Սեր, որը վերակառուցեց մի ամբողջ պետություն

Այսօր աշխարհի սիրահարները Սուրբ Վալենտին են նշում, իսկ, այսպես ասած, չսիրահարները՝ անտիՎալենտին: Այս տոնը շատ սիրահարների համար զուտ իրար ևս մեկ անգամ տեսնելու և սեր խոստովանելու առիթ է, իսկ արկածախնդիր զույգերի համար ևս մեկ խելահեղություն անելու իսկական հնարավորություն: Սակայն գաղտնիք չէ, որ այս տոնը իր կարծրատիպերով շատերի նյարդերի վրա նաև ազդում է:  

Եվ քանի որ աշխարհի բոլոր քաղաքներում, այդ թվում նաև Երևանում այսօր ակտուալ է «I LOVE Մարիշիկ (հեղ. -այստեղ կարող էր լինել ցանկացած անուն)» և նմանատիպ տարբեր զարդարանքներով գրառումները, մեծ մոխրագույն արջուկները և փուչիկները, ապա SHANTNEWS-ը որոշել է ներկայացնել գեղեցիկ սիրո պատմություն, որը մի պահ մոռացության կմատնի շրջապատը:

Իսկ դու ինչի՞ ես պատրաստ հանուն սիրո

Ասում են իրական սերը սարեր շուռ կտա, իսկ այ օսկարակիր դերասանուհի Գրեյս Քելիի և Մոնակոյի արքայազն Ռենիե 3-րդի սերը վերակառուցեց Մոնակոն և փոխեց այդ փոքրիկ թագավորության խաղաքարտերը ամբողջ աշխարհում:

26 տարեկանում Գրեյս Քելլին արդեն կարողացել էր Հոլիվուդում հասնել գլխապտույտ հաջողությունների և դառնալ էքսցենտրիկ ռեժիսոր Հիչքոքի մուսան: Այդ ընթացքում դերասանուհուն արդեն հասցրել էին ամուսնության մի շարք առաջարկություններ անել, բայց նա բոլորին մերժել էր և շարունակում էր իր հոլիվուդյան շքեղ և հաջողակ կարիերան: Բայց այս ամենը տևեց մինչև 1955 թվականը, երբ Կաննի կինոփառատոնի ժամանակ նա հանդիպեց իսկական արքայազնի՝ Ռենիե 3-րդին: Այդ տարի Գրեյսը գլխավորում էր կինոփառատոնի ժյուրիի ամերիկյան պատվիրակությունը և նրանց անհրաժեշտ էր ազդեցիկ ներկայության և ամսագրային գեղեցիկ ֆոտոշարքերի համար այցելել արքայազն Ռենիեի «ապարանքը»: Հենց այստեղ էլ տեղի ունեցավ նրանց առաջին հանդիպումը:

Մինչ այս ներքաղաքական ծանր իրավիճակում արքայազն Ռենիեն հասկանում էր, որ իրեն անհապաղ անհրաժեշտ է ամուսնանալ և թագաժառանգներ պարգևել Մոնակոյի թագավորությանը: Բայց արքայազնը նաև ուզում էր, որ իր ամուսնության հիմքում  ոչ թե զուտ պարտավորությունները լինեին, այլ սեր: Եվ 1955-ի հանդիպումը այդ առումով ճակատագրական էր և՛ Գրեյսի, և՛ արքայազն Ռենիեի, և՛ Մոնակոյի համար:

Կես տարվա ակտիվ  նամակագրությունից հետո արքայազնը ժամանում է ԱՄՆ և ամուսնության առաջարկություն անում դերասանուհուն, իսկ արդեն 1956-ի ապրիլին տեղի է ունենում 20-րդ դարի ամենաշքեղ հարսանիքներից մեկը: Մոնակոն և ամբողջ աշխարհը սկսեց հիանալ Գրեյսի և Ռենիեի սիրո պատմությամբ, այս իրադարձություններին զուգահեռ սկսեց զարգանալ նաև Մոնակոյի տնտեսությունը, քանի որ այս իրադարձությունը զբոսաշրջիկների ուշադրությունը գրավեց դեպի Մոնակո, իսկ ներդնողները նոր շահավետ հնարավորություններ տեսան այդ փոքրիկ պետությունում:

