Ինչպե՞ս ստացվեց, որ պաշտոնապես են հաստատում ապօրինի մեծածավալ ծառահատումների հանգամանքը. բնապահպանի ենթադրությունը

Ինչպես արդեն հաղորդել ենք, ՀՀ դատախազությունը փետրվարի 8-ին  հաղորդագրություն է տարածել, ըստ որի՝ «Հայանտառ» ՊՈԱԿ-ի 8 մասնաճյուղում տևական ժամանակ մեծ ծավալների ապօրինի ծառահատումների և դրանց հետ զուգորդված պաշտոնատար անձանց հանցագործությունների հետևանքով պետությանը պատճառվել է 1.5 միլիարդ դրամի վնաս: Սա, թերևս, ապօրինի ծառահատումների հայտնաբերված ամենախոշոր դեպքն է, ուստի բնապահպաններն այս օրերին քննարկում են նաև, թե ինչպես ստացվեց, որ տեսչական մարմինները գնացին այդ քայլին.

«Ես կարծում եմ, որ այդ ստուգումների պատճառներից մեկը եղել է այն, որ անցած տարի ՄԱԿ-ի աջակցությամբ ուսումնասիրություն արվեց: Մանրամասն ուսումնասիրեցին տիեզերքից նկարները: Այդպիսի խորությամբ մենք ուսումնասիրություն, ինչքան գիտեմ, չենք ունեցել՝ հյուսիսային մասի անտառները՝ Լոռի, Տավուշ: Գիտեք, ես ուղղակի սարսափած էի, որ լսում էի այդ արդյունքները և նայում էի այդ նկարներին: Պատկեր է, որ այլևս անտառածածկ տարածք չէ, այլ ուղղակի ցանց է՝ առանձին-առանձին անտառային հատվածներից ստեղծված ցանց էր՝ արանքներում էսպես դատարկ՝  լրիվ անտառահատված տարածքներ»,- այսօր լրագրողների հետ հանդիպման ժամանակ ասել է բնապահպան Կարինե Դանիելյանը:

Բնապահպանի հիշեցմամբ՝ հանդիպմանը ներկա են եղել պատասխանատու բոլոր կառույցների ղեկավարները, ու նրանցից որևէ մեկը չի հերքել:

«Ես հարց տվեցի՝ լավ, ինչպե՞ս է ստացվում, որ տիեզերքից այսպիսի նկարներ ունենք, ինձ պատասխանում էին, որ դա սանիտարական հատման արդյունք է, խնամքի հատումներն են, ինչը տարբերելու համար մեծ աշխատանք պետք է անել»,- շարունակել է բնապահպանը:

Կարինե Դանիելյանը հույս ունի, որ համակարգում կատարված փոփոխություններն իրենց արդյունքը կտան և ապօրինի ծառահատումներ դեպքերն իսկապես կնվազեն:

Հիշեցնենք, որ 2017-ի նոյեմբերի 30-ին ՀՀ կառավարությունը հավանություն տվեց Անտառային ոլորտի բարեփոխումների հայեցակարգին, որով նախատեսված էր անտառները հանձնել ՀՀ բնապահպանության նախարարության պահպանությանը: Իսկ 2017թ. դեկտեմբերի 19-ին ՀՀ նախագահ Սերժ Սարգսյանը ստորագրեց ՀՀ բնապահպանության նախարարության կազմում անտառային պետական կոմիտե ստեղծելու մասին հրամանագիրը:

«Նախորդ տարվա վերջից և այս տարեսկզբից սկսվել են համակարգային խնդիրների լուծման աշխատանքները: «Հայանտառ» ԲԲԸ-ն ԲՆ կազմ բերեցին, Բնապահպանության նախարարության կազմից հանեցին Բնապահպանական վերահսկողության մարմինը և «Հայանտառ» ՊՈԱԿ-ի մեջ էսպես անտառային կոմիտե ստեղծվեց, կոմիտեի մեջ ստեղծվում է պահպանության ծառայությունն առանձին և կառավարման օգտագործման մարմինն առանձին»,- պարզաբանել է Բնապահպանության նախարարության բնապահպանության և ընդերքի տեսչական մարմնի ղեկավարի տեղակալ Իգոր Սարգսյանը: