Գյումրիի «Անի» թաղամասի ջրամատակարարման նորացված ցանցի փորձարկում ջրաշինարարը չի կատարել․ 34 փողոցների հիմնանորոգումը դարձյալ ձգձգվում է

Սուբվենցիոն հայտերի գնահատման միջգերատեսչական հանձնաժողովը Շիրակի մարզի ներկայացրած 31 ծրագրից 20-ը հաստատել է։ Դրանցից 2-ը Գյումրի քաղաքինն են։ 2023 թվականի սուբվենցիոն ծրագրով 29 փողոցների հիմնանորոգում է նախատեսվում՝ ընդհանուր արժեքը  2 մլրդ 551 մլն դրամ, իսկ ընդհանուր երկարությունը՝ ընդամենը 7951 մետր կամ մոտ 8 կմ։ Մեկնարկի ժամկետներ դեռ չեն նշվում, բայց մինչ այդ 2022-ից անավարտ մնացած փողոցների նորոգումներն են ավարտվելու։ Խոսքն «Անի» թաղամասի 3-րդ և 11-րդ փողոցների մասին է, որոնք թաղամասի քանդված 34 փողոցների մեջ եզակիներից են։

Իսկ թերությունների և անորակ աաշխատանքի դիտարկումներ մարզպետարանի հանձնաժողովն էր ներկայացրել, որի մասին նախկին մարզպետ Նազելի  Բաղդասարյանը հայտնեց մոտ երեք ամիս առաջ՝ նշելով, որ 2022թ․-ի սուբվենցիոն ծրագրով Գյումրիի 21 փողոցներից ավարտվել է 19-ի շինարարությունը, որոնց ավարտական ակտերը ստորագրված չեն։ Այժմ Գյումրիի քաղաքապետը վստահեցնում է, որ թերությունները շտկել են՝ բացառությամբ 3 փողոցի։ Խնդիրը «Անի» թաղամասի 3-րդ, 11-րդ և Պարոնյան փողոցներին են վերաբերում։

Փողոցների հիմնանորոգման ծրագրի ավարտի ու մեկնարկի ժամկետների խախտումները կոնկրետ «Անի» թաղամասում միայն 3-րդ և 11-րդ փողոցներով չեն սահմանափակվում։ Ավելի վատ, գրեթե անանցանելի վիճակ այստեղ ստեղծվել է ջրամատակարարման ցանցի նորացման արդյունքում։ 2021-ից սկսված, բայց լիովին չավարտված ծրագիրը խախտել է նաև Անի թաղամասի բոլոր 34 փողոցների հիմնանորոգումների ժամկետը։ Ոչ միայն սուբվենցիոն, նաև ՎԶԵԲ ծրագրով նորոգումներ չեն կարող իրականացնել, քանի դեռ ջրաշինարարը՝«Դորոժնիկ» ընկերությունը, նորացված ցանցի փորձարկումները չի կատարել։

«Կա խնդիր, բայց մենք պետք է հասկանանք, որ միայն համայնքի պատճառով չէ։ 3-րդ և 11-րդ փողոցները կիսավարտ մնացին հենց իրենց պատճառով։ Խճապատեցինք, լուսավորություն իրականացրեցինք, բայց քանի որ փորձարկում չիրականացվեց, մեր կողմից սխալ կլիներ ասֆալտապատվեր, հետո փորձարկումից հետո թերություններն ի հայտ գային և էդ ասֆալտը շարքից դուրս գար»,- ասում է Գյումրիի քաղաքապետ Վարդգես Սամսոնյանը։

Քաղաքապետը շեշտում է, որ նման խնդիրներ ջրաշինարարը միայն Գյումրիում չէ, որ ստեղծել է։ Ամեն դեպքում, քաղաքապետարանը դարձյալ խնդրի լուծման տարբերակները կշարունակի քննարկել «Դորոժնիկ» ընկերության հետ։

Թաղամասի հազարավոր բնակիչներ փողոցների բարեկարգմանը սպասում են   արդեն երկու տարի։ Անանցանելի վիճակը չի փոխվում ո՛չ անձրևոտ, ո՛չ չոր եղանակներին։ Բնակիչներին  քաղաքապետարանից ասել են, թե մի քանի օրից ասֆալտապատումը կսկսեն, իրենք էլ սպասում են։

Իսկ քաղաքապետարանի խոստումը վերաբերում է 3-րդ և 11-րդ փողոցներին, եթե իհարկե, ջրաշինարարը փորձարկումներ կատարի։ Մնացած փողոցների հիմնանորոգման, որը ՎԶԵԲ-ի մեծ ծրագրի մասն է կազմում, քաղաքապետը դարձյալ մեկնարկի հստակ ժամկետներ չի նշում։

«Եթե ամեն ինչ հարթ ընթանա, նախագծային, շինարարական մրցույթ և այլն…. այս տարի սկսել և կիսատ թողնելը, իմ կարծիքով, տեղին չէ: Կախված է՝ որ ժամանակ է փաստաթղթային ձևակերպումները, հիմնավորումները և մրցույթները, քանի որ ինքը միջազգային կազմակերպության կողմից է, մրցույթները մեզ մոտ պայմանական 40 օր է, այս դեպքում ավելի երկար է, այսինքն՝ եթե հաշվում ես այդ ժամկետները, աշնան կողմ է գալիս, որը տեղին չէ, քանդենք, էլի էդպես անհարմար վիճակ ստեղծենք մեր բնակիչների համար»,- ընդգծում է Գյումրիի քաղաքապետը։

Ջրամատակարարման ցանցի փորձարկումից կախված փողոցաշինական ծրագիրը տուժում է նաև Շիրակացի փողոցում, որտեղ ևս ջրաշինարարը անավարտ գործեր ունի։ Քանդած փողոցների պատմությունը ձգվում է մինչև կենտրոնական այգուն հարող հատվածը։ Ինչ-որ չափով երթևեկելի պահելու համար քաղաքապետարանը կիրառում է հարթեցման և խճապատման ավանդական տարբերակը, որն իրականացվում է տեղական բյուջեի միջոցներով։

Հարթեցում և  խճապատում են նաև այն փողոցները, որոնք ընդգրկվել են այս տարվա հիմնանորոգման սուբվենցիոն ծրագրում։ Գյումրիում ևս 29 փողոցում՝ ընդհանուրը մոտ 8 կմ, հատվածային նորոգումներ կկատարվեն, իսկ թե երբ, դա էլ կախված է մրցույթների անցկացման արդյունքներից, որոնք նոր են մեկնարկելու։