ՀԱՊԿ-ի պահվածքը, ԱՄՆ-ի, Իրանի դիրքորոշումն ու կողմերի «կարմիր գծեր»-ը․ զրույց քաղաքագետի հետ

Վերջին օրերին հայ-ադրբեջանական սահմանին տեղի ունեցած զարգացումների , միջազգային դերակատարների, ներքաղաքական ընդվզումների շուրջ «Հորիզոն»-ի տաղավարում հեռուստամեկնաբան Արտակ Հովհաննիսյանը զրուցել է քաղաքագետ,  անվտանգային քաղաքականության հետազոտական կենտրոնի փորձագետ Ռոբերտ Ղևոնդյանի հետ:

Զրուցակիցները սկզբում անդրադարձել են վարչապետի երեկվա ելույթին, որը նախ հասարակական իրարանցում առաջացրեց։ Հարցին, թե թյուրընկալո՞ւմ է եղել, թե՞ կոնկրետ ուժեր են ուղղորդել դեպի այդ թյուրընկալումը, քաղաքագետը պատասխանեց։

«Ակնհայտ է, որ գործ ունենք շահարկումների հետ։ Բավական լուրջ շահարկումներ եղան, խոսակցություններ եղան, թե ինչ-որ բան է ստորագրվելու, ինչ-որ մարդիկ ինչ-որ առաջարկություններ արեցին՝ հավաքվելու, ինչ-որ մի բան փոխելու և կարծես թե հավաքվել էին բոլոր այն մարդիկ, ովքեր մայիս-հունիս ամիսներին հավաքվել էին այլ վայրում և պահանջում էին վարչապետի հրաժարականը։ Այս գործընթացը շահարկումների միջոցով փորձեցին բերել այլ դաշտ, այնինչ վարչապետը նորմայից դուրս որևէ բան չէր ասել։ Վարչապետը նշել էր, որ եթե լինի որևէ փաստաթուղթ, որը կապահովի ՀՀ-ի համար՝ իր 29․800 քառ․կմ տարածությունով, այսինքն, այն տարածությունով, որը միջազգային հանրությունը ճանաչում է որպես Հայաստանի ինքնիշխան տարածք, ապա նա ստորագրելու է դա։ Այլ բան ասել վարչապետը չէր կարող, օրինակ՝ հավակնություններ ունենք Ադրբեջանի տարածքից և այլն։ Սա հնարավորություն էր այն քաղաքական կոնտինգենտի համար, որը ամեն ինչ փորձում է օգտագործել իշխանության վարկանիշը գցելու, հնարավորինս շատ վնասներ հասցնելու  համար և այդ հնարավորությունից օգտվեցին»,- ասել է Ռոբերտ Ղևոնդյանը։

Արտակ Հովհաննիսյանի այն դիտարկմանը, թե հասարակական, քաղաքական  որոշ շրջանակներում ՀԱՊԿ-ից դուրս գալու պահանջ է առաջ քաշվում: Սա էմոցիայի արդյունք է, թե՞ ինչ-որ տեղ նաև խելամիտ պահանջ, Ռոբերտ Ղևոնդյանը պատասխանել է։

«Չեմ կարծում, որ ՀԱՊԿ-ը որևէ դեր է խաղացել հրադադարի հարցում։ Մենք տեսանք, որ ՀԱՊԿ-ը փաստացի մերժեց Հայաստանին ռազմական օգնություն տրամադրել, առաջարկեցին ընդամենը ուղարկել ինչ-որ դիտորդական զբոսաշրջիկային ինչ-որ խումբ, և արդեն անցել է 2 օր այդ քննարկումից, նույնիսկ, դեռևս չի էլ ժամանել Հայաստան և հայտնի էլ չէ՝ երբ է ժամանելու։ ՀԱՊԿ-ը գործեց այնպես, ինչպես կանխատեսվում էր դեռևս ժամանակին՝ 2020թթ․-ի պատերազմի ընթացքում։ Տարածված լուրերի համաձայն կամ արդեն հաստատված, հրադադարի գործում շատ մեծ ներդրում ուներ Արևմուտքը, մասնավորապես՝ ԱՄՆ-ն, ինչը կարծում եմ մեծ չափով կապված է վարչապետի ելույթների, ուղերձների, մոտեցումների հետ և այլն»,- նշել է փորձագետը։

Ի՞նչ սպասել Իրանից, Հայաստանն ի՞նչ դիվանագիտական ուղիով է ընթանալու, սոցիալական ցանցերի օգուտի ու վնասի մասին՝ ամբողջական հարցազրույցում։