Սերը Ռենիեին դարձրեց հաջողակ քաղաքական գործիչ, նա կարողացավ իր թագավորությանը վերադարձնել նախկին շքեղությունը, անկախությունը և այն դարձրեց Եվրոպայի ֆինանսական կենտրոններից մեկը: Իսկ Գրեյս Քելին զբաղվում էր երկրի ներքին կյանքի բարելավմամբ՝ բարեգործություններ էր իրականացնում, հիվանդանոցներ և մանկապարտեզներ էր բացում:Մոնակոն սիրում էր Գրեյսին:

Սակայն արքայադստեր տիտղոսը անցյալում թողեց դերասանուհու կարիերան: Թագավորական հարսանիքից հետո ռեժիսորները չէին դադարում Գրեյսին ուղարկել նոր ու գրավիչ սցենարներ, իսկ դերասանուհին մեծ ափսոսանքով մերժում էր բոլորին և զբաղվում էր Մոնակոյի բարգավաճմամբ:

Սակայն Գրեյսը չկարողացա երկար դիմանալ և երբ ստացավ Հիչքոքի նոր ֆիլմի սցենարը, նա ուղղակի 7-րդ երկնքում հայտնվեց և չէր ցանկանում մերժել իր սիրելի ռեժիսորին:

Արքայազն Ռենիեի հետ երկար խորհրդակցելուց հետո, արքայազնը նույիսկ համաձայնեց դեմ գնալ թագավորական բոլոր կանոնակարգերին և իր կնոջը իր դրական պատասխանով երջանկացնել: Սակայն այստեղ խնդիրն ավելի խորքային էր և բազմակողմանի:

Մոնակոյի ժողովուրդը՝ իմանալով, որ Գրեյսը պատրաստվում է մեկնել ԱՄՆ և ֆիլմում նկարահանվել, կատեգորիկ դեմ արտահայտվեց:
Ամեն օր հազարավոր նամակներ էին ուղարկում արքայազն Ռենիեին, որոնցում միաբերան ասվում էր.

«Մեր արքայադուստրը չի կարող նկարահանվել ֆիլմերում, և դա նրան պետք չէ…» :

Հասարակական ճնշումը ստիպեց արքայազնին որոշում կայացնել՝ հօգուտ ժողովրդի: Այս դեպքից հետո Գրեյս Քելին մեկ շաբաթից ավելի փակվեց իր սենյակում և բացարձակապես ոչ մեկի հետ չշփվեց: Հանուն հասարակական կարծիքի և սիրո՝ նա հրաժարվեց իր սիրելի աշխատանքից: Նրա անձնական հետաքրքրությունները հասարակությանը պետք չէին:

Այս դեպքը շատ ազդեց նրանց հարաբերությունների վրա: Տարիների ընթացքում ավելի շատացան հակասություններն ու հիասթափությունները:

Իրենց ամուսնության 25-րդ տարում նրանք արդեն իրարից հեռու էին ապրում և սիրուց մնացել էր ուղղակի ընկերական հարաբերություններ և թագավորական պարտավորություններ: Գրեյս Քելլին հիմնականում լինում էր Փարիզում:

1982-ի սեպտեմբերի 13-ին Փարիզից Մոնակո վերադառնալու ճանապարհին դերասանուհին ավտովթարի է ենթարկվում և մահանում: Մեքենայում Գրեյսից բացի, լինում է նաև նրա դուստրը՝ Ստեֆանիան, որը հրաշքով ողջ է մնում: Պաշտոնական հայտարարությունում նշվում է, որ մեքենան վարելու ընթացքում Գրեյս Քելին կաթված է ստացել, սակայն մինչ օրս նրա մահը դասում են չբացահայտված ու առեղծվածային գաղտնիքների շարքը:

Արքայազն Ռենիեն թաղման ժամանակ չի թաքցրել արցունքները և աղջկա ձեռքը բռնած քայլել է թափորի հետևից.

«Գրեյսի մահից հետո իմ կյանքը դատարկվեց»,- ասել է արքայազն Ռենիե 3-րդը:

                                                                                                                                     -Լիլիթ Խաչատրյան