Թանգարան ու պոլիկլինիկա մեկ շենքում․ Գյումրիի նախկին վիրաբուժական հիվանդանոցի շենքը հատկացնում են Շիրակի երկրագիտական թանգարանին և Գյումրիի թիվ 1 պոլիկլինիկային

Գյուլբենկյանի անվան նախկին վիրաբուժական հիվանդանոցի շենքի պատին նոր  ցուցանակ է հայտնվել այն մասին, որ այստեղ լինելու է  Շիրակի երկրագիտական թանգարանը։ Նախկին հիվանդանոցի եռահարկ շենքը երկրագիտական թանգարանին հատկացվեց 2018 թվականին, կազմակերպվեց հանգանակություն, հավաքված մոտ 15 միլիոն դրամով նախագծման էսքիզային տարբերակ հասցրեցին կատարել։

«Նախագիծը պարզապես էսքիզային է եղել, էսքիզային տեսքով ինչ-որ  բաշխումներ է կատարվել, թե որ սենյակը ինչ է լինելու, որպես   աշխատանքային նախագիծ գոյություն չի ունեցել, և պարզ էլ չի եղել, թե շենքը վերակառուցելու համար ինչքան ֆինանսական  միջոցների անհրաժեշտություն կա»,- պարզաբանում է Շիրակի մարզպետարանի քաղաքաշինության վարչության պետ Խաչատուր Խնձրցյանը։

Էսքիզային նախագծի համար ծախսված 15 միլիոն դրամն այժմ համարվում է առ ոչինչ, քանի որ արդեն երեք հարկանի շենքը ամբողջությամբ թանգարանինը չէ։ Այս  սև շենքի մի հատվածում որոշվել է թանգարանի հարևանությամբ տեղակայել  թիվ 1 պոլիկլինիկան։

Շենքից տարածք պոլիկլինիկային հատկացնելու մասին կառավարության որոշում դեռ չկա, բայց չափագրումներ են արդեն կատարվել, տվյալներն ուղարկվել են պետգույքի կառավարման կոմիտե: ԿԳՄՍ նախարարությունից էլ ստացվել է դրական եզրակացություն՝ դեմ չեն, որ շենքի մի հատվածում գործի պոլիկլինիկ ծառայություն:

30 հազար կտոր եզակի, բացառիկ գտածոները շենքային պայմաններ չունենալու պատճառով 3 տասնամյակ է չեն կարողանում ցուցադրվում։ Շենքի վերակառուցման էսքիզային նախագծի բնօրինակը թանգարանում է, բայց չհրկիզվող պահարանում, որը հնագետ Համազասպ Խաչատրյանի մահից հետո կապարակնքվել է, նույնը նաև պահոցներին է վերաբերում, բոլոր փակ են:

Այնուամենայնիվ, թանգարանի աշխատակազմի համար անակնկալ էր շենքը մասերի բաժանելու որոշումը, դիմել են մարզպետարան, որոշ հատվածներն ամբողջությամբ իրենց ենթակայության թողնելու խնդրով:

«Մեր անհանգստությունը կայանում է նրանում, որ որոշում կա շենքի մի հատվածը տրամադրել առաջին պոլիկլինիկային։ Մենք մարզպետին խնդրել ենք և նաև էս մասով զրույց է եղել, որ շենքի նկուղային հարկը պարտադիր հատկացվի թանգարանին, որովհետև ամբողջ աշխարհում ընդունված կարգ կա, որ բոլոր թանգարաններում ֆոնդերը պահվում են նկուղներում»,- ասում է Շիրակի երկրագիտական թանգարանի տնօրենի ԺՊ Մերուժան Մինասյանը։

Նկուղային հարկից բացի, որտեղ նախատեսվում էր ֆոնդերը պահել ու  կազմակերպել նաև թաղման ծեսեր և այլ ցուցադրություններ, թանգարանը առաջարկել է տրամադրել հիվանդանոցի շենքի բակի առանձին կառույցը, որը կարելի է օգտագործել որպես ռեստավրացիոն լաբորատորիա:

Ի վերջո շենքի  տնօրինման իրավասությունը թանգարանինը թե՞ պոլիկլինիկայինն լինելու, որը դեռ 2020 թվականին կադաստրային վկայականով որպես սեփականություն հանձնվել էր Շիրակի երկրագիտական թանգարանին: Քաղաքաշինության վարչության պետը նշում է՝ ՀՀ կադաստր կոմիտեն նոր փաստաթուղթ կտրամադրի,յ ուրաքանչյուր հաստատությունը կունենա առանձին կադաստրային վկայական։

Իսկ ներկայում գործող  թիվ 1 պոլիկլինիկայի շենքը Կումայրի արգելոց թանգարանին է պատկանում՝ որպես պատմաճարտարապետական կառույց։ Շենքի որոշ հատվածներ դեռ տարիներ առաջ էին վաճառվել, նկուղային հարկն ու որոշ տարածքներ տրված են վարձակալության։ Այժմ շենքն ամբողջությամբ վաճառելու քննարկումներ չկան, սա հավաստիացնում են քաղաքապետարանից։  Գյումրիի քաղաքապետի մամուլի քարտուղարի փոխանցմամբ՝ պոլիկլինիկայի տեղափոխությունից հետո համայնքապատկան հատվածը կօգտագործվի քաղաքի կարիքների համար։