Գյումրիի հիվանդանոցներում մահճակալային ֆոնդը չի բավարարում․ գրիպի և սուր շնչառական վարակներով հիվանդացության թվերն ավելացել են

Հանրապետությունում պահպանվում է գրիպի և սուր շնչառական վարակների ակտիվությունը, հիվանդանոցներում դիմելիության թվերն աճում են։ Անցած տարեվերջից գերծանրաբեռնված իրավիճակ է Գյումրի ԲԿ-ի թերապևտիկ ու ինֆեկցիոն բաժանմունքներում, ազատ մահճակալներ չկան նաև Գյումրիի մոր և մանկան ավստրիական հիվանդանոցի մանկական բաժանմունքում։

«Ստացիոնարում այս պահին ունենք 20 հիվանդ, որոնց մեջ գերակշիռ մասը կազմում են երեխաները։ Երեխաները գալիս են բավականին բարձր ջերմությամբ, անհանգիստ վիճակով։ Ունենք նաև մեծահասակներ, որոնց մեջ գերակշռում են հղիները։ Քանի որ հղիությունը համարվում է ռիսկային, հղիները նույնպես բարդություններով, թոքաբորբով ընդունվում են հիվանդանոց»,-նշում է Գյումրի ԲԿ-ի ինֆեկցիոն բաժանմունքի վարիչ Կարինե Տոնոյանը։

Գյումրի ԲԿ-ի երրորդ  հարկում տեղակայված ինֆեկցիոն բաժանմունքում այս պահին բուժում են ստանում հիմնականում այն հիվանդները, որոնց մոտ վիրուսային հիվանդության ընթացքը բարդ է ու գտնվում  է վարակելիության փուլում։ Բոլոր  հիվանդները նախապես նմուշառվում են նաև կորոնավիրուսով վարակվածությունը հաստատելու կամ ժխտելու համար, որից հետո որոշվում է  հիվանդներին հոսպիտալացնելու կամ ամբուլատոր հսկողությամբ բուժումը շարունակելու հարցը։

Տոնական ու հետտոնական օրերից սկսած մարդկանց դիմելիությունը աճում է, մի քանի անգամ ավելացել է նաև թերապևտիկ բաժանմունքում։ Հանրապետությունում շրջանառվող գրիպի ենթատեսակների պատճառով էպիդեմիկ վիճակը մնում է լարված։ Բժիշկներին են դիմում հիվանդության ծանր ընթացքով, շնչահեղձությամբ ու թոքաբորբով։ Բաժանմունքում բուժում ստացող գրեթե բոլոր հիվանդները շնչում են թթվածնային սարքերի օգնությամբ։

«Եթե ընդհանրացնենք ախտանշանները և հետևենք  մեր ընդհանուր Հանրապետության տվյալներին, ապա շրջանառվում է H1N1 գրիպի տեսակը, դրանով էլ պայմանավորված է մեր խրոնիկ հիվանդությունների սրացումը։ Ախտանիշները հիմնականում արտահայտվում են մարմնի ջարդվածությամբ, ձայնի կորստով, ձայնի խռպոտությամբ, հոդամկանացավերով և, իհարկե, ավելի հաճախակի հանդիպող սիմպտոմ է խեղդող բնույթի հազը»,-նշում Գյումրի ԲԿ-ի թերապևտիկ բաժանմունքի վարիչ Լիլիթ Սարգսյանը։

Այս պահին զբաղված են Գյումրիի մոր և մանկան ավստիական հիվանդանոցի  մանկական բաժանմունքի բոլոր 30 մահճակալները։ Հոսպիտալացված երեխաների հիմնական մասը մինչև մեկ տարեկան փոքրիկներն են, անհրաժեշտ բուժօգնություն ցուցաբերելու համար երբեմն բաժանմունքում մահճակալներ ավելացնելու անհրաժեշտություն է առաջանում։

«Վերակենդանացման բաժանմունքում հոսպիտալացվում են շատ ծանր վիճակում գտնվող երեխաները, այսինքն՝ միայն թթվածնի կարիք ունեցողները։ 8 երեխա ունենք բաժանմունքում, բոլորն էլ ծանր վիճակում են։ Դեռ, ցավոք, չենք կարողանում լուծել մահճակալային ֆոնդի հագեցվածության խնդիրը։ Դա ամբողջ Հանարպետության մանկական հիվանդանոցներում առկա խնդիր է, մահճակալային ֆոնդը՝ դիմելիության աճով պայմանավորված, չի բավարարում»,-նշում է Գյումրիի մոր և մանկան ավստրիական հիվանդանոցի մանկական բաժանմունքի պատասխանատու Հասմիկ Խաչատրյանը։

Բժիշկները կանխատեսում են, որ դպրոցներում ու մանկապարտեզներում դասերի  վերսկսումը հնարավոր է նպաստեն հիվանդ երեխաների թվի ավելացման։ Առայժմ  երկու տարեկանից բարձր ու դպրոցահասակ երեխաների բուժումը փորձում են կազմակերպել ամբուլատոր պայմաններում։

Սուր շնչառական վիրուսային հիվանդությունը կնահանջի մարտ-ապրիլ ամիսներից, մինչ այդ, ըստ բժիշկների, սպասվում է գրիպի տարածվածության ու վարակելիության բարձր աստիճան։ Մասնագետները խորհուրդ են տալիս ախտանշանների դեպքում անմիջապես դիմել բժշկի, հակաբիոտիկներ չընդունել, փոխարենը շատ հեղուկներ ու վիտամիններով հարուստ սնունդ օգտագործել, ինչպես նաև մշտական խորհուրդը հաճախակի ախտահանել ձեռքերը, օդափոխել սենյակները, նվազեցնել շփումը հիվանդ անձանց հետ։