Դմանիսի օջախային գոտին համարվում է ամենաակտիվը․ հզոր երկրաշարժերի առաջացման հավանականություն չկա․ Սերգեյ Նազարեթյան

Մեկ տարի առաջ, փետրվարի 13-ին հայ-վրացական սահմանի նույն օջախային գոտում դարձյալ երկրաշարժ գրանցվեց, որը, ինչպես երեկ տեղի ունեցածը, ուղեկցվում  էր ձայնով ու դղրդյունով։

«Ուղեկցվում էր ձայնով, մարդիկ փաստում էին, որ գռգռոց է եղել, ոնց որ բեռնատար ավտոմեքենա անցներ փողոցով: Դա բնական, սովորական երևույթ է, որովհետև մեր երկրում ուժեղ երկրաշարժերը ունեն մինչև 10 կմ խորություն, այդ խորություններում ապարների ֆիզիկամեխանիկական հատկությունները այնպես են, որ ջարդվելուց պետք է ձայն հանեն, դա բնորոշ երևույթ է»,- SHANTNEWS.am-ի հետ զրույցում պարզաբանել է ԱԻՆ սեյսմիկ պաշտպանության Հյուսիսային տարածաշրջանային կենտրոնի գլխավոր փորձագետ, դոկտոր, պրոֆեսոր Սերգեյ Նազարեթյանը:

Առաջին ալիքի ցնցման տևողությունն այս անգամ եղել է մի քանի վայրկյան։ Ըստ Սերգեյ Նազարեթյանի՝ տևողությունը ևս կախված է մագնիտուդից։ Վերջին 33 տարիների ընթացքում գրանցված ամենաերկար տևողությունն ունեցել է Սպիտակի երկրաշարժը՝ մոտ 35-45 վայրկյան։ Հայ-վրացական սահմանի Դմանիսի օջախային գոտին համարվում է ամենաակտիվը, որտեղ տարբեր ուժգնության ցնցումներ շատ են գրանցվում։

«Հարավային Կովկասում ամենաակտիվը երկրաշարժերի քանակի տեսակետից և թույլ երկրաշարժերի տեսակետից համարվում է  Ջավախքի օջախային գոտին, որն ունի յուրահատուկ երկրաբանական կառուցվածք: Այստեղ տեղի են ունենում հարյուրավոր, հազարավոր  երկրաշարժեր, որոնցից ուժեղները  համարյա թե աննշան են և վտանգ չեն ներկայացնում, այսինքն՝ այդ տարածաշրջանի, Ջավախքի գոտու համար բնական երևույթ է, վտանգ չի ներկայացնում»,- նշում է Սերգեյ Նազարեթյանը:

Սակայն  երեկվա երկրաշարժն իր ուժգնությամբ վերջին 33 տարիների ընթացքում համարվում է ամենաուժեղը Սպիտակի երկրաշարժից հետո, մագնիտուդով պայմանավորված արձանագրվել են 165 հետցնցումներ, որոնց հիմնական մասը  բնակիչների համար զգալի չեն եղել։ Սերգեյ Նազարեթյանի դիտարկմամբ, ամենամեծ վտանգ են ներկայացնում Գյումրիի վթարային շենքերը, որոնց վթարայնության աստիճանը տարեցտարի փոխվում է։

«Մեր պրոբլեմների պրոբլեմը 92 վթարային բազմաբնակարան շենքերն են, որոնք որ ունեն 3-րդ ու բարձր աստիճանի վթարայնություն: Այդ 92 շենքերից մոտ 10-12-ն ունեն 3-4-րդ աստիճանի վնասվածություն, բայց այդ շենքերի փլուզվելու համար  պետք է բավականին ուժեղ ցնցումներ լինեն, ասենք՝ 8-9 բալ, որոնց հավանականությունը մեր քաղաքում քիչ է»,- նշում է Սեյսմիկ ծառայության փորձագետը:

Ըստ մասնագիտական ուսումնասիրությունների՝ 88-ի երկրաշարժից հետո Գյումրիում կառուցված Անի և Մուշ թաղամասերի շենքերը կարող են դիմակայել մինչև 9-բալանոց երկրաշարժերի։ Իսկ Հանրապետության տարածքում տարեկան  արձանագրվող 1500-2000 երկրաշարժերը նման ուժգնություն ունենալու հավանականություն չունեն։