«Մեր մանկության տանգոն» ֆիլմի հայտնի պատմական շենքի վերակառուցման ճարտարապետական նախագծի մրցույթն ավարտվել է․ հաղթող կոնցեպտը հայտնի կդառնա սեպտեմբերին

Ավարտվել է «Մեր մանկության տանգոն» ֆիլմի պատմական շենքի  վերակառուցման համար հայտարարված ճարտարապետական նախագծերի մրցույթը: Մինչ այդ,  ապրիլին հայտարարվել էր  վերականգնման էսքիզային տարբերակների մրցույթ, մասնակցության հայտ էին ներկայացրել հայաստանյան, ինչպես նաև արտասահմանյան ճարտարապետական ընկերություններ, որոնք առաջարկել էին շենքի վերակառուցման ինքնատիպ տարբերակներ՝ ալեքպոլյան շրջանի հին ճարտարապետական ոճը համադրելով նորարարական լուծումների հետ:

Շենքը 2019 թվականին կառավարության որոշմամբ հատկացվել էր Հայաստանի Ազգային պոլիտեխնիկական համալսարանին, վերակառուցումից հետո Աճեմյան 25 և Աճեմյան 2/2 շենքերը կունենան մեկ հասցե ու կվերածվեն տեխնոլոգիական միջազգային կրթական կենտրոնի: Նախագծային մոտեցումներում առանցքային է եղել կրթական հարմարավետ միջավայր ստեղծելու կոնցեպտը: Էսքիզային  նախագծերի մրցույթի արդյունքներն ամփոփվել են, բայց դեռ չեն հանրայնացվում։

Զուգահեռ հուլիսին հայտարարվել էր նաև ճարտարապետական նախագծերի մրցույթ։ Հնարավոր է  պատմական շենքի վերակառուցման ծրագրի շուրջ  մի քանի լավագույն նախագծերի համատեղում լինի։

«Շենքը շատ բարդ ճարտարապետական նախագիծ է պահանջում, և՛ պատմամշակութային կառույց է, և՛ վթարային վիճակում է գտնվում։ Շատ բաներ կարող է գեղեցիկ թվալ, բայց անհնար լինի իրականացնելը, այդ մասով միանշանակ մասնագիտական կարծիք է պետք։ Որպես այդպիսին, հետաքրքիր գաղափարներ կային, ամեն դեպքում, մոտեցումը նույնն էր, այսինքն՝ ճակատային մասը շենքի ամբողջությամբ պահպանված էր բոլոր ներկայացված կոնցեպտներում, ինչպես նաև պահպանված էր պատշգամբի հատվածը։ Հետաքրքիր մոտեցումներն ավելի շատ ուղղված էին ներքին բակի օգտագործմանը, իսկ որպես կրթական միջավայր, մոտեցումները տարբերվում էին»,-նշում է ԳՏԿ ծրագրի ղեկավար Բելլա Հարությունյանը։

1860 թվականի կառույց շենքը եզակի կրթական միջավայրի կվերածվի Համաշխարհային բանկի ֆինանսավորմամբ, ծրագիրն իրականացնում է կառավարությունը՝ Ձեռնարկությունների ինկուբատոր հիմնադրամի, Սինոփսիս Արմենիայի և Գյումրիի տեխնոլոգիական կենտրոնի հետ համատեղ: Լավագույն կամ հաղթող ճանաչված ճարտարապետական նախագիծը հայտնի կդառնա մոտ մեկ ամսից:

Պատմական եզակի կառույցը ժամանակին ու ոչ համարժեք պահպանություն չունենալու պատճառով դարձել է խիստ վթարային՝ նաև մարդկանց միջամտությունների մեղքով։ Անհրաժեշտություն կա նաև շենքը ենթարկել կրկնակի սեյսմիկ ուսումնասիրության։ Փլուզման եզրին հայտնված պատշգամբի  հարևանությամբ փակցված են վերակառուցման աշխատանքների մեկնարկի մասին պաստառներ։

Տեղեկատվական արշավը կրում է «լույսն է գալիս» նշանաբանը, իսկ լոգո ընտրվել է քաղաքի մեկ այլ հայտնի ճարտարապետական կառույցը՝ Անտառավան թաղամասում գտնվող քաղաքի 60 ամյակին նվիրված «Բարեկամության» շատրվանը:

«Այս պահին արդեն ունենք չորս ընկերություն, որոնք դիմել են ճարտարապետական նախագծման մրցույթին մասնակցելու համար, որոնցից կընտրենք մեկին, ում հետ էլ կշարունակենք աշխատել, արդյունքները պարզ կդառնան սեպտեմբերին։ Իսկ Շենքի վերակառուցման տեղեկատվական արշավի համար ընտրել ենք Թարխանյանի նախագծած շատրվանի խորհրդանիշը, քանի որ այն հանդիսացել է առաջին պոլիտեխնիկական կոմպուսի սիմվոլը, հենց այնտեղ է տեղակայված եղել Գյումրիի պոլիտեխնիկական ինստիտուտը՝ նախքան երկրաշարժը»,- նշում է Բելլա Հարությունյանը։

Շենքի վերակառուցման աշխատանքների մեկնարկը նախատեսվում է 2023-ի  հուլիսից և ավարտել երկու տարում։ Ամենապահանջված զբոսաշրջային հատվածը, երբ շինարարությունը սկսվի, մասնակի բաց կլինի այցելուների համար։