Աշխարհում երկու տարվա ընթացքում առաջին անգամ մեկ շաբաթում COVID-19-ից մահվան դեպքերը չեն գերազանցել 10 հազարը

Աշխարհում արդեն երկրորդ շաբաթն է` կորոնավիրուսով վարակման նոր դեպքերի թիվը չի գերազանցում 3,1 միլիոնը:

Մահացության ցուցանիշը շարունակում է նվազել: Յոթ օրվա ընթացքում COVID-19-ի պատճառով մահացել է 9,6 հազար մարդ, ինչը նվազագույն թիվն է 2020 թվականի գարնանից ի վեր։

Այնուամենայնիվ, աշխարհի տարբեր անկյուններում նոր բռնկումներ են գրանցվում: ԱՄՆ-ն արդեն հինգերորդ շաբաթն է` առաջին տեղն է զբաղեցնում աշխարոհւմ COVID-19-ի դեպքերի թվով։ Անցած յոթ օրվա ընթացքում այնտեղ հայտնաբերվել է մոտ 660 հազար նոր դեպք, ինչը 60 հազարով ավելի է նախորդ շաբաթվա համեմատ։ Նոր բռնկումներ են գրանցվել նաև Բրազիլիայում, որտեղ վարակի մակարդակն արդեն հասել է մարտ ամսվա մակարդակին (այժմ այնտեղ օրական գրանցվում է վարակի ավելի քան 40000 նոր դեպք)։ Մեքսիկայում հիվանդացությունը կրկնապատկվել է նախորդ շաբաթվա համեմատ. այստեղ օրական մոտ 6 հազար բնակչի մոտ ախտորոշվում է կորոնավիրուս։ Միևնույն ժամանակ, Կանադայում վարակի տարածման տեմպերը ապրիլի համեմատ նվազել են գրեթե հինգ անգամ։

Նոր բռնկումներ կան նաև Եվրոպայում: Այստեղ հիվանդացության ամենաբարձր ցուցանիշները դեռևս Գերմանիայում են, որտեղ մեկ շաբաթում կորոնավիրուս է հայտնաբերվել մոտ 300 հազար մարդու մոտ։ Վերջին երկու օրվա ընթացքում կտրուկ աճ է գրանցվել՝ օրական այնտեղ վարակվածների թիվը կրկին սկսել է գերազանցել 70 հազարը։

Ֆրանսիայում մեկ շաբաթվա ընթացքում Covid-ի դեպքերի թիվը կրկնակի պակաս է, քան Գերմանիայում, սակայն վերջին օրերին այնտեղ նոր բռնկում է գրանցվել՝ օրական ավելի քան 40 հազար մարդ է վարակվում։ Իտալիայում, չնայած ապրիլի կեսերից սկսված կայուն անկմանը, այս շաբաթ կրկին աճ է գրանցվում՝ օրական կրկին ավելի քան 20 հազար նոր դեպք է գրանցվում։ Մեծ Բրիտանիայում, մայիսից հետո առաջին անգամ, կրկին սկսել են հայտնաբերել օրական ավելի քան 10 հազար վարակված։

Ասիայում ամենաբարդ իրավիճակը դեռևս ԿԺԴՀ-ում է, որտեղ մայիսի սկզբին հայտնաբերվել են կորոնավիրուսային վարակի առաջին դեպքերը։ Այնուամենայնիվ, հնարավոր չէ հաշվարկել շաբաթական Covid-ի դեպքերի ճշգրիտ թիվը, քանի որ իշխանությունները գրանցում են ջերմության ախտանիշներով դեպքեր, բայց դրանք կարող են ներառել ոչ միայն կորոնավիրուսով վարակվածներին։ Շաբաթ օրը ժողովրդական հանրապետության իշխանությունները արձանագրել են տենդի 42810 նոր դեպք։ Կորոնավիրուսի դեմ պայքարը ԿԺԴՀ-ում, ինչպես ասել է երկրի առաջնորդ Կիմ Չեն Ընը, անցել է նոր փուլ։

Իսկ, օրինակ, Ճապոնիայում հիվանդացությունը երկու անգամ կրճատվել է մայիսի կեսերի համեմատ. այնտեղ կորոնավիրուս է ախտորոշվում օրական մոտ 15 հազար մարդու մոտ։ Ավստրալիայում վարակի տարածման մակարդակը վերջին երեք շաբաթվա ընթացքում նվազել է մեկուկես անգամ։