Գիտնականները պարզել են ճապոնական ջրահարսի առեղծվածը

Երկար տարիներ ճապոնական հնագույն տաճարում պահվում էր կապիկի և ձկան հիբրիդ հիշեցնող փոքրիկ մումիա։ Ըստ Vice-ի` Կուրաշիկիի գիտության և արվեստի համալսարանի գիտնականները վերջապես կարողացել են բացահայտել նրա առեղծվածը:

Արտասովոր արտեֆակտը Ճապոնիայի հարավում գտնվող Էնժուին տաճարի սեփականությունն էր, որը կառուցվել է մ.թ. 838 թվականին: 30 սմ-անոց «ջրահարսը» երկար ժամանակ եղել է տաճարի սեփականությունը, սակայն ո՛չ վանականները, ո՛չ էլ ծխականները չգիտեին, թե դա ինչ է և ինչպես է հայտնվել այնտեղ։ Արարածի գլխին մազեր են պահպանվել, յուրաքանչյուր ձեռքին հինգ մատ է, ափերը սեղմված են դեմքին, բերանը բաց է, թեփուկները ծածկում են մեջքը։

Կուրաշիկի գիտության և արվեստի համալսարանի գիտնականները որոշել են պարզել, թե ինչպիսի արարած է թաքնված մումիայի շուրջը փաթաթված կտորի շերտերի տակ։ Նրանց ուսումնասիրության արդյունքները հրապարակվել են միայն վերջերս։ Փորձագետները եկել են այն եզրակացության, որ մումիան երբեք կենդանի էակ չի եղել։

«Ելնելով մեր վերլուծությունից և Ճապոնիայում մումիա պատրաստելու պատմությունից՝ մենք եզրակացրել ենք, որ այս մումիան, ամենայն հավանականությամբ, ամբողջովին մարդու ստեղծած է»,-ասել է պալեոնտոլոգ Տակաֆումի Կատոն:

Մինչ ուսումնասիրության սկսվելը գիտնականները ենթադրում էին, որ «ջրահարսը» բաղկացած է կապիկի մարմնի մասերից՝ կապված ձկան պոչին։ Սակայն համակարգչային տոմոգրաֆիան ցույց է տվել, որ մումիան պատրաստված է թղթից, բամբակից և կտորից։ Ռենտգենյան ճառագայթների հիման վրա հնարավոր է եղել պարզել՝ ներսից բացակայում են կմախքի հիմնական ոսկրերը՝ ողնաշարը, գանգը և կողոսկրերը։ Ջրահարսի ոսկրերը հայտնաբերվել են միայն մարմնի ստորին հատվածում, ամենայն հավանականությամբ: Մումիայի ծնոտն ու ատամները պատկանել են ծովային գիշատիչին, իսկ փքված ձկան կաշին օգտագործվել է ձեռքերի, ուսերի և պարանոցի համար։

Ածխածնի անալիզը ցույց է տվել, որ խրտվիլակը պատրաստվել է մոտ 1810 թվականին կամ մի փոքր ավելի վաղ։ Թեև անհնար է հստակ ասել, թե ով և ինչու է պատրաստել այս տարօրինակ տիկնիկը, գիտնականները ենթադրում են, որ այն կարող է կապված լինել ջրահարսների մասին լեգենդների հետ, որոնց տարածումը Ճապոնիայում սկսվում է մ.թ. 8-րդ դարից։ Համարվում էր, որ ջրահարս տեսնելը հաջողություն է:

Okayama Mermaid-ը միակը չէ իր տեսակի մեջ: Նման մոտ մեկ տասնյակ մումիա հայտնաբերվել է Ճապոնիայում, թեև դրանք այդքան մանրամասն չեն ուսումնասիրվել։ Գիտնականները կարծում են, որ մարդիկ դրանք պատրաստել են կարմրուկի և ջրծաղիկի համաճարակների ժամանակ պաշտպանվելու հույսով: