Ի՞նչ վնասներ են կրել մարդիկ Ադրբեջանի հարձակման հետևանքով․ ՀՀ կառավարությունը կփոխհատուցի բոլորին

Ադրբեջանի հարձակման հետևանքով և սահմանին տիրող հրետակոծությամբ պայմանավորված՝ այս օրերին Գեղարքունիքի, Սյունիքի, Վայոց ձորի մարզերի տարբեր համայնքների բնակիչների տեղաշարժը եղել է միայն տվյալ մարզի ներսում։

Մարզպետարանները, համապատասխան նախարարությունների համակարգմամբ, իրենց տներից այլ համայնքներ տեղափոխված մարդկանց, ըստ կարիքի, տրամադրել են սոցիալական օգնություն։

3 մարզում վնասվել է 192 բնակելի տուն, այդ թվում՝ 60-ն ամբողջությամբ, օժանդակ կառույցներ, մարդատար և շտապօգնության մեքենաներ, գյուղտեխնիկա, սատկել են կենդանիներ։ Կառավարությունը պարտավորվել է տուժած բոլոր մարդկանց և վնասված ենթակառուցվածքների համար տալ փոխհատուցում։

«Անձի վիրավորվելու հետևանքով նրա ընտանիքը հայտնվում է դժվար իրավիճակում, պետք է գնահատել կարիքներն աջակցություն ցուցաբերելու համար: Անհրաժեշտության դեպքում կատարում ենք ծառայությունների ուղղորդում, որ բացեր չմնան։ Վստահեցնում եմ, որ որևէ քաղաքացի դրսում չի մնացել, որևէ հարց անարձագանք չի մնացել: Եթե կան մասնավոր դեպքեր, ապա կարող են թեժ գծով դիմել: Մենք մշտապես կապի մեջ ենք նաև ՄԻՊ-ի գործընկերների հետ, որովհետև քաղաքացիներն իրենց կարիքները նաև ՄԻՊ-ի միջոցով են փոխանցում: Այս պահի դրությամբ չունենք որևէ զանգ այն մասին, որ քաղաքացին դրսում է մնացել»,- ասուլիսի ընթացքում ասել է ՀՀ աշխատանքի և սոցիալական հարցերի նախարարի տեղակալ Տաթևիկ Ստեփանյանը:

«Որոշ տեղերում ունեցել ենք հոսանքազրկումներ, որոնք շատ արագ վերականգնվել են: Այս պահին էլեկտրականության հետ կապված խնդիր ունենք Ներքին Շորժայի հատվածում: Հասկանալի պատճառով էլեկտրականության, կապի մատակարարումը այդ հատվածում դեռ չի վերականգնվել, սակայն առաջին իսկ հնարավորության դեպքում կվերականգնվի»,- ասել է ՀՀ ՏԿԵ նախարարի տեղակալ Վաչե Տերտերյանը:

Այլ կարգի ենթակառուցվածքային խնդիրներ՝ ճանապարհների փլուզում, ջրամատակարարման խափանումներ չկան: Կան տարբեր խնդիրներ, որոնք ընթացքում շատ արագ կարգավորվում են: Վաչե Տերտերյանը նշել է, որ երեք մարզում էլ ղեկավարությունը հետևում է իրավիճակին, համակարգում են աշխատանքները շուրջօրյա ռեժիմով: Որոշակի հնարավորության դեպքում ամբողջական գույքագրումը կիրականացվի շատ արագ:

«Կստեղծվեն մասնագիտական հանձնախմբեր, որոնք տեղում ավելի մանրակրկիտ կհաշվառեն վնասները: Մեր քաղաքացիներն այդ առումով կարող են հանգիստ լինել: Եթե նույնիսկ որևէ բան բաց է մնացել, ապա համայնքների աշխատակազմերի միջոցով պատշաճ կարվի այդ աշխատանքը»,- ասել է Վաչե Տերտերյանը: