Ադրբեջանի նախագահական ընտրություններին առայժմ 4 թեկնածու է գրանցվել

Ադրբեջանի կենտրոնական ընտրական հանձնաժողովն ապրիլին կայանալիք արտահերթ նախագահական ընտրությունների համար առայժմ 4 թեկնածուի է գրանցել։ Հանձնաժողովի ղեկավարն էլ անձամբ է առաքել նրանցից մեկի գրանցման վկայականը։ Թեկնածուն էլ ներկայացրել է, թե ինչպես է պատկերացնում այդ ընտրությունների ընթացքը։

«Նախագահ Ալիևը վստահություն է հայտնել, որ առաջիկա ընտրություններն արտահայտելու են Ադրբեջանի ժողովրդի կամքն ու անցկացվելու են արդար ու թափանցիկ, Ադրբեջանի օրենքներին համապատասխան», – հայտարարել է երկրի գործող նախագահը։

Սա այն պարագայում, որ ընդդիմադիր գործիչները հալածանքների են ենթարկվում ու լքում երկիրը։ «Լրագրողներ առանց սահմանների» կազմակերպությունը մամուլի ազատության ցուցանիշով 180 երկրների շարքում Ադրբեջանին դասել է 162-րդը։

«Նախագահ Իլհամ Ալիևը դաժան պայքար է մղում իր քննադատների նկատմամբ 2014 թվականից։ Անկախ լրագրողներին ու բլոգերներին բանտ են նետում, եթե նրանք զիջումների չեն գնում բռնաճնշումներից, ծեծից, շանտաժից ու առաջարկվող կաշառքներից հետո», – նշվում է կազմակերպության կայքի՝ Ադրբեջանի վերաբերյալ բաժնում։

Թափանցիկությունը երաշխավորող ներքին գործոնը, փաստորեն, սահմանափակված է։ Արտաքին գործոնի ազդեցիությունն էլ դժվար թե մեծ լինի, միջազգային կառույցներից այս ընտրություններին խոստացել է դիտորդական խումբ ուղարկել ԵԱՀԿ ԺՀՄԻԳ-ը։ Իսկ Եվրոպայի խորհուրդը որոշել է ոչ դիտարկել ընտրությունները, ոչ էլ մեկնաբանել դրանց արդյունքները։

Երկու կազմակերպություններն էլ դիտորդներ էին ուղարկել նախորդ ընտրություններին։ Եվրոպայի խորհրդի զեկույցում քննադատությունն ավելի մեղմ էր։  Ինչպես ավելի ուշ հայտնի դարձավ, զեկույցը կազմողները կաշառված էին Ադրբեջանի իշխանությունների կողմից։ Իսկ ԵԱՀԿ ԺՀՄԻԳ-ը խստորեն քննադատել էր ընտրությունների ընթացքը՝ արձանագրելով խոսքի ու հավաքների ազատության սահմանափակումներ և նույնիսկ բռնություններ լրագրողների հանդեպ։

«Ձերբակալությունները, քրեական հետապնդումները, ֆիզիկական բռնության դեպքերը և լրագրողներին ճնշելու այլ ձևերը բացասական ազդեցություն են ունեցել լրատվական միջավայրի վրա՝ ներառյալ նախընտրական արշավների լուսաբանումը», – նշվում է ԵԱՀԿ դիտորդական առաքելության զեկույցում։

Այն ժամանակ նույնպես նախագահ ընտրվում էր Իլհամ Ալիևը։ Այս ընտրությունները Ադրբեջանի գործող ղեկավարի համար կլինեն չորրորդը։ Եվ դրանցում հաղթելու դեպքում Ալիևի 15-ամյա իշխանությունը կերկարաձգվի ևս 7 տարով։ Իսկ եթե նրա հետ որևէ բան պատահի, «գահը կժառանգի» նրա կինը՝ Մեհրիբան Ալիևան։

Այս ամենը դե յուրե կկատարվի առանց ապօրինությունների՝ շնորհիվ 2016 թվականին ընդունված նոր սահմանադրության, որը «կարվել է» հատուկ Ալիևների «հագով»։ Այնտեղ նույնիսկ հաշվի են առել Իլհամ Ալիևի որդու տարիքը։ Եթե մինչ այդ նախագահ կարող էին ընտրվել առնվազն 35 տարեկանները, ապա հիմա կարող է երկրի ղեկավար դառնալ ընտրելու իրավունք ունեցող ցանկացած մեկը՝ այդ թվում և 21 ամյա Հեյդար Ալիև կրտսերը։

 

 

Երկու օր անց Ադրբեջանի ընդդիմադիր ուժերը մտադիր են ցույց անել արտահերթ նախագահական ընտրությունների անցկացման դեմ։ Բայց ընտրությունների օրվա տեղափոխումը նրանց թույլ չի տվել պատշաճ կազմակերպել այդ ամենը, պատրաստել միասնական պայքարը։ Արդյունքում ընդդիմադիր որոշ խմբեր հայտարարում են, որ չեն մասնակցելու դրան։

Հարևան երկրի իշխանությունները հենց այդպես էլ նախատեսել էին. ցայտնոտի մեջ գցել և՛ քաղաքական ընդդիմությանը, և՛ կլանային հակառակորդներին, և՛ դրսի խաղացողներին՝ թույլ չտալով նախապես պատրաստվել պայքարին։ Այսպես Իլհամ Ալիևը փաթեթային տարբերակով լուծում է թե՛ իշխանության մնալու հարցը, թե՛ Հայաստանի հետ մեկնարկային նույն պայմաններում լինելու խնդիրը։

«Մենք համաձայնության եկանք հայ-ադրբեջանական հակամարտության լուծման վերաբերյալ բանակցություններն ավելի ինտենսիվ շարունակել հայկական և ադրբեջանական կառավարությունների վերջնական ձևավորման գործընթացի ավարտից հետո», – օրերս հանդիպումներից մեկի ժամանակ հայտարարեց Ադրբեջանի ԱԳՆ ղեկավարը։

Ապրիլին ընտրվելու դեպքում Իլհամ Ալիևը կկարողանա բանակցությունների գնալ ուժեղ դիրքերից՝ չվախենալով հանրային դժգոհություններից։ Թե ընտրությունները արտահերթ ռեժիմով անցկացնելու որոշմամբ էլ ինչի՞ց կխուսափի Ալիևը, կարող եք տեսնել ShantNews.am-ի «14 իրական և կեղծ պատճառ, թե ինչու Ադրբեջանում տեղափոխվեցին ընտրությունները» ինտերակտիվ հոդվածում։