Հայաստանի տնտեսության հիմնական շարժիչ ուժերից մեկի՝ զբոսաշրջության աճի տեմպը նվազել է

Համաձայն Ազգային վիճակագրական ծառայության՝ այս տարվա առաջին վեց ամիսներին Հայաստան է այցելել 685 հազար 971 զբոսաշրջիկ:

Եթե այս տվյալը համեմատենք նախորդ տարվա նույն ժամանակահատվածի ցուցանիշի հետ, ապա ակնհայտ է, որ այն աճել է: 2017 թվականի հունվար-հունիս ամիսներին Հայաստան այցելել է 622 հազար 381 զբոսաշրջիկ: Եթե թվերի համեմատությունը դիտարկենք տոկոսային հարաբերակցությամբ, ապա կստացվի, որ այս տարվա ցուցանիշը 10.2%-ով գերազանցում է նախորդ տարվա ցուցանիշը:

Ասվածն ավելի պատկերավոր դարձնելու համար նշված թվերի համեմատությունը դիտարկենք գրաֆիկայով.

Ինչպես նշեցինք, սա համեմատությունն է այս և նախորդ տարվա նույն ժամանակահատվածի ցուցանիշների: Առաջին հայացքից այն գոհացնող է, որովհետև ամեն դեպքում աճ ունենք, բայց եթե 2018 թվականի առաջին վեց ամիսների ցուցանիշը դիտարկենք եռամսյակային կտրվածքով, ապա այն այդքան էլ ողջունելի չէ: Ինչի՞ մասին է խոսքը:

2018 թվականի հունվար-մարտ ամիսներին, այսինքն՝ այս տարվա առաջին երեք ամսում, նույն ԱՎԾ-ի տվյալների համաձայն, Հայաստան է եկել 346 հազար 458 զբոսաշրջիկ: Ճիշտ է, այս ցուցանիշը 16,1%-ով գերազանցում է 2017 թվականի հունվար-մարտ ամիսների ցուցանիշը, բայց երբ համեմատում ենք այն 2018 թվականի ապրիլ-հունիս ամիսների տվյալների հետ, ապա ստացվում է, որ գնալով զբոսաշրջիկների թիվը նվազել է:

Այսպիսով, 2018 թվականի հունվար-մարտ ամիսներին Հայաստան է ժամանել 346 հազար 458 զբոսաշրջիկ, իսկ ապրիլ-հունիս ամիսների տվյալները ստանալու համար պարզ հաշվարկ է հարկավոր՝ վեց ամիսների ցուցանիշից պետք է հանել առաջին եռամսյակի տվյալները, այսինքն 622 հազար 381-ից հանում ենք 346 հազար 458: Արդյունքում ստացվում է 275 հազար 923: Եթե ավելի մանրամասն, ապա 2018 թվականի երկրորդ եռամսյակում Հայաստան է ժամանել 275 հազար 923 զբոսաշրջիկ: Այս ամենի հանրագումարում պարզվում է, որ 2018 թվականի երկրորդ եռամսյակում առաջին եռամսյակից շուրջ 6%-ով պակաս զբոսաշրջիկ է այցելել մեր երկիր:

Թե ինչու է նվազում գրանցվել, այլ հարց է: Բայց զբոսաշրջություն զարգացնելու համար հարկավոր է նախ՝ զարկ տալ դրա հետ փոխկապակցված ենթակառույցների զարգացմանը:

Գաղտնիք չէ, որ զբոսաշրջությունը համաշխարհային տնտեսության հիմնական շարժիչ ուժերից է, որի զարգացումը նպաստում է կայուն տնտեսական առաջընթացին: Եվ պատահական չէ, որ Նիկոլ Փաշինյանի գլխավորած կառավարությունն էլ ԱԺ հավանությանն արժանացած իր ծրագրում տնտեսության զարգացման համար գերակա էր հայտարարել երեք ճյուղ, այդ թվում՝ զբոսաշրջությունը: