վերցրել, նշանակում արել, թե ոչ, կամ նրանք իրենց վրա լծակ ունե՞ն, թե՞ չէ, ապա ընդգծեց՝ իրենք կարող են սխալվել կադրային հարցում, բայց ոչ մի բան չի խանգարում՝ ուղղել իրենց սխալը: Նա շնորհակալություն հայտնեց կառավարությանն աջակցողներին, ապա կրկին նշեց՝ խնդիրն իրենց ուշադրության կենտրոնում է, բայց սրանք սխալներ են, որոնք այս իրավիճակում նույնիսկ անխուսափելի են, քանի որ Հայաստանում մասնագետների պակասի խնդիր կա, նույնիսկ զոդող վարպետի, խառատի պակաս կա, ոչ միայն բարձր որակավորման մասնագետների:

«Կարող են լինել նշանակումներ նույնիսկ ձեր ասած տրամաբանության շրջանակներում, բայց՝ գիտակցաբար, որոշակի ինստիտուցիոնալ հիշողությունը մի տեղից այլ տեղ ներբեռնելու նպատակով: Կա ինֆորմացիա, որին մարդիկ տիրապետում են: Մեկ-երկու դեպք կա, երբ ձեր չափանիշներով կարելի է ասել՝ այսպես է, բայց նաև երբեմն կա ինֆորմացիա, որին միայն տվյալ անձն է տիրապետում:

Եթե նրան աշխատանքից ազատենք, ապա վաղը պետք է պայմանագիր կնքենք, որ նա գա, մեզ հետ աշխատի. ինչ-որ ծրագիր, կապ չունի՝ ձախողված, թե հաջողված, շարունակելու համար մեզ պետք է ինֆորմացիա և պետք է իքս ժամանակ, որ նոր մարդիկ տիրապետեն հին ինֆորմացիային: Այդպիսի խնդիր կա, առավել ևս հարկային ու մաքսային համակարգում»,- ասաց վարչապետը